Tanti che i se fà questa domanda i ga passà par un grando sofrimento e i ze in serca, nò sol de risposte, ma anca de consolo. Altri i vede el Olocausto come la roba pi bruta che i umani i ga belche fato, e par lori l’è fadiga creder in Dio.

 Idea sbaliada: L’è sbalià domandar parché che Dio el ga assà suceder el Olocausto.

 Verità: Persone de tanta fede le ga belche domandà parché che Dio el assa suceder robe rugne. Par esémpio, el profeta Abacuche el ga domandà a Dio: “Parché te me fè veder tanta perversità? E parché ti te sì drio tolerar la opression? Parché ghen’è tanta destrussion e violensa davanti de mi?” (Abacuche 1:3) Invesse de restar disgustà con Abacuche, Dio el ga assà le so domande scrite ntela Bìblia par che tuti i podesse léderle.

 Idea sbaliada: Dio no’l se importa col sofrimento.

 Verità: Dio el òdia la crudeltà e el sofrimento che ela la causa. (Proverbi 6:16-19) Ntei giorni de Noè, Dio “el se ga disgustà nel cuor” par causa dela violensa che ghen’era in tuta la Tera. (Génesi 6:5, 6) Podemo esser sicuri che Dio l’è restà pròpio disgustà col Olocausto. — Malachia 3:6.

 Idea sbaliada: El Olocausto l’è stà una punission de Dio par i giudei.

 Verità: L’è vera che Dio el ga assà Gerusalen esser destruta par i romani nel primo sècolo. (Mateo 23:37–24:2) Ma dopo de quel tempo, Dio no’l scólie una nassion o rassa par mostrarghe favor o castigarli. Ai oci de Dio, ‘no ghen’è difarensa intrà el giudeo e le persone de altre nassion’. — Romani 10:12.

 Idea sbaliada: Se ghen fusse un Dio amoroso e Tuto Poderoso, el gavaria fato qualcossa par impedir el Olocausto.

 Verità: Ancora che Dio mai el fà qualcossa par causar el sofrimento, lu el pol assarlo suceder par un tempo. — Tiago 1:13; 5:11.

 Dio el ga assà suceder el Olocausto par el medèsimo motivo che lu l’è drio assar suceder tuto el sofrimento ntel mondo: par darghe una risposta a importante domande che le ze state fate a tanto tempo indrio. La Bìblia la mostra de maniera ciara che l’è el Diaol che l’è drio governar el mondo, e nò Dio. (Luca 4:1, 2, 6; Gioani 12:31) Varda due verità fondamentai che imparemo dela Bìblia e che ne giuta a capir parché che Dio el ga assà suceder el Olocausto.

1.   Dio el ga creà i umani cola libertà de scòlier. Dio el ga dito ai primi umani, Adon e Eva, quel che Lu el spetea de lori, ma lori no i era obrigadi a obedirlo. I ga scoliesto far le so pròpie dessision sora quel che l’è giusto o sbalià. Questa bruta scòlia, insieme de tante altre brute scólie che i umani i ga fato nela stòria, le ga causà tanto sofrimento. (Génesi 2:17; 3:6; Romani 5:12) L’è come dise un libro a sora el giudaìsmo: “Tanto del sofrimento nel mondo el vien de doperar de maniera sbaliada la libertà de scòlia che ghemo ricevesto.” Invesse de cavar via la libertà de scòlia dei umani, Dio el ghe ga dato tempo par proar risolver i so problemi ala so pròpia maniera.

2.   Dio el pol e el va desfar tuto el sofrimento che el Olocausto el ga causà. Dio el promete ressussitar milioni de persone, anca quele che le ze morte nel Olocausto. Lu anca el va finir fora col dolor che quei che i ga passà par el Olocausto i sente quando i se ricorda dele brute robe che le ga sucedesto. (Isaia 65:17; Ati 24:15) El amor de Dio par i umani l’è la garansia che el va realisar queste promesse. — Gioani 3:16.

 Tanti che i ga passà par el Olocausto i ze stati boni de mantegner la so fede e catar un ogetivo nela vita parché i ga capio parché che Dio el assa robe brute suceder e come lu el va desfar le so consequense.