REBEKA onniweha muttetthe wa myaako vaavo vaniila aya. Nuuvira isumana sinceene eettaka, owo onnilimalela weetta ni ekamelo yeeyo ewenle awe. Elapo awe enikhala ikiloomo sinceene oHarani mpantta onikela epheyo. Waaniheryasa owo khaarowa otthikela-tho owoona amusi awe. Moohaaniherya, owo aaniikoha moota saarowa aya okhala okumi awe, vanceenexa vaavo aattamela awe muttetthe aarowa awe.

Egrupu eyo ya alipa-ooweetta, yoovikana epantte yuulupale ya oKanani, vano ennivira muttetthe wowuuma wa oNegebi. (Maphattuwelo 24:62) Waaniheryasa Rebeka aaniweha ipwittipwitthi vaavo eetta awe. Nave, elapo eyo ti yootepa wuuma ni khenireerela olima, masi vanniweryaneya ohuwa inama. Rebeka onihooliwa ni mulopwana olimalenle muttetthe ola. Owo oohakalala maana oniphavela omuleela pwiya awe ihapari sooreera voohimya sa Rebeka! Masi, Rebeka onniikoha voohimya sa okumi onrowa awe okhalana elapo ela ehinsuwela awe. Mwa ntakiheryo, Isakhi, mulopwana a moota xeeni? Awosa khanisuwelana! Niireke owo onrowa ohakalala nuumala omoona Rebeka? Ankhi Rebeka, onoosiveliwa ni Isakhi?

Olelo-va, ilapo sinceene, ti voohilimaleleya anamuyari omuthanla ole onrowa othelana ni mwanaya. Masi, ilapo sikina eyo etthu yoolimaleliwa. Moohicikha etthu sa emusi eyariwe anyu, nyuwo pooti okupali wira Rebeka aaheemya orowa elapo yahaasuwela awe. Tthiri owo aari oolipa murima ni oowaamini, mikhalelo seiyo nintthuneya ahu otakiha okathi ninkumana ahu marukunuxo mookumini. Waamini wa Rebeka onnooniherya-tho mikhalelo sikina soothowa olelo-va.

Marukunuxo maalupale a okumi wa Rebeka yiiraneyale mootutuxerya, muhina mwa mahiku vakhaani paahi. Owo annuwale muttetthe wa oHarani aahiiso waattamela muttetthe owo, epooma ya oMesopotamia. Anamuyari awe yaari oovirikana ni atthu akina a muttetthe ole. Awo khiyaamukokhorela muluku a mweeri, aitthaniwa Sin. Masi Muluku aya aari Yehova.—Maphattuwelo 24:50.

Rebeka aari mwali ooreera saana, masi owo khahiyo aari muthiyana oowiitthuna. Owo aari mutthu oowaamini ni aarina mweettelo wooloka. Emusi awe yaari yoothaaciri, maana yaahikhalana arumeyi, masi Rebeka khahiyo aari mwaana oolemeehiwa wala ahaavara muteko. Owo aanivara muteko okhuma onamwane awe. Moolikanasa ni athiyana anceene a okathi ole, Rebeka aanivara miteko suulupale vatthokoni ohela muhina orikelela maasi. Makaaripi aaniteexa muno awe vanikhatani aahiiso vamuru anarowa weehimeni.—Maphattuwelo 24:11, 15, 16.

Nihiku nimosa makaaripi, nuumala osariha maasi muno awe, mulopwana mmosa oowuuluvala aahimwaattamela Rebeka otthimakaka khumuhimeerya so: “Kovara metto, mukivahe màsi a mmunoni mwanyu, kiwurye”. ABiibiliya akina yoolepa eyo eni: ‘Xontte, mukivahe maasi vakhaani a mmunoni mwanyu’. Oveka wa moota owo wooniherya wiiyeviha ni ottittimiha! Rebeka aaniweha wira mulopwana ole aakhuma ottaiwene. Nto mowaakuveya, owo aahitheteya muno awe wa maasi waari mmakhatani ni onanvaha mulopwana ole, ohiya vakhaani, masi manceene ooriirya. Owo aahoona wira mulopwana ole aahikhalana ikamelo 10 saakhoromme, nave nipuro naawurya inama khinaarina maasi. Nave aahoona wira mulopwana ole aaninweha voomureerela murima, nto Rebeka aaphavela omukhaliherya mpakha vaawerya awe. Rebeka aahihimya wira: “Kinorika-tho màsi, kivahe inama sanyu, siwurye mpakha ovona”.—Maphattuwelo 24:17-19.

Moone wira Rebeka, khahiyo aavanhe maasi vakhaani ikamelo iye, maana aahivaha maasi manceene  mpakha iyo ovona. Ekamelo yoovoliwa nthowa, enniwurya iliituru 95 sa maasi! Akhala wira ikamelo sotheene saahivoliwa ntthona, Rebeka aahimaliha iwoora sinceene orikelelaka maasi. Moovarihana ni itthu siiraneyale, vanikhala ntoko wira ikamelo iya khisaareere ovoliwa ntthona. * Okathi Rebeka aivaherenrye awe ovaha maasi ikamelo, khaasuwela wira iyo khisaareere ovoliwa ntthona. Owo aari oolikana ene wira ovare muteko owo woovila ni omukhaliherya mulopwana ole aakhuma elapo ekina. Mulopwana ole aaheemya okhaliheriwa. Nto aaninweha vanceene mwali ole vaavo aatthimaka awe orikelelaka maasi ni ovahaka inama iye.—Maphattuwelo 24:20, 21.

Olelo-va ninniixutta etthu yuulupale ni ntakiheryo na Rebeka. Ninkhala okathi yoowo wiitthuna wuulanne aya. Sintoko Biibiliya aahimyale awe, atthu ‘anisupuwela mmansaya pahi’ ni khaniphavela waakhaliherya akina. (2 Timótheyo 3:1-5) MaKristau aniphavela osyaka makhalelo awo ootakhala, animwiira saana wuupuwelela ntakiheryo na mwali ole voohimya sa moota aarikelenle awe maasi ikwaha sinceene.

Rebeka aahoona wira mulopwana ole oowuuluvala aaninwehexexa. Enamuna yeeyo mulopwana ole anwehexexa awe khahiyo yaari yootthekeya, maana yooniherya otikinihiwa ni ohakalala. Rebeka omalihakaru ovaha maasi inama iye, mulopwana ole aahinvaha itthu sa eweero sa esisapo yuulupale, nto khumukoha wira: “Murokor’aka, mwá nloko na wani? Kihovarelani metto, mukilèle: w’atith’inyu nnophwanya opuro w’omaka ohiy’ula?” Nuumala mwali ole omuleela nloko nawe, mulopwana ole aahitepa ohakalala. Rebeka aahihimya so “Owani ohavo opuro w’omaka, ahavo-tho malaxi ni yolya yinjene y’ovaha inama”. Opuro owo wamumphiyerya mulopwana ole ni atthu akina aarina awe. Mwali ole aahitthimaka orowaka owannyawe, ni aahaaleela amamawe etthu yaamukhumelenle.—Maphattuwelo 24:22-28, 32.

Tthiri Rebeka aahiixuttihiwa owaakhela aletto. Nla ntakiheryo nikina nooreera otthara nenno nimmala-mala olelo-va, nto hiyo nimphavela otakiha waamini wa mwali ola ooreera murima. Omwaamini wahu Muluku ohaana oniiriha owaakhelaka aletto. Yehova Muluku onnooniherya mukhalelo owo, maana onnaareerela murima atthu otheene, ni oniphavela wira arumeyi awe emutakiheke. Vaavo ninwaakhela ahu aletto vatthokoni vahu, waahela muhina atthu yaale woonasa wene ahinrowa oniirela siiso, hiyo ninnimuhakalaliha Tiithi ahu a wiirimu.—Matheyo 5:44-46; 1 Pedru 4:9.

Mulopwana owo oowuuluvala aari murumeyi a Abrahamu. Abrahamu owo aari taata awe Rebeka. Aahaakheliwa saana vatthokoni va Betuweli, tiithi awe Rebeka. Nsina nawe murumeyi owo waaniheryasa aari Eliyezeri. * Emusi ele yaahinvaha eyoolya, masi owo aahikhootta olya ohinatthi ohimya etthu aarwenle awe. (Maphattuwelo 24:31-33) Hiyo pooti omuupuwelela murumeyi owo olavulaka moohakalala, maana aahoona wira Muluku awe Yehova, aanireeliha mukwaha awe ole wootthuneya. Moota xeeni?

Nkahaya mmuupuwelele Eliyezeri ohimyaka itthu siiraneyale, nto apapawe Rebeka (Betuweli), ni murokorawe (Labano), enwiriyanaka ni ephoole. Eliyezeri aahihimya wira Yehova aahimureeliha vanceene Abrahamu oKanani, ni wira Abrahamu ni Sara yaahikhalana mwaana aitthaniwa Isakhi yoowo aahiyeriwe itthu sotheene. Abrahamu aahimuruma murumeyi awe muteko ole wootthuneya. Aamurumme orowa oHarani omphavelela Isakhi muthiyana wira okhale mwaarawe.—Maphattuwelo 24:34-38.

Abrahamu aahimwiiriha Eliyezeri olapha wira khaarowa omuthanlela Isakhi muthiyana a nloko na aKaanani. Nthowa naya? Mwaha woowi aKaanani khiyaamukokhorela Yehova Muluku. Abrahamu aanisuwela wira Yehova aarowa waahukhumu atthu ale okathi wooreerela mwaha wa mweettelo aya woohiloka. Abrahamu khaaphavela wira mwanawe, Isakhi, ohapuxiwe ni atthu ale ootakhala vamosa ni mweettelo aya. Nave-tho aanisuwela wira mwanawe aamukhaliherya vanceene wiiraneya wa sooleiherya sa Muluku.—Maphattuwelo 15:16; 17:19; 24:2-4.

Eliyezeri aahimuleela Betuweli wira okathi aattamela awe oHarani, aahipaka nivekelo. Owo aahinvekela Yehova wira omukhaliherye omuthanla mwali wira akhale mwaarawe Isakhi. Moota xeeni? Eliyezeri aahinvekela Muluku wira mwali yoole aarowa otheliwa ni Isakhi, aahaana orwa veehimeni. Nave okathi aarowa awe onvekela maasi, owo aamwiivahererya onvaha maasi Eliyezeri vamosa ni ikamelo sawe. (Maphattuwelo 24:12-14) Nto ti pani aarwiiye orika maasi ni khupaka itthu iyo? Rebeka! Moohaaniherya Rebeka aahihakalala nuumala owiriyana itthu iye Eliyezeri aatthokihenrye awe.

Itthu iye saahimusivela Betuweli ni Labano, nto khumwaakhula Eliyezeri wira: “Itthu iya sothene sinrwa w’Apwiya”. Moovarihana ni yoolema ya okathi ole, awosa yaahipaka nivarihano noothelana, wira Rebeka atheliwe ni Isakhi. (Maphattuwelo 24:50-54) Niireke eyo enitaphulela wira Rebeka khaalavunle etthu?

Isumana vakhaani Eliyezeri ohinatthi orowa mukwaha awe ole, aahimukoha Abrahamu wira: “Ankhi muthiyan’owo ahitthune okitthará?” Abrahamu aahimwaakhula wira: “Olapha wanyu khuna muteko”. (Maphattuwelo 24:39, 41) Nave-tho, owannyawe Betuweli muupuwelo wa mwali owo waanivahiwa efaita. Eliyezeri aahihakalala vanceene okhala wira aahiphwanya ele aarwenle awe. Mmeeloni mwaya voosisu, aahivekela wira aaphavela otthikela oKanani ori ene ni Rebeka. Masi emusi ele yaaphavela wira awosa ekhume nuuvira mahiku 10. Wanikisa waya, yuupuwenle so: “Nimwitthane mwali ule, nimukohe entthunawe”.—Maphattuwelo 24:57.

Ola waari okathi wooxankiha mookumini mwa Rebeka. Aarowa waakhula sai? Niireke aarowa onvekela tiithi awe ni munna awe wira owo ohirowe elapo yahaasuwela awe? Wala aarowa woonela okhala eparakha wiirela mpantta mwaha ola weettihiwa ni Yehova? Waakhula wa Rebeka waahooniherya wira owo aanuupuwelela mwaha ola wootutuxerya ni wooxankiha, maana aakhunle so: ‘Kinnitthuna ayo!’—Maphattuwelo 24:58.

Tthiri Rebeka aahikhalana murima wooloka! Nnaamwi olelo-va soolema sa othelana sivirikanaka, nnoowerya wiixutta etthu sa ntakiheryo na Rebeka. Opaka yootthuna ya Yehova yaari etthu yootepa otthuneya wa yena ohiya yootthuna awe. Biibiliya ookhalana malakiheryo ooloka voohimya sa othelana. Mwa ntakiheryo, onnilavula sa moota woomuthanla saana ole onrowa anyu othelana, aahiiso moota wookhala mulopwana oothela wala muthiyana ootheliwa ooloka. (2 aKorinto 6:14, 15; aÉfeso 5:28-33) Nrowe nitakihe mikhalelo sooloka sa Rebeka, ni opaka itthu mwa moonelo wa Muluku.

Emusi ya Betuweli yaahimureeliha Rebeka. Nto owo, ni Deebora yoole aamwaamwihale, ni arumeyi akina axithiyana, yaahimutthara Eliyezeri ni alopwana ale yaarina awe. (Maphattuwelo 24:59-61; 35:8) Moohipisa atthu awo yaahihiya muttetthe wa oHarani. Waari mukwaha wootteiva wa ikiloomo 800 wala ovikana, nto waaniheryasa yaaheetta isumana 3. Woonasa wene waari mukwaha wooxankiha. Ekeekhai wira Rebeka aanisuwela ikamelo, masi khanikhanle oohimya wira owo aahilimalela weettiha ikamelo. Biibiliya onihimya wira Rebeka aari a emusi ya amakampusi, ohiya alipa a nakoso oolimalela weettiha ikamelo. (Maphattuwelo 29:10) Ale yahaalimalenle weettiha ikamelo yaamakela wiikhupanyiha mwaha wa woona owereya, hata nuumala weetta mukwaha mwaamukhaani!

Hata vari siiso, Rebeka uupuwelela sa muhoolo, ni aaphavela osuwela itthu sinci voohimya sa Isakhi ni emusi awe. Nkahaya muupuwelele sa mulopwana oowuuluvala olavulaka ni mwali ola ohiyu wotheene, omuleelaka sa yooleiherya ya Yehova wa Mpatthani awe Abrahamu. Orumeelaka emusi ya Abrahamu, Muluku aamukumiherya osuulu yoowo aarowa waareeliha atthu otheene. Nkahaya muupuwele moota Rebeka saakhanle awe nuumala osuwela wira yooleiherya ya Yehova yaarowa wiiraneya orweela wa yena ni iyawe Isakhi!—Maphattuwelo 22:15-18.

Wanikisa waya, yaahiiraneya etthu ehimmwale wanipacerya wa mwaha ola. Ikamelo sinniphiya muttetthe wa oNegebi nave epiphi ennikhuneela elapo. Nto Rebeka onnimoona mulopwana oneetta mmatta yoowo onikhala ntoko onimuupuwelela. Rebeka onnikhuruwa mowaakuveya vakameloni. Owo khonilipelela okhoroma ekamelo ele, nto mowaakuveya onnimukoha murumeyi owo oriki: “Mulopwan’ole onetta arwaka vale t’ani?” Okathi aasuwenle awe wira aari Isakhi, Rebeka aahikhuneela owiitho ni ekuwo. (Maphattuwelo 24:62-65) Woonasa wene eyo yaathoonyerya wira aanimuttittimiha ole aarowa okhala iyawe. Enamuna ya nttittimiho ya moota owo pooti wooniwaka okhala itthu sa khalai. Masi, otheene ahu, alopwana ni athiyana, nnoowerya wiixutta etthu sa wiiyeviha wa Rebeka. Ti pani ahimphavela mukhalelo owo wooloka?

Isakhi, yoowo aarina iyaakha 40, nlelo iira anlaka mwaha wookhweliwa ni amamawe, Sara, iyaakha sowiiraka 3. Nto nnoowerya ohimya wira Isakhi aari mulopwana ooriipiwa murima ni oothunku. Moohaaniherya, yaari etthu yootepa oreera mutthu ntoko ovahiwa muthiyana oovara muteko, oowaakhela aletto, ni oowiiyeviha. Nto atthu ala anli yaakhala sai? Biibiliya oni: ‘Isakhi ahimphenta’ Rebeka.—Maphattuwelo 24:67; 26:8.

Nnaamwi olelo-va sivinre ene iyaakha sowiiraka 4000, ninniphenta mikhalelo sa Rebeka. Tthiri, ninnisiveliwa olipa wawe murima, ovara wawe muteko, oowaakhela aletto, ni wiiyeviha. Nto otheene ahu, amiravo ni oowuuluvala, alopwana ni athiyana, oothela ni oohithela, ootheliwa ni oohitheliwa, nrowe nitakihe waamini wa Rebeka!