MPANTTA 2
Muroromeleyeke wa Ole Othelanne Anyu
“Yeyo Muluku ephitanyalyawe, mutthu ahimwalanyihé-tho”.
Yehova onnivekela wira nikhaleke oororomeleya. (Mikeya 6:8) Eyo etthu yootepa otthuneya mukasamentoni, maana ole ohiniroromeleya khonikupaliwa. Nto ororomeleya ti vootthuneya wira ophenta wunnuwe.
Olelo-va, ororomeleya mukasamentoni onnithowa. Ti maana aya, wira mulipihe ekasamento anyu, muhaana opakaka itthu iya piili sinittharelana:
1 MPWEHEKE EKASAMENTO ANYU OPURO WOOPACERYA
ELE BIIBILIYA ONIHIMYA AWE: “Musuweleke othanla itthu sintepa ophwanela”. (aFilipi 1:10) Ekasamento anyu, etthu yootepa otthuneya. Nto eyo ennireerela opweha opuro woopacerya mookumini mwanyu.
Yehova oniphavela wira mmuthokoreryeke ole othelanne anyu ni “mpuheke ekumi” hoothe. (Musuweli 9:9) Owo onihimya wira mmucaleke ole othelanne anyu, ni mwaavyeke inamuna soohakalalihana. (1 aKorinto 10:24) Iyanyu wala mwaarinyu ooneke wira munnimphenta ni onvaha efaita.
ELE EKHANLE ANYU OOPAKA:
-
Khula nihiku nviriheke okathi muryeene hoothe ni ole othelanne anyu, mmukhapelelaka yoowo ni murima wotheene
-
Murumeeleke masu oowi: “hiyo” ohiya “miyo”
2 MUKHAPELELE MURIMA ANYU
ELE BIIBILIYA ONIHIMYA AWE: “Ole oninweha muthiyana anwereihaka murima, òraruwana muthiyan’owo ni murima”. (Matheyo 5:28) Akhala wira mutthu onivikaniha wuupuwelela mweettelo woohiloka, nto, owo khoniroromeleya wa ole othelanne awe.
Yehova onihimya wira nyuwo muhaana okhapelelaka murima anyu. (Miruku 4:23; Yeremiya 17:9) Wira mpake eyo, muhaana okhapelelaka maitho anyu. (Matheyo 5:29, 30) Mutthareke ntakiheryo na muhavinre Yobi, yoowo aaleihanne ni maitho awe wira ohinwehe muthiyana mukina momphavela. (Yobi 31:1) Muhiweheke epornografia. Musyake osiveliwa ni mutthu ohikhanle iyanyu wala mwaarinyu.
ELE EKHANLE ANYU OOPAKA:
-
Mwaaleeke akina wira nyuwo moothela wala otheliwa
-
Muttittimiheke miyuupuwelo sa ole othelanne anyu; nto musyake opatthani waarowa omunyoonyiha iyanyu wala mwaarinyu