Aqo laggeti issoy issuwa ammanettennabanne siriyaba gidikko, eta aqo deˈoy ufayssennaagaa gidana danddayees. Yaatin, gaasoy baynnan qanaatiyogee intte aqo deˈuwa qohennaadan waatana danddayeetii?

Ha huuphe yohuwan

•  Qanaatee aybee?

•  Bessenna qanaatiyawu gaasoy aybee?

•  Qanaatiya waati aggana danddayeetii?

•  Ne aqo laggee qanaatiyaba gidikko

•  Aqo laggeti issippe tobbiyo oyshata

 Qanaatee aybee?

 “Qanaatiya” giya qaalawu dumma dumma birshshettay deˈana danddayees. Ha huuphe yohuwan, hegee hara uri nu aqo laggiya bessenna ogiyan siiqiyo wode, woy nu aqo laggee hara ura bessenna ogiyan siiqiyo wode nuuyyo siyettiyabaa qonccissees. Hegaa mala wodiyan, nu aqo deˈuwan metoy merettana haniyabadan qoppana danddayoos. Neeni qanaatanaadan oottida gaasoy hegaa gidikko, neeyyo hegaadan siyettidoogee likkenne bessiyaba. Aqo deˈoy naaˈˈu asatu giddon deˈiya mino dabbotetta gidiyo gishshawu, azinaynne machchiya he dabbotettay duuxxennaadan naaganawu banttawu danddayettida ubbabaa oottana koshshees.

 Geeshsha Maxaafaa maaraa: “Eti issi asa gidiyoogaappe attin, naa77u asa gidokkona; . . . Xoossai issippe gattidoogaa asi shaakkoppo.”—Maatiyosa 19:6.

 “Qanaatee tamay denddiyo wode akeekissiya malaataa mala; intte aqo deˈuwan metoy merettikko akeekissananne koshshiyabaa oottanaadan denttettana danddayees.”—Benjjaamina.

 Shin bessenna qanaatiyawu denddoy ammanttiya gaasoy baynnan siriyogaanne yayyiyogaa. Tumu siiqoy hegaa mala qohiya qanaatiyappe nuna naagees. (1 Qoronttoosa 13:4, 7) Dottoriya Robert L. Lahi hagaadan xaafiis: “Neeni [bessenna qanaatiya qanaatada] oottiyobay, ne minttanawu koyiyo dabbotettaa moorana danddayees.” a

 Bessenna qanaatiyawu gaasoy aybee?

 Ne kase aqo laggee nena kaddidaba gidikko, hegee neeni bessenna qanaatiya qanaatanaadan oottana danddayees. Woy nena yelidaageeti issoy issuwawu ammanettennan aggin eta aqo deˈuwan metoy merettido gishshawu, hegaa malabay nenakka gakkana danddayees gaada yayyana danddayaasa.

 “Taani naatettan deˈiyo wode, ta aaway ta aayeessi ammanettennaagaa bessiyabaa oottiis; hegaa gishshawu taani hara asa ammananawu metootays. Hegee taani iitabaa qoppanaadan oottido gishshawu, issi issitoo ta keettaawaa ammananawukka metootays.”—Meeliso.

 Hara gaasuwa: Neeni nebaa loˈˈo gidennabaa qoppiyaba gidikko, harati ne aqo deˈuwan metoy merettanaadan oottiyabadan eesuwan qoppana danddayaasa. Ubba, ne aqo laggee hara uraara deˈanawu nena aggidi biyogee attennabadan qoppiyogaa doommana danddayaasa.

 “Ta keettaaway ba laggiya bullachchan miize gidanaadan shoobettiis, hegee I miize gidida issi maccaariira oottiyobati deˈoosona giyogaa. Taani hegaa dosabeykke. Hegaa gishshawu, I ixxiis gaanaadan yootaas.”—Naaˈoomo.

 Bullachchay issi wogaappe hara wogan dummatana danddayiyo gishshawu, Kiristtaaneti Geeshsha Maxaafaa maaraa kaallana koshshees. Naaˈooma hegaadan qoppidoogee bessiyabee? A hegaabaa haˈˈi qoppiyo wode, qanaatanaadan oottiya gaasoy baynnaagaa akeekaasu. A hegaadan gaasu: “He wode taani tabaa loˈˈo gidennabaa qoppiyogaa doommaas. Ta keettaaway tana hara maccaasaara geeddarssees gaada qoppaas, shin hegee tuma gidenna.”

 Bessenna qanaatiyawu gaasoy aybanne gidin, hegee neeni ne aqo laggee neessi ammanettennabadan balan qoppanaadaaninne hegawu A mootanaadan oottana danddayees. Hegee ne aqo deˈuwanne ne payyatettaa qohana danddayees.

 Geeshsha Maxaafaa maaraa: “Qanaatee bollau ajaajje harggiyaa mala.”—Leemiso 14:30.

 Qanaatiya waati aggana danddayeetii?

 Ne aqo laggiyan ammanetta. Ne aqo laggee neeyyo ammanettibeennaagaa bessiyabadan neeni qoppiyobata gidennan, ne an ammanettanaadan oottidabata qoppa.

 “Taani ta azinaa loˈˈo eeshshata qoppays. I issi ura nashshikko, hegee I qarettiya asa gidiyogaa bessiyabappe attin iitaba qoppidoogaa bessiya gidenna. Tana yelidaageetu aqo deˈoy ufayssiyagaa gidibeennaagee taageekka hegaa mala gidees giyogaa gidenna.”—Meeliso.

 Ne siriyobay likke gaada qoppoppa. Qommoora abay odettido, Dottoriya Lahi hagaadan giis: “Issi issitoo, nuuni issibaa qoppikko hegee likke giidi ammanoos. Shin nuuni issibay likke giidi ammanido gishsha xallawu hegee likke gidana danddayenna, qassi hegee issibay likke gidiyogaa bessiya naqaasha gidenna.” b

 “Issi hanotaa beˈidi, bessennabay haniiddi deˈiyabadan qoppikko, nu aqo deˈuwan metoy merettanaadan oottana danddayoos.”—Nadino.

 Nena qofissidabaa issippe haasayite. Neeni qanaatanaadan oottidabay ayba gidikkonne, intte naaˈˈaykka hirggennaadaaninne issoy issuwa ammanettanaadan, nena qofissidabaa ne aqo laggiyara haasaya.

 “Hegaadan haasayiyo wode, aqo laggee nena qohanawu koyennaagaa, qassi loˈˈobaa kuuyanawu bawu danddayettidabaa oottiyabadan qoppa. Issoy issuwa siroppite. Neeni sohuwara yiillotananne haraappe darobaa koyana danddayaasa. Woy ne aqo laggee ne koyiyobaa akeekennan aggana danddayees.”—Siyaro.

 Geeshsha Maxaafaa maaraa: “Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo.”—1 Qoronttoosa 10:24.