Ha huuphe yohuwan

•  Aaway oottana koshshiyabay aybee?

•  Aawaappe koyettiyabaa dumma oottiyabay aybee?

•  Aawatanne eta macca naata

•  Aawata maaddiya zoriya

•   Naˈay yelettanaappe kase. Neeni haˈˈi azina gidada oottiyobay sinttappe aawa gidiyo wode oottanabaa qonccissees. Du Fazers Mater? giyo maxaafay hagaadan gees:

   “Shahaarida A keettaayiya koshshiyabaa shammiyo wode maaddiya, O aakime soo efiya, uluwan deˈiya naˈaa altrasawund giyo maashiniyan beˈiya woy wozanaa diddiqettaa siyiya aaway, naˈay yeletti simmin, ba keettaayeeranne ba naˈaara keehi matattana danddayees.”

   “Ta machchiya shahaara gidido wodiyan barkka attidabadan iyyo siyettanaadan koyabeenna gishshawu, tawu danddayettida keenan O maaddaas. Ubba, nuuni nu naˈaa kifiliyakka issippe giigissida. Nu naˈay yelettanaagaa naagiiddi issippe aattido wodee, nu naaˈˈawukka keehi dumma.”—Jemza.

   Geeshsha Maxaafaa maaraa: “Issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:4.

•   Naˈay yeletti simmin. Ne naˈaara kaaˈiyogaaninne idimmiyogan aara dabbotettaa minttana danddayaasa. Naˈaassi koshshiyabaa oottiyogan maadda. Neeni aawa gidada oottiyobay ne naˈaa dichchawu keehi maaddiyaba. Neeni ne naˈaara siiqettiyogee, ne A keehi nashshiyogaa bessees.

   “Ne naˈaakko duge ziqqi ga. Aara kaaˈa. A neekko shiishsha ekka. Kaassaa dosiya asa gida. Siiqiyogaabaa naati koyro tamaariyoy yelidaageetuppe gidiyogaa akeeka.”—Richarda.

   Geeshsha Maxaafaa maaraa: “Naati GODAAPPE imettiya imota; yeloti tumuppe woito.”—Mazamure 127:3.

•   Naˈay dicciyo wode. Issi issi xinaatee qonccissiyogaadan, bantta aawaara keehi siiqettiya naati timirttiyan gooba, darin unˈˈettokkona, qassi jallissiya xaliya goˈettiyonne danobaa oottiyo hanotaykka guutta. Ne naˈaara dabbotettaa minttanawu wodiya bazza.

   “Ta naˈay bana danddayidi sooppe kiyido wode A keehi laamottidabay nuuni kaamiya laaggidi haahosaa biyo wode woy kahuwa miyo wode haasayiyobaa gidiyogaa tawu yootiis. He wodetun taani ta naˈaara haasayido keehi maaddiya amaridabati, ta qoppabeenna wodiyan haasayidoogeeta. Hegaadan haasayana danddayidoy nuuni issippe daro wodiya aattido gishshataassa.”—Deenisa.

   Geeshsha Maxaafaa maaraa: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite . . . intte lo77o wodiyaa coo xaissoppite.”—Efisoona 5:15, 16.

 Issi issi wogatun, aawati deˈuwassi koshshiyabaa kunttiyageetanne bantta so asaa qohuwappe naagiyageeta, qassi aayoti so asaa siiqiyageetanne etawu qarettiyageeta giidi asay qoppees. (Zaarettido Wogaa 1:31; Isiyaasa 49:15) Issi issi so asawu he naaˈˈubatakka oottiyay issi ura gidana danddayees. Gidikkokka, eranchchati yootiyogaadan, aawaykka aayyiyakka bantta so asaa maaddiyo gita aawatettay deˈees. a

 So asaabaa xannaˈiya Judiz Walirsteno giyo eranchchiya, ha qofaa qonccissiya deˈuwan hanidabaa yootaasu. A hagaadan gaasu: “Tammanne naaˈˈu laytta gidido ta naˈiya kaamiya daafan qohettido wode, ambbulanssiya aaway laagganaadan koyaasu, ayssi giikko, hegaa mala wodiyan I aaway O naagana danddayiyogaa ammanettaasu. Guyyeppe A hosppitaaliya gela simmin, taani I hiixaa matan uttada kumetta gallassaa O minttettanaadan koyaasu.” b

 “Aawati so asay naagettidinne woppu giidi deˈanaadan maaddana danddayoosona; hegaa banttarkka oottiyogee aayotussi metiyaba gidana danddayees. Qassi aayyiya ba naati giyobaa qaretan ezggiyogan, siiqiyogaanne etawu qoppiyogaa bessawusu. Eti naˈˈay issippe oottoosona.”—Daaniyela.

 Geeshsha Maxaafaa maaraa: “Ta na7au, ne aawaa zoriyaa ezgga; ne aayyiyaa tamaarissiyoogaakka karoppa.”—Leemiso 1:8.

 Neeni aawa gidiyogaadan, ne naˈiya attuma asati O waati bonchchanaadan koyana bessiyakko tamaarissa. A hegaabaa, kaallidi deˈiya naaˈˈu ogetun tamaarana:

•   I aayyiyo neeni bonchchiyo ogiya akeekiyogan. Neeni ne keettaayyiyo bonchchiyonne siiqiyo wode, ne naˈiya sinttappe dooriyo azinawu ay mala eeshshay deˈana koshshiyakko akeekawusu.—1 PHeexiroosa 3:7

•   Neeni O waata bonchchiyakko akeekiyogan. Neeni ne naˈiyo bonchchiyogaa bessiyo wode, A bana bonchchanaadan tamaarissaasa. Qassi, A hara attumaageeti O waati bonchchanaadan koyanaakkokka tamaarissaasa.

   Shin, neeni ubba galla O boriyaba gidikko, A bana pattennabadan xeellananne O qohanawu cimmidi ikko shiiqiya hara attuma asatun nashettanawu koyana danddayawusu.

   “I aaway dosiyonne maaddiyo naˈiya, loˈˈo azina gidanawu koshshiya eeshshay baynna ura siiqana danddayuku.”—Wayna.