Aaway ba laappun laytta naˈaara haasayiiddi deˈiyaabadan qoppa. I, “Beni, beni Xoossay saˈaanne an deˈiya ubbabaa, qassi awa ayfiyaa, aginaanne xoolintteta medhdhiis” yaagees. Naˈay guuttaa qoppi ekkidi, “Abbaa, Xoossaa medhdhiday shin oonee?” giidi oychchees.

Aaway, “Xoossaa ooninne medhdhibeenna. I ubba wodekka deˈees” yaagidi zaarees. Ha qonccissoy naˈaa haˈˈissawu ammanttees. SHin I gitatiyo wode, he oyshaa zaarettidi qoppiyoogaa aggenna. He naˈay issi urawu doomettay deˈennan waanidi aggana danddayiyaakko akeekanawu metootees. Saluwawu saˈawukka doomettay deˈees. ‘Yaatin, Xoossaa medhdhiday oonee?’ giidi qoppees.

Geeshsha Maxaafaa zaaroy aybee? Leemisuwan qonccida aawaa zaaruwaa mala. Muusee hagaadan giidi xaafiis: “Godau, . . . dereti merettanaappe kase, woikko neeni sa7aa oottanaappe kase, merinaappe merinaa gakkanaayyookka neeni Xoossaa.” (Mazamure 90:1, 2) Hananabaa yootiya Isiyaasikka, “Erabeikkii? Siyabeikkii? GODAI merinaa Xoossaa; i biittaa ubbaakka medhdhidaagaa” yaagiis. (Isiyaasa 40:28) Hegaadankka, Yihudaa dabddaabiyan, Xoossaay ‘aadhdhida wode ubban’ deˈidaagaa gidiyoogee odettiis.—Yihudaa 25.

He xiqiseti, PHawuloosi abaa yootidoogaadan, Xoossay ‘merinaa Kawo’ gidiyoogaa bessoosona. (1 Ximootiyoosa 1:17) Hegaa giyoogee nuuni aadhdhida wodiyaa ay keena guyye xeellikkokka, Xoossay ubba wode deˈees giyoogaa. Qassi I sinttappekka muletoo deˈees. (Ajjuutaa 1:8) I Ubbabaa Danddayiya Xoossaa gidanaadan oottiday merinawu deˈana danddayiyoogaa.

Nuuni ha qofaa akeekanawu metootiyoy aybissee? Nu baree qantta gidiyoogee wodiyaa xeelliyo hanotay Yihoowaagaappe keehi dummatanaadan oottido gishshataassa. Xoossay merinawu deˈiyo gishshawu, issi shaˈu layttay awu issi gallassa mala. (2 PHeexiroosa 3:8) Leemisuwawu, mexi 50 gallassa xallaa deˈiya gumbburoy 70 woy 80 layttaa deˈiya nu bariyaa akeekana danddayii? Mule danddayenna! Hegaadan, medhdhida Gita Xoossaara geeddarssiyo wode nuunikka gumbburo mala gidiyoogaa Geeshsha Maxaafay yootees. Nu qofaykka A qofaappe keehi laafa. (Isiyaasa 40:22; 55:8, 9) Yaatiyo gishshawu, Yihoowaara gayttidaagan asay wurssi erennabay deˈiyoogee maalaalissiyaaba gidenna.

Xoossay merinawu deˈiyoogaa xeelliyaagan eranawu metootikkokka, hegee bessiya qofa gidiyoogaa akeekoos. Xoossaa medhdhida uri deˈiyaakko, he uri Medhdhidaagaa gidees. SHin Geeshsha Maxaafay ‘ubbabaa medhdhidaagee’ Yihoowa gidiyoogaa yootees. (Ajjuutaa 4:11) Qassi saloynne saˈay baynna wodee deˈiyoogaa eroos. (Doomettaabaa 1:1, 2) Yaatin awuppe yiidee? Hegaa Medhdhida uri kasetidi deˈana bessees. Xoossay ba Naˈaanne kiitanchchatu mala qoppi danddayiya hara ay meretaappekka kase deˈees. (Iyyooba 38:4, 7; Qolasiyaasa 1:15) I koyro barkka deˈiyoogee qoncce. I deˈiyoy merettidi gidenna; appe kaseti deˈidi, A medhdhana danddayiyay baawa.

Nu deˈana danddayidoogee, qassi saloynne saˈay ubbay deˈiyoogee merinaa Xoossay deˈiyoogawu markka. Aaho saluwaanne saˈaa medhdhidaagee, qassi hegawu higgiyaa kessida Xoossay ubba wode deˈiyaagaa gidana. Ubbawu deˈuwaa shemppi immidaagee A gidana.—Iyyooba 33:4.