Ba xalla siiqiyoogee asa coo ixxanaadan oottana danddayees. Ba xalla siiqiya uri bana xoqqu xoqqu oottees. I bana haratuppe aadhdhiyaabadan qoppees; qassi baappe dummatiya, guuxxiya asadan I xeelliyoogeetu bolli pirddees. Ooninne hegaadan qoppiyoogaa doommana danddayees. Insaykilooppiidiya Britaanika giyo maxaafay: “Daro [wogay] asay, bantta deˈuwaa hanotan, miyooban, maayiyooban, meeziyan, ammanuwan, xoqqu ootti xeelliyoobaaninne hegaa mala harabatun eti haratuppe aadhdhiyaabadan qoppoosona” yaagees. Nuuni hegaa mala bala qofaa waati aggana danddayiyoo?

“Issoi issuwaappe gitatais yaagidi qoppennan, issoi issuwaayyo intte huuphiyaa kaushshite.”—PILIPHPHISIYUUSA 2:3.

Ha xiqisiyaappe nuuni ay tamaariyoo? Bessiyaagaappe aaruwan nubaa xalla qoppiyoogaa aggidi, nuna ziqqi oottiyoogaa tamaarana koshshees. Nuuni nuna ziqqi oottiyoogee, harati nuuppe issi issiban aadhdhiyoogaa akeekanaadan maaddees. Ubbaa eeshshaaninne eran loˈˈo gidida citi baawa.

Istefana hanotaa beˈa. I hara biittaa asaa coo ixxiiddi  dicciis; shin guyyeppe asaa coo ixxiyoogaa aggiis. I hagaadan giis: “Coo ixxiyoogaa agganawu harati aadhdhoosona giidi qoppiyoogee keehi loˈˈo gidiyoogaa taani ammanays. Taani ubbabaa erikke. Ooppenne issi issibaa tamaarana danddayays.”

Nebaa bessiyaagaadan xeellanawu mala, qassi neeni mooruwaa oottiyoogaa ammana. Neeni issibaa oottana danddayiyoogaappe aaruwan harati oottana danddayiyoogaa akeeka. Issi citan deˈiya asa ubbay issi mala mooruwaa oottees gaada qoppoppa.

Issi citan deˈiya issi uraabaa iitabaa qoppiyoogaappe, nena hagaadan oychcha:

• ‘Taani ixxiyo he ura eeshshay tumukka iitee, woy he uray taappe dummatiyo gishshataassee?’

• ‘He uray taappe balabaa demmana danddayii?’

• ‘He uri taappe aaruwan oottana danddayiyoobati aybee?’

Ha oyshata neeni ammanettada zaarikko, asaa coo ixxiyoogaa aggana danddayiyoogaa xalla gidennan, he ura nashshiyoobaa demmanaakka danddayaasa.