CHii. Nuuni ubbatoo sooppe soo biidi sabbakoos, shin nuuni he oosuwaa oottido gishshawu atotettaa demmana giidi ammanokko. (Efisoona 2:8) Aybissi?

 Ha leemisuwaa akeeka: Issi keha bitanee I keerido gallassi issi sohuwaa yiida asawu ubbawu issi alˈˈo imota immanawu qaalaa gelidabadan qoppa. He bitanee qaalaa gelidobaa polanaagaa neeni tumuppe ammaniyaaba gidikko, A kaaletuwaa kaallikkii? Kaallanaagee aynne sirissenna! Ubba, ne laggetinne ne dabboti hegaappe goˈettanaadan etawu yootana danddayaasa. Gidoppe attin, neeni he imotaa demmiyoy he bitaniyaa kaaletuwaa kaallido gishshataassa gidenna. Neeni he imotaa demmiyoy he bitanee immanawu koyido gishshataassa.

 Hegaadankka, Xoossay Qaalaa gelido merinaa deˈoy awu azazettiya ubbatussa gidiyoogaa Yihoowa Markkati ammanoosona. (Roome 6:23) Xoossay qaalaa gelidobaappe harati goˈettanaadan qoppidi, nuuni ammaniyoobaa etawu yootoos. SHin nuuni haggaaziyo gishshawu atotettaa demmana giidi ammanokko. (Roome 1:17; 3:28) Tumuppe, ay asinne he maalaalissiya imotaa demissiyaabaa oottana danddayenna. “I ba maarotettaadankka, . . . nuna ashshidoogaappe attin, nuuni xillo oosuwaa oottidoogaana gidenna.”—Tiitu 3:5.