Baga’n an ngatanan nimo nga sangkay nagamit hin social media, ngan ito pirme an ira gin-iistoryahan. Bangin gintitinawaan ka nira tungod kay waray ka account. Ano an imo kinahanglan mahibaroan parte hito? Ngan ano an puydi mo buhaton?

 Diri ka nag-uusahan. Damu nga kag-anak an diri natugot ha ira mga anak nga gumamit hin social media. Bangin tungod kay maaram hira nga an paggamit hito konektado ha masunod:

•   depresyon ngan iba pa nga problema ha mental nga kahimsog.

•   pornograpiya, sexting, ngan cyberbullying.

•   diri pagkasinabtanay han magsarangkay.

 Damu nga batan-on an umundang ha paggamit hin social media. Nasabtan nira nga imbes nga makabulig an social media, damu an diri maopay nga epekto hito ha ira. Pansina an masunod nga mga eksperyensya:

•   Nasabtan ni Priscilla nga nauubos hito an iya panahon nga magagamit unta niya ha mas mapulsanon nga buruhaton.

•   Nadiri hi Jeremy nga may nagawas nga diri angayan nga mga kiritaon ha iya social media.

•   Nasabtan ni Bethany nga mas nagpupokus hiya ha mga ginbubuhat han iba ha social media.

 “Nalipay ako nga gin-delete ko an akon social media nga app. Waray gud ako magbasol, ngan nalilipay ako kay mas damu na an akon panahon ha mas importante nga butang.”—Sierra.

 “Nakakaadik an social media ngan usahay diri ako namumurayaw ha paghinunahuna ha reaksyon han iba ha akon mga post. Diri masayon para ha akon an pag-delete han akon account, pero maopay na la nga ginhimo ko ito. Mas murayaw na yana an akon hunahuna.”—Kate.

 Sugta an imo mga kag-anak. Ipakita ha ira nga mature ka na pinaagi ha pagsugot nga diri nag-iisog o nagrireklamo.

 Prinsipyo ha Biblia: “An lurong nagyayakan han bug-os niya nga kasina; kondi an tawo nga makinaadmananon nagpapaisol hini ngan nagpapahadong hini.”—Proberbios 29:11, An Baraan nga Kasuratan.

 Bangin sidngan ka han iba nga gumamit hin social media nga diri hinbabaroan han imo mga kag-anak o maghimo hin iba nga account basi diri ka makilal-an. Sayop gud ito! Kon bubuhaton mo ito, mababaraka ka la ngan makukonsensya. Magkakaproblema ka kon masabtan ito han imo mga kag-anak, ngan mawawara an ira pagtapod ha imo.

 Prinsipyo ha Biblia: “Karuyag namon gumawi hin tangkod ha ngatanan nga butang.”—Hebreo 13:18.

 Himoa ito nga personal nga desisyon. Pariho han mga batan-on nga gin-unabi, bangin may mahunahuna ka nga mga rason nga diri gumamit hin social media. Kon para ha imo may-ada diri maopay nga epekto an social media, ayaw ito gamita tungod la kay desisyon ito han imo mga kag-anak, kondi tungod kay imo ito desisyon. Salit kon pakianhan ka han imo mga igkasi-batan-on parte hito, diri ka maaawod—ngan posible nga diri ka na nira pagtinawaan.

 An punto: Sugta an imo mga kag-anak, ngan pag-istoryahi niyo hin maopay an parte ha social media. Hito nga paagi, an ira desisyon magigin imo personal nga desisyon. Bangin ha tiarabot, tugotan ka nga gumamit hin social media. Pero an importante, mabubuhi ka yana bisan waray social media.