Waray. Iginpapakita han pagkompara han kadaan nga mga manuskrito nga waray mabag-o an mensahe han Biblia bisan pa kon yinukot ka tuig na ito nga pauroutro nga ginkopya ha nadudunot nga mga materyales.

 Yinukot nga kadaan nga manuskrito han Biblia an nadiskobrehan. An pipira hini may mga kaibahan, nga nagpapakita nga may mga sayop an pagkopya hito. An kadam-an hini nga kaibahan gudtiay la ngan waray makabag-o ha kahulogan han mensahe. Pero may pipira nga dagku nga kaibahan nga nadiskobrehan, ngan an iba hini baga hin gintuyo basi bag-uhon an mensahe han Biblia. Kitaa an duha nga ehemplo:

1.   Ha 1 Juan 5:7, ini an mababasa ha pipira nga kadaan nga hubad han Biblia: “ha langit, an Amay, an Pulong, ngan an Espiritu Santo: ngan hira nga tulo uusa la.” Pero ginpapamatud-an han masasarigan nga mga manuskrito nga ini nga mga pulong diri makikita ha orihinal nga teksto. Igindugang la ini ha urhi. a Salit waray na ini ig-upod ha masasarigan ngan moderno nga mga hubad han Biblia.

2.   An personal nga ngaran han Dios mababasa hin yinukot ka beses ha kadaan nga mga manuskrito han Biblia. Pero ha damu nga hubad han Biblia, ginsaliwnan ito hin mga titulo sugad han “Ginoo” o “Dios.”

 Yana, damu na nga manuskrito an nadiskobrehan salit mas masayon na makita an mga sayop. b Ano an iginpapakita han pagkompara hini nga mga manuskrito may kalabotan ha pagin husto han Biblia yana?

•   Mahitungod han mga teksto han Hebreo nga Kasuratan (gintatawag liwat nga “Daan nga Tugon”), ini an iginkomento han eskolar nga hi William H. Green: “Baga hin masisiring gud nga waray na iba pa nga kadaan nga sinurat an naipasa hin husto gud.”

•   Mahitungod han Kristiano Griego nga Kasuratan, o “Bag-o nga Tugon,” ini an iginsurat han eskolar han Biblia nga hi F. F. Bruce: “Mas damu an ebidensya han mga sinurat han aton Bag-o nga Tugon kay han ebidensya han damu nga sinurat han mga awtor ha kadaan nga panahon, ngan waray gud bisan hin-o nga magkukwestyon han pagkamasasarigan hito.”

•   Hi Sir Frederic Kenyon, nga kilala nga eskolar han mga manuskrito han Biblia, nagsiring nga “mahimo kaptan [han usa] an bug-os nga Biblia nga diri nahahadlok o nag-aalang ha pagsiring nga ginkakaptan niya an tinuod nga Pulong han Dios, nga waray gud mabag-o bisan kon naipasa ito ha iba-iba nga henerasyon ha sulod han mga siglo.”

•   Gintipigan han Judio ngan Kristiano nga mga parakopya an mga asoy nga nagsusumat han seryoso nga mga sala han katawohan han Dios. c (Numeros 20:12; 2 Samuel 11:2-4; Galacia 2:11-14) Gintipigan liwat nira an mga asoy nga nagbubuhayhag han pagin diri masinugtanon han mga Judio ngan han mga doktrina nga hinimo han tawo. (Hosea 4:2; Malakias 2:8, 9; Mateo 23:8, 9; 1 Juan 5:21) Pinaagi han husto nga pagkopya hini nga mga asoy, iginpakita han mga parakopya nga masasarigan hira ngan daku an ira pagtahod ha sagrado nga Pulong han Dios.

•   Tungod kay gin-giyahan han Dios an pagsurat han Biblia, diri ba makatadunganon la hunahunaon nga sisiguruhon liwat niya nga diri mabag-o an mensahe hito? d (Isaias 40:8; 1 Pedro 1:24, 25) Katuyoan niya nga magpahimulos hito diri la an mga tawo ha kadaan nga panahon kondi pati kita yana. (1 Corinto 10:11) Ngani, “an ngatanan nga iginsurat hadto iginsurat ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.”​—Roma 15:4.

•   Hi Jesus ngan an iya mga sumurunod nagkotar tikang ha Hebreo nga Kasuratan ngan waray hira magruhaduha han pagin husto hiton kadaan nga mga sinurat.​—Lucas 4:16-21; Buhat 17:1-3.