An Biblia diri nagtututdo nga an kada tagsa ha aton may guardian angel o magbarantay nga anghel. Oo, makausa nagsiring hi Jesus: “Ayaw gud niyo pagtamaya an usa hini nga mga ubos [mga disipulo han Kristo], kay susumatan ko kamo nga an ira mga anghel ha langit pirme aadto ha atubangan han akon Amay ha langit.” (Mateo 18:10) Kondi, diri iginpapasabot ni Jesus nga an tagsa nga tawo may magbarantay nga anghel, lugod an karuyag sidngon la niya nga interesado an mga anghel ha tagsa han iya disipulo. Salit an tinuod nga mga magsiringba diri nagbubutang han ira kinabuhi ha peligro, nga naghuhunahuna nga puprotektaran hira han mga anghel han Dios.

Nagpapasabot ba ito nga diri ginbubuligan han mga anghel an mga tawo? Diri. (Salmos 91:11) May mga tawo nga natoo gud nga nagpapadara an Dios hin anghel basi protektaran ngan giyahan hira. Hi Kenneth, nga gin-unabi kanina, usa han mga natoo hito. Bisan kon diri kita sigurado hito, posible nga husto hiya. An mga Saksi ni Jehova agsob nga nakakakita hin mga ebidensya nga nabulig an mga anghel ha ira pagsangyaw nga buruhaton. Kondi tungod kay diri nakikita an mga anghel, diri kita makakasiguro kon tubtob ha ano nga sukol ginagamit hira han Dios ha pagbulig ha mga tawo ha magkalain-lain nga kahimtang. Bisan pa hito, angayan la nga pasalamatan an Makagarahum-ha-ngatanan tungod han anoman nga bulig nga iya igintatagana.—Colosas 3:15; Santiago 1:17, 18.