USA han damu nga mekanismo nga nakakabulig basi mabuhi an tawo amo an abilidad han lawas ha pagtambal han samad ngan pag-opay han nadaot nga tisyu. Nagtitikang dayon an proseso ha takna nga nasasamad an lawas.

Tagda ini: An proseso han pag-opay nagigin posible tungod han sunod-sunod ngan komplikado nga trabaho han mga selyula:

• An mga platelet nadukot ha mga tisyu ha palibot han samad, nagpuporma hin blood clot ngan nagtatabon ha nadaot nga mga blood vessel.

• An paghubag nagpapanalipod kontra ha impeksyon ngan nagkukuha han bisan ano nga “basura” nga resulta han kasamad.

• Ha sulod hin pipira ka adlaw, an lawas nagtitikang ha pagliwan han nadaot nga tisyu, pagtugkop han samad, ngan pag-opay han nadaot nga mga blood vessel.

• Ha urhi, nagkakaada ini ulat nga nag-aayad ngan nagpaparig-on han nadaot nga bahin han lawas.

Tikang ha proseso han blood clotting, an mga parasaliksik naghihimo hin mga plastik nga may-ada abilidad ha “pagtambal” han ira kalugaringon. Ito nga mga plastik may-ada duha nga gudtiay nga magkatugbang nga tubo nga may-ada duha nga kemikal nga “nagdudugo” kon nadadaot ito. Kon nagsasalakot an duha nga kemikal, nagigin gel ini nga napakadto ha nadaot nga bahin, ngan nagtatabon ha mga gipak ngan buho. Samtang nabubug-os an gel, nagigin matig-a ito nga substansya nga nabulig basi maibalik an orihinal nga karig-on han plastik. Usa nga parasaliksik an nagsiring nga ini nga sintetiko nga proseso han pagtambal nga gin-aadman pa yana “nagpapahinumdom” han proseso nga naeksister na ha palibot.

Ano ha imo panhunahuna? An abilidad ba han lawas ha pagtambal han samad produkto han ebolusyon, o may nagdisenyo hito?