• Determinado ka nga masustansya la an kaunon, pero an ice cream ha imo atubangan marasa gud pagkit-on.

• Nagdesisyon ka nga umundang ha pagsigarilyo, kondi an imo sangkay nga maaram nga karuyag mo na umundang naghatag ha imo hin sigarilyo.

• Nagplano ka nga mag-ehersisyo yana, pero bisan an pagkuha han imo sapatos ha kabinet baga hin daku nga buruhaton!

Ano an ginkakaparihoan hini nga mga sitwasyon? Iginpapakita hini nga an aton palibot—an aton kahimtang ngan mga nakakaupod—may daku nga impluwensya kon maglalampos kita ha pagkultibar han mag-opay nga rutina ngan ha pag-undang han magraot nga nahiaraan.

Ginsasagdonan kita han Biblia nga maghunahuna hin abanse. Kon bubuhaton naton ito, magigin mabinantayon kita ngan makakalikay ha mga sitwasyon nga mahimo magpaluya han aton determinasyon, ngan tungod hito maibubutang naton an aton kalugaringon ha mas mapulsanon nga sitwasyon. (2 Timoteo 2:22) Karuyag sidngon, sadang naton tagdon an aton palibot basi makabulig ito ha aton nga mabuhat an husto.

• Himoa nga mas makuri an pagbuhat han sayop. Pananglitan, kon karuyag mo nga diri na kumaon hin makakadaot ha imo kahimsog, ayaw pagbutang hito ha iyo kusina. Hito nga paagi, kon maghingyap ka ha sugad nga pagkaon, an pagpadara ha imo hingyap mas makuri kay ha diri pagpadara.

• Himoa nga mas masayon an pagbuhat han husto. Pananglitan, kon karuyag mo mag-ehersisyo ha aga, iandam na an imo isusul-ot antes kumaturog. Kon magigin masayon para ha imo an pagtikang han rutina, posible gud nga pirme mo na bubuhaton ito.

• Pilia hin maopay an imo kasangkayan tungod kay may tendensya kita nga magin pariho ha aton kaupod-upod. (1 Corinto 15:33) Salit ayaw pakig-upod ha mga nagbubuhat han mga butang nga karuyag mo ig-undang, kondi pakisangkay hadton mag-aaghat ha imo ha pagbuhat hin maopay nga rutina.