• Hambog an imo anak—ngan dyes anyos pa la hiya!

• Naglalaom hiya nga an tanan magtatagad ha iya sugad nga espesyal.

‘Kay ano nga nasugad hiya?’ nakagpakiana ka. ‘Karuyag ko magkaada hiya kompyansa ha kalugaringon, pero diri nga maghunahuna hiya nga mas labaw hiya ha iba!’

Posible ba matutdoan an bata nga magin mapainubsanon, kondi diri mawawara an iya kompyansa ha kalugaringon?

Hinin naglabay pa la nga mga dekada, gin-aaghat an mga kag-anak nga sundon an karuyag han ira anak; dayawon hira pirme bisan kon waray hira maopay nga ginbuhat; diri sawayon ngan disiplinahon. Gintotoohan nga kon papaabaton an bata nga espesyal hiya, madaku hiya nga may kompyansa ha kalugaringon. Kondi ano an resulta? An libro nga Generation Me nasiring: “Imbes nga magkaada kabataan nga nakakapahiuyon ngan malipayon, ito nga pamaagi nagresulta hin kabataan nga sobra an bilib ha kalugaringon.”

An kabataan nga pirme gindadayaw bisan kon waray hinungdan nadaku nga diri andam ha mga kasub-anan, pagsaway, ngan panalagsa nga kapakyasan. Tungod kay natutdoan nga magpokus ha ira mga karuyag, nakukurian hira magkaada marig-on nga pakigsangkay ha iba ha ira pagdaku. Sugad nga resulta, damu ha ira an nakakaeksperyensya hin kabaraka ngan depresyon.

An kabataan nagkakaada tinuod nga kompyansa ha kalugaringon diri pinaagi ha pirme pagsumat ha ira nga espesyal hira, kondi pinaagi han ira mag-opay nga nahihimo. Nagkikinahanglan ito hin labaw pa kay ha pagtoo la ha kalugaringon. Kinahanglan hira mahibaro, mag-aplikar, ngan magpauswag han ira mga abilidad. (Proberbios 22:29) Sadang liwat hira magin mahunahunaon ha panginahanglan han iba. (1 Corinto 10:24) Ini ngatanan nagkikinahanglan hin pagpaubos.

Paghatag hin kumendasyon kon angayan. Kon hitaas an iskor han imo anak ha eksamin, kumendasyuni hiya. Pero kon hamubo an iya grado, ayaw awtomatiko nga basola an iya titser. Diri gud ito makakabulig ha imo anak nga magin mapainubsanon. Lugod, buligi hiya nga makita kon paonan-o hiya mag-uuswag. Paghatag hin kumendasyon kon may nahimo gud hiya nga maopay.

Sawaya kon kinahanglan. Diri ini nagpapasabot nga sadang mo isgan an imo anak ha kada niya sayop. (Colosas 3:21) Kondi an seryoso nga mga sayop sadang tadungon. Ito liwat an angay buhaton may kalabotan ha sayop nga pamatasan. Kay kon diri, bangin mahiaraan niya ito.

Pananglitan, an imo anak nagpapakita hin tendensya ha paghambog. Kon diri hiya tatadungon, mahimo hiya magin mapahitas-on ngan waray makikigsangkay ha iya. Salit iesplikar ha iya nga an paghambog makakaraot ngan mahimo ito magin hinungdan nga maalohan hiya. (Proberbios 27:2) Isaysay liwat nga an tawo nga may husto nga panhunahuna ha kalugaringon diri kinahanglan manumat ha iba han iya mga abilidad. Pinaagi hin sugad nga mahigugmaon nga pagsaway, matututdoan mo hiya nga magin mapainubsanon nga diri nawawad-an hin respeto ha iya kalugaringon.—Prinsipyo ha Biblia: Mateo 23:12.

Iandam an imo anak ha reyalidad han kinabuhi. An paghatag han tanan nga karuyag han imo anak mahimo magresulta nga umabat hiya nga may katungod hiya magkaada han iya karuyag. Salit kon may karuyag an imo anak nga diri mo akos paliton, igsaysay ha iya kon kay ano nga kinahanglan gumasto la uyon ha badyet. Kon diri madadayon an iyo ginplano nga pamasyada o bakasyon, puydi mo isaysay nga parti ha kinabuhi an kapakyasan ngan puydi mo isumat kon paonan-o mo gin-aatubang an sugad nga sitwasyon. Imbes nga protektaran an imo anak ha tanan nga problema, ig-andam hiya ha mga pagsari nga iya aatubangon ha iya pagdaku.—Prinsipyo ha Biblia: Proberbios 29:21.

Tutdui hiya nga magin mahinatagon. Pamatud-i ha imo anak nga “mas makalilipay an paghatag kay ha pagkarawat.” (Buhat 20:35) Paonan-o? Puydi ka maghimo hin lista upod han imo anak kon hin-o an iyo kilala nga nagkikinahanglan hin bulig ha pagpamalit, transportasyon, o pag-ayad. Katapos, iupod hiya ha imo pagbulig ha ira. Ipakita ha imo anak an imo kalipay ngan kakontento ha pagbulig ha iba. Hito nga paagi, maitututdo mo ha imo anak an pagkamapainubsanon ha pinakaepektibo nga paagi—pinaagi han imo susbaranan.—Prinsipyo ha Biblia: Lucas 6:38.