Samtang nagkikita ka ha imo palibot, dungan nga nagtatrabaho an imo mata ngan utok ha pagkuha hin impormasyon. Pananglitan, han may nakita ka nga prutas, naghunahuna ka kon karuyag mo ba ito kaunon. Han hinangad ka ha langit, nakasiring ka nga diri mauran. Han nakita mo an mga letra han imo yana ginbabasa, nasabtan mo an kahulogan hito. Ha pagkatinuod, naaapektohan ka han kolor. Ngay-an? Paonan-o?

An kolor han prutas nga imo nakita nagsusumat nga hinog na an prutas ngan marasa kaunon. An kolor han langit ngan dampog nabulig ha imo nga hibaroan an kahimtang han panahon. An magkaiba nga kolor han mga letra ngan han papel nabulig ha imo nga mabasa ini nga artikulo. Diri mo man nasasantop, pero pirme mo ginagamit an kolor ha pag-analisar han mga impormasyon ha imo palibot. Diri la ito, nakakaapekto liwat an kolor ha imo emosyon.

Samtang naggugroseri ka, napapalibotan ka hin mga produkto nga may putos nga gindisenyo basi maruyagan mo. Nasasantop mo man ito o diri, ginpili hin maopay han mga negosyante kon ano nga kolor ngan kombinasyon hin mga kolor an maangay ha imo karuyag, sekso, ngan edad. Maaram liwat an mga artist ngan mga designer hin balay ngan hin bado han epekto han kolor ha emosyon.

Depende ha kultura ngan kustomre, iba-iba an interpretasyon han mga tawo ha kolor. Pananglitan para ha iba nga taga-Asia, an pula nagsisimbolo hin swerte ngan selebrasyon. Kondi ha iba nga bahin han Aprika, ito an kolor han pagminatay. Pero bisan pa han nahiaraan, may mga kolor nga pariho an epekto ha emosyon. Tagdon naton an tulo nga kolor ngan an epekto hito ha imo.

An PULA nga kolor masayon makita. Agsob nga iginkakaw-ing ito ha kusog, girra, ngan peligro. Nakakaapekto gud ito ha emosyon ngan mahimo magpalaksi han metabolismo ngan pagginhawa, ngan magpahitaas han presyon han dugo.

Ha Biblia, an Hebreo nga pulong para ha “pula” tikang ha pulong nga nangangahulogan hin “dugo.” Ginagamit ha Biblia an mahayag nga pula, o eskarlata, ha paghulagway han parapamatay nga puta nga nakasul-ot hin purpura ngan eskarlata nga bado ngan nakasakay ha “pula nga mapintas nga hayop nga puno hin nagpapasipara nga mga ngaran.”—Pahayag 17:1-6.

An BERDE diri pariho ha pula. Nakakapahinay ito han metabolismo ngan nakakapakalma. Nakakarelaks gihap ito ngan agsob ikaw-ing ha kahimyang. Narirelaks kita kon nakakakita kita hin berde nga mga tanom ngan kabungtoran. An rekord han Genesis ha paglarang nagsusumat nga an Dios nagtagana hin berde nga mga tanom para ha mga tawo.—Genesis 1:11, 12, 30.

An BUSAG agsob ikaw-ing ha kalamrag, katalwasan, ngan kalimpyo. Iginkakaw-ing liwat ito ha mga kalidad ha pagin maopay, pagin waray sala, ngan kaputli. Ito an kolor nga agsob hisgotan ha Biblia. Ha mga bisyon, an mga tawo ngan mga anghel nakabusag hin bado, nga nagpapabug-at ha katadongan ngan espirituwal nga kalimpyo. (Juan 20:12; Pahayag 3:4; 7:9, 13, 14) An busag nga mga kabayo nga may sakay nga nakasul-ot hin busag nga limpyo nga lino nagsisimbolo ha matadong nga  pakig-away. (Pahayag 19:14) Ginagamit han Dios an busag nga kolor basi pabug-atan nga andam hiya ha pagpasaylo ha mga sala: “Bisan kon an iyo mga sala masugad han eskarlata, hira magbubusag sugad han niebe.”—Isaias 1:18.

An paggamit han Biblia ha kolor nagpapakita nga maaram an Dios han epekto hito ha emosyon han tawo. Pananglitan, igintagna han libro han Pahayag ha Biblia an mahitatabo ha aton panahon, upod na an mga girra, gutom, ngan diri natural nga kamatayon tungod han kakulang hin pagkaon ngan epidemya. Basi mahinumdoman ini, iginpapakita ha aton ha usa nga bisyon an mga nakasakay ha mga kabayo—diri la ordinaryo nga mga kabayo kondi mga kabayo nga may kolor.

Siyahan, usa nga kabayo nga mabusag hinduro nga nagsisimbolo ha matadong nga pakiggirra ni Kristo Jesus. An sunod, usa nga kabayo nga pula an kolor nga nagrirepresentar hin girra ha butnga han mga nasud. Katapos, makikita an makangingirhat nga itom nga kabayo nga nagsisimbolo hin gutom. Pagkatapos, makikita an “kabayo nga duason, ngan an nasakay hito may ngaran nga Kamatayon.” (Pahayag 6:1-8) An kolor han tagsa hito nga kabayo nakakaapekto han aton emosyon uyon ha ginsisimbolohan han kabayo. Masayon naton mahinumdoman ini nga mga kabayo ngan an igintututdo hito may kalabotan ha aton panahon.

Damu an ehemplo ha Biblia ha paggamit hin kolor basi magin reyalistiko gud an mga paghulagway. Oo, may kaabtik gud nga gin-gamit ito han Maglalarang han kalamrag, kolor, ngan mata sugad nga bulig ha pagtutdo basi masayon masabtan ngan mahinumdoman han magbarasa an mga hulagway. An kolor nabulig ha aton ha pagkuha ngan ha pag-analisar hin impormasyon. Nakakaapekto ito han aton emosyon. Nakakabulig ito basi mahinumdoman naton an importante nga mga ideya. Oo, mahigugmaon nga regalo ito han Naglarang ha aton basi an aton kinabuhi magin malipayon.