Han Hulyo 2022, iginreport an waray kapariho nga kapaso ha iba-iba nga lugar ha kalibotan:

•   “An China nagpahamangno nga magkakaada ikaduha nga heatwave hini nga bulan ha haros 70 nga syudad.”—Hulyo 25, 2022, CNN Wire Service.

•   “Sunog ha mga kagurangan han Europe tungod han grabe nga kapaso nga resulta han heatwave.”—Hulyo 17, 2022, The Guardian.

•   “Han Domingo, damu nga syudad ha United States an nagkaada waray kapariho nga kapaso tungod han heat wave hini nga summer ha East Coast ngan ha mga bahin han South ngan Midwest.”—Hulyo 24, 2022, The New York Times.

 Ano an iginpapasabot hini ngatanan? Maabot ba an panahon nga imposible na nga may mabuhi dinhi ha tuna? Ano an ginsisiring han Biblia?

 Oo. An mga heat wave ha bug-os nga kalibotan upod ha mga igintagna han Biblia nga mahitatabo ha aton panahon. Pananglitan, nagtagna hi Jesus nga may makikita kita nga “makaharadlok nga mga kiritaon,” o “mga magpakalilisang.” (Lucas 21:11; An Baraan nga Kasuratan) Tungod han pagtikapaso ha bug-os nga kalibotan, damu an nahahadlok nga mabubungkag han mga tawo an tuna.

 Diri. Ginlarang han Dios an tuna basi magin permanente nga urukyan han mga tawo. (Salmo 115:16; Eclesiastes 1:4) Diri niya tutugotan an mga tawo nga bungkagon ito, lugod iya ‘bubungkagon an mga nagbubungkag han tuna,’ sugad han iya iginsaad.—Pahayag 11:18.

 Pansina an duha la nga tagna nga nagpapakita kon ano pa an iginsaad han Dios:

•   “An kamingawan ngan an uga nga tuna magrarayhak, ngan an disyerto nga kapatagan magkakalipay ngan mamumukad pariho han tanom nga safron.” (Isaias 35:1) Diri pababay-an han Dios nga an tuna magin disyerto nga diri mauukyan, lugod iya aaydon an nadaot nga mga lugar hito.

•   “Imo gin-aataman an tuna, ginhihimo ito nga mabungahon gud ngan matambok hinduro.” (Salmo 65:9) Pinaagi han bendisyon han Dios, magigin paraiso an tuna.

 Basi mahibaro hin dugang kon paonan-o an pagbag-o han klima katumanan han mga tagna han Biblia, basaha an artikulo nga “Climate Change at ang Kinabukasan Natin—Ano ang Sinasabi ng Bibliya?”

 Basi mahibaro hin dugang mahitungod han saad han Biblia nga aaydon an tuna, kitaa an artikulo nga “Sino ang Magliligtas sa Lupa?”