TE ʼU FEHUʼI ʼE FAI E TE KAU TUPULAGA
He Ko’e ’e Tonu Ke Au Faikole?
ʼI he sivi ne’e fai ʼi Amelika, ko te 80 ki te 100 ʼe faikole, kae gata pe ki toko 40 ki te 100 ia natou ʼaia ʼe natou faikole ʼi te ʼaho fuli. ʼIhi ʼi te kau tupulaga ʼaia ʼe natou feui’aki: ‘ʼE mole he ʼaoga ia ʼo te faikole pe’e toe ma’uhiga age tona aoga?’
Kotea te faikole?
Ko te faka’uhiga ’o te faikole ’e ko te faipalalau pea mo ia ’ae ne’e ina Fakatupu ia me’a fuli. Fakafuafua age mu’a ki te toe pilivilesio ʼaia. Ko Sehova ʼe ma’oluga ia aluʼaga fuli pe ʼi te tagata. Kae ʼe “mole mama’o ia tatou takitokotahi.” (Gaue 17:27) Koia ʼae ʼe fakaafe tatou ʼi te Tohi-Tapu: “Kotou fakaovi ki te ʼAtua, pea ʼe fakaovi atu anai kia koutou.”—Sakopo 4:8.
ʼE ke fakaovi feafea’i anai ki te ʼAtua?
ʼUluaki, ko te faikole, ʼe ke palalau anai ki te ʼAtua.
Lua, ko te ako ʼo te Tohi-Tapu, ʼe “palalau atu” te ʼAtua ʼaki tana folafola.
Ko te ʼu felogoi ʼaia, te faikole mo te ako ʼo te Tohi-Tapu ʼe tokoni atu anai ke malohi age takolua fakakaume’a mo te ʼAtua.
“Ko te palalau ʼae kia Sehova, ko he fealagia ʼi te ʼu pilivilesio lahi ʼae ʼe ma’u e te tagata.”—Jeremy.
“ʼI taku palalau kia Sehova ki te ʼu me’a ʼae ʼe au logo’i ʼi toku loto,ʼ e au fakaovi ai kia Sehova.”—Miranda.
ʼE fagono koa te ʼAtua ki te ʼu faikole?
Pe ’e ke tui mo faikole ki te ʼAtua, ʼe lagi faigata’a tau falala ʼe fagono mo’oni atu. Kae ʼe ui ʼi te Tohi-Tapu ko Sehova “e fakalogo ki te kole.” (Pesalemo 65:3) ʼE ina toe fakalotomalohi koe ke ke ‘tuku kia te ia ʼau tu’ania fuli.’ Kotea tona tupuʼaga ? He ‘’e tokaga ia kia koe.’—1 Petelo 5:7.
Kotea tau manatu?: ʼE ke to’o koa he temi ke ke palalau tu’uma’u ki ʼou kaume’a? ʼE feala tau fai feia mo te ʼAtua. Faikole tu’uma’u kia te ia, ʼo ke to’o tu’uma’u tona huafa ʼae ko Sehova. (Pesalemo 86:5-7; 88:10) ʼE ke ilo’i ko te Tohi-Tapu ʼe ina fakaafe koe ke ke “faikole tu’uma’u.”—1 Tesalonika 5:17.
“ʼI ʼaku faikole ʼe au felogoi ai mo taku Tamai ʼae ʼi selo, pea ʼi tamā faipalalau ʼaia, ʼe au fakaha ai kia te ia te ʼu me’a fuli ʼae ʼi toku loto.”—Moises.
“Ohage ko taku palalau ki taku fa’e pe’e ki toku kaume’a, ʼe mole au fufu he me’a moka ʼe au palalau mo Sehova.”—Karen.
ʼE au faikole anai kitea?
ʼE ui fenei ʼi te Tohi-Tapu: “ʼI te temi fuli ʼaki te faikole mo te kole mamahi pea mo te fakafetaʼi, kotou fakaha ki te ʼAtua ʼakotou kole.”—Filipe 4:6.
ʼE ko tona fakaʼuhiga koa ʼe feala ke ke palalau kia Sehova ki ʼou faigata’a’ia? ʼE feala ia. ʼE ui fakalelei mai ʼi te Tohi-Tapu: “Ke ke . . . tuku tou mauli [“kia Sehova,” NWT] pea e ina poupouki anai ia koe.”—Pesalemo 55:23.
ʼI te temi ʼae ʼe ke faikole ai ki te ʼAtua ʼe mole tonu ke ke talanoa pe ki ʼou faigata’aʼia. ʼE ui fenei te kiʼi finemui ko Chantelle: “Kapau ʼe ke faikole pe ki te ʼAtua ʼuhi ko ʼou faigata’a’ia pea ko takolua fakakaume’a ʼe mole mo’oni. ʼI taku manatu ʼe tonu mu’a ke au fai haku fakamalo kia Sehova pea ʼi te lisi ʼe ma’u ai anai te ʼu fakamalo ʼaia ʼe loaloaga anai.”
Kotea tau manatu?: ʼI tau metitasio ki tou ma’uli, kotea ʼae ʼe ke fakafetaʼi ai kia Sehova? ʼE ’i ai koa he ʼu aluʼaga ʼe tolu ʼe ina fakaloto’i koe ke ke fai hau fakamalo kia te ia ʼi te temi ʼaeni?
“Ohage ko hau sivisivi mo lelei’ia he fisiʼi teu, ko he aluʼaga ʼe ina uga anai tatou ke tou faikole mo fakamalo kia Sehova.”—Anita.
“Metitasio ki he koga ʼo te fakatupu ʼe fakatalakitupua kia koe pe’e ko he vaega ʼo te Tohi-Tapu ʼe lave loto, ʼe mahino papau ia ʼe ke fakamalo anai kia Sehova ʼi te faikole.”—Brian.