TONATOU MAʼULI
Neʼe Mole ʼi Ai Hoku ʼu Nima Kaʼe Neʼe Au Tali Te ʼu Moʼoni ʼo Te Tohi-Tapu
Ka maʼuli tuʼania te hahaʼi, ʼe natou fia kumi honatou tapikiʼaga. Neʼe mole au lava fai te faʼahi ʼaia koteʼuhi neʼe mole ʼi ai hoku ʼu nima. Neʼe au taʼu fitu ʼi te temi ʼae neʼe tuʼusi ai toku ʼu nima ke haofaki toku maʼuli.
Neʼe au tupu ʼi te taʼu 1960. Neʼe ko te taʼu 17 ʼaia ʼo taku faʼe. Neʼe liaki maua e taku tamai ʼi muʼa ʼo taku tupu. Neʼe ma maʼuʼuli tau faʼe mo ʼaku kui ʼi Burg, ko he kiʼi kolo ʼi te potu Esite ʼo Siamani. Tokolahi neʼe mole tui ʼe ʼi ai he ʼAtua pea neʼe toe maʼu e toku famili te faʼahiga manatu ʼaia. Neʼe mole he ʼaoga mai ʼo te ʼAtua kia matou.
ʼI taku kua lahi, neʼe au fiafia ʼuhi ko te tokaga ʼofa mai ʼo taku Kui Tagata. Neʼe lahi te ʼu gaue neʼe ina tuku mai ke au fai. Ohage la, neʼe ina ui mai ke au alu ʼo tuʼusi te ʼu vaʼa ʼakau. ʼI taku kei veliveli, neʼe au leleiʼia te fai ʼo te ʼu gaue ʼaia. Neʼe au maʼuli fiafia pea neʼe mole au tuʼania ki he meʼa.
NEʼE FETOGI TOKU MAʼULI ʼUHI KO TE TUʼUTAMAKI
ʼI te tahi ʼaho, neʼe ʼi ai he aluʼaga fakamataku neʼe hoko ʼi toku taʼu fitu. Neʼe ko te hoki taʼu lua pe ʼaia ʼo taku hu ʼo ako. ʼI taku liliu ki toku ʼapi, neʼe au kake ʼi he foʼi pou hila. ʼI taku kake ʼaia ia meta ʼe 8, neʼe ʼohofi au e te hila. ʼI taku ofo ake leva ʼi te lopitali, neʼe mole kei au logoʼi toku ʼu nima. Neʼe kua vela fuli ʼoku nima pea neʼe fakamataku ʼosi ʼoku lavea. Koia ʼae neʼe tuʼusi ai ʼoku nima lua ke mole mafola te mahaki ʼi toku sino. Kotou fakakaukauʼi age muʼa ki te lotomamahi ʼo taku faʼe pea mo ʼaku kui. Kaʼe, ʼi taku kei veliveli neʼe heʼeki au mahino ʼe feala anai ke malave ki toku maʼuli te aluʼaga ʼaia.
Hili taku mavae ʼi te lopitali, neʼe au toe alu ʼo ako. Neʼe fakakinakinaʼi au e te tamaliki, neʼe natou humuhumuki au pea mo li mai ni meʼa koteʼuhi neʼe mole feala ke au fai he meʼa moʼo haofaki au. Neʼe au lotomamahi ʼosi ʼuhi ko tanatou agakovi pea neʼe lave kovi ʼosi ʼanatou palalau. Ki muli age, neʼe ʼave leva au ki he Fale Ako Maʼa Te Kau Maʼimoa ʼe tuʼu ʼi Birkenwerder. Neʼe ko he fale ako nofo maʼa te ʼu fanau maʼimoa. Neʼe mole lahi te foʼi falā ʼo taku faʼe mo ʼaku kui ke olo age ai ʼo fakasiosio au koteʼuhi neʼe mamaʼo te fale ako ʼae neʼe au nofo ai. Neʼe au sio pe kia natou ʼi te ʼu temi malolō. Pea lolotoga taʼu ʼe hogofulu, neʼe mole au lahilahi ake ia tafa ʼo taku faʼe pea mo ʼaku kui.
NEʼE AU LAHILAHI AKE KAʼE MOLE KEI ʼI AI HOKU ʼU NIMA
Neʼe tonu ke au akoako ʼo fai he meʼa ʼaki taku fakaʼaogaʼi ʼoku vaʼe. ʼE feala koa hakotou fakakaukauʼi he tahi ʼe kai mo he huki peʼe ko he puna ʼaki ʼona kauʼi vaʼe? Neʼe au ako te fai ʼo te faʼahi ʼaia. Neʼe au toe ako te fakaʼaogaʼi ʼoku vaʼe ki te fufulu ʼoku nifo pea mo te helu ʼo toku ʼulu. Neʼe au toe kamata fai leva ni haka
ʼaki ʼoku vaʼe moka au palalau ki te hahaʼi. ʼEi, neʼe kua liliu ʼoku vaʼe ko toku ʼu nima.ʼI taku kei tupulaga, neʼe au fia lau te ʼu tohi science-fiction. ʼI ʼihi temi, neʼe au fakakaukauʼi hoku ʼu nima foʼou ʼe feala anai haku fai he meʼa pe. ʼI toku taʼu 14, neʼe au kamata suluka leva. Neʼe kua au falala pe kia au pea neʼe au hage pe ko te hahaʼi fuli. ʼE hage neʼe au ui fenei: ‘ ʼEi, ʼe toe feala pe foki la mo au ke au fai te faʼahi ʼaia, tatau aipe pe ʼe ʼi ai hoku ʼu nima peʼe kailoa.’
Neʼe au maʼumaʼua ʼi te ʼu gaue ʼe fai ʼi he kautahi neʼe au kau ai. Ko te kautahi ʼaia ʼe ko te Free German Youth (Jeunesse allemande libre) ʼae neʼe tokoni ki ai te puleʼaga. Pea neʼe ko au te sikalaipe, neʼe ko he tuʼulaga maʼuhiga. Neʼe au toe kau ki he kau hiva, mo ako ni palalau fakatuketuke pea mo kau ki te ʼu faigaoʼi ʼa te hahaʼi maʼimoa. Hili pe he ako gaue neʼe au kau ai, neʼe au kamata gaue leva ʼi he matani gaue ʼo te kolo. ʼI taku lahilahi ake, neʼe au ʼai tuʼumaʼu pe ʼoku foʼi nima neʼe faʼu koteʼuhi neʼe au fia hage ko te tagata fuli.
NEʼE AU TALI TE ʼU MOʼONI ʼO TE TOHI-TAPU
ʼI te tahi ʼaho, ʼi taku fakatalitali ki te saliote afi ʼae ke au alu ai ki taku gaue, neʼe fakaovi mai he tagata kia au. Neʼe ina fehuʼi mai pe ʼe feala anai ki te ʼAtua hana toe foaki mai toku ʼu nima. Neʼe mole au iloʼi pe kotea taku tali. ʼE moʼoni neʼe au toe fia maʼu toku ʼu nima kaʼe neʼe hage kia au ʼe mole feala anai ia. Kaʼe, neʼe au tui papau ʼe mole ʼi ai he ʼAtua. Talu mai te ʼaho ʼaia, neʼe au faiga ke mole au toe felaveʼi mo te tagata ʼaia.
Hili ki ai he temi, neʼe fakaafe au e hoku kaugā gaue ke ma olo ʼo fakasiosio tona famili. Lolotoga tamatou faiinu kafe, neʼe kamata palalau mai ʼana matuʼa ki te ʼAtua, ia Sehova ʼAtua. Neʼe ko taku hoki logo ʼaia ki te huafa ʼo te ʼAtua. (Pesalemo 83:19) Kaʼe, neʼe au feʼuiʼaki fenei: ‘ ʼE mole ʼi ai he ʼAtua, tatau aipe pe kotea tona higoa. ʼE au fakaha anai ki te hahaʼi ʼaia ʼe hala ʼanatou manatu.’ ʼI taku falala pe kia au, neʼe au tali leva ke matou faipalalau ki te Tohi-Tapu. Kaʼe, neʼe au punamaʼuli he neʼe mole au lava fakamoʼoni te manatu ʼae ko te ʼAtua ʼe mole maʼuli moʼoni.
ʼI taku vakavakaʼi leva te ʼu lea fakapolofeta ʼo te Tohi-Tapu, neʼe au fetogi mamalie taku manatu ʼo ʼuhiga mo te ʼAtua. Neʼe lahi te ʼu lea fakapolofeta ʼa te ʼAtua neʼe hoko moʼoni, tatau aipe pe neʼe tohi ʼi ni lauʼi taʼu ʼe teau peʼe afe ki muʼa atu. ʼI tamatou tahi faipalalau ki te Tohi-Tapu, neʼe matou fakatatau ai te ʼu aluʼaga ʼae ʼe hoko ʼi te malama ʼaeni mo te ʼu lea fakapolofeta ʼae ʼe tuʼu ʼi te kapite 24 ʼo Mateo, mo te kapite 21 ʼo Luka pea mo te kapite 3 ʼo 2 Timoteo. Ohage pe he toketa ʼe ina vakavakaʼi lelei te ʼu faʼahi ʼe feala ai hana iloʼi te mahaki ʼo he tahi. ʼO toe feia pe, neʼe tokoni mai ki au te ʼu aluʼaga ʼae neʼe talanoa ki ai te ʼu lea fakapolofeta ke au iloʼi ʼe tou maʼuʼuli nei ʼi te ʼu “aho fakamuli,” ohage pe ko tona ui ʼi te Tohi-Tapu. * Neʼe au punamaʼuli ʼosi au. Neʼe au sio ki te hoko moʼoni ʼo te ʼu lea fakapolofeta ʼaia.
Neʼe au tui papau ko te moʼoni ʼae neʼe au ako. Neʼe au faikole kia Sehova ʼAtua pea neʼe au taʼofi taku suluka, logo la neʼe au suluka lolotoga ni taʼu ʼe hogofulu tupu. Neʼe hoko atu taku ako te Tohi-Tapu lolotoga he taʼu katoa. ʼI te ʼaho 27 ʼo Apelili 1986, neʼe au
papitema fakafufu ʼi te fale maʼanu, koteʼuhi ʼi te temi ʼaia neʼe tapuʼi te gaue ʼa te kau Fakamoʼoni ʼa Sehova ʼi te potu Esite ʼo Siamani.NEʼE AU TOKONI KI ʼIHI
Neʼe hoki matou felaveʼi moka matou fakatahitahi ʼi te ʼu kiʼi kutuga pea neʼe hahaʼi te ʼu tehina mo tuagaʼane ʼae neʼe mole au iloʼi. Kotea tona tupuʼaga? Koteʼuhi neʼe tapuʼi tamatou gaue. Kaʼe, neʼe fakagafua e te puleʼaga ke au folau ki te potu Esite ʼo Siamani, ʼae ʼe mole tapuʼi ai te gaue ʼa te kau Fakamoʼoni ʼa Sehova. Neʼe ko taku hoki kau ʼae ki te ʼu fakatahi lalahi pea mo sio ki ʼoku tehina mo tuagaʼane ʼe toko lauʼi afe. Neʼe makehe kia au te aluʼaga ʼaia.
Hili pe te maumauʼi ʼo te kaupa ʼo Berlin, neʼe mole kei tapuʼi te gaue ʼa te kau Fakamoʼoni ʼa Sehova. Ki muli age, neʼe feala leva tamatou tauhi ʼateaina kia Sehova ʼAtua. Neʼe au fia fakalahi age taku kau ki te gaue faifakamafola. Kaʼe, neʼe mole au fia faipalalau mo te kau matapule. ʼI taku manatu, ʼe mole au lava fai he gaue ʼuhi he ʼe au maʼimoa pea neʼe lahi te temi ʼae neʼe au nofo ai ʼi te nofoʼaga ʼa te kau maʼimoa. Kaʼe ʼi te taʼu 1992, neʼe au faiga ke au faifakamafola ia hola ʼe 60 ʼi he mahina ʼe tahi. Neʼe au fiafia he neʼe au lava fakahoko. Koia, neʼe au fakatotonu ai ke au fai te faʼahi ʼaia ʼi te mahina fuli pea neʼe au faiga ke au fakahoko lolotoga taʼu ʼe tolu.
Neʼe au taupau maʼu te ʼu palalau ʼaeni ʼi te Tohi-Tapu: “Kapau e gaegae he tahi, e au logoi foki he gaegae?” (2 Kolinito 11:29) Logo la toku maʼimoa, neʼe kei au maʼu pe te fealagia ʼo te fakakaukau mo te palalau. Koia, neʼe au faigaʼi ke au fai te meʼa ʼae ʼe au lavaʼi moʼo tokoni ki ʼihi. ʼI te mole kei ʼi ʼai ʼae hoku ʼu nima, neʼe feala ai ke au lotomahino kia natou ʼae ʼe maʼimoa. ʼE au iloʼi pe kotea ʼae ʼe logoʼi e he tahi ʼe fia faimamahi ki he meʼa kaʼe mole ina fealagia. ʼE au faiga ke au fakalotomalohiʼi ia natou ʼae ʼe manatu feia. ʼE au logoʼi toku fiafia ʼi taku tokoni ki ʼihi.
NEʼE TOKONI MAI IA SEHOVA KIA AU ʼI TE ʼAHO FULI
ʼE moʼoni, ʼi ʼihi temi ʼe au lotovaivai ai. Neʼe au loto ke au hage ko te tagata fuli pe. ʼE feala pe taku fai te ʼu gaue ʼo te ʼaho fuli kaʼe ʼe ʼaoga lahi ki ai he temi, mo ni faiga pea mo he malohi. ʼE au ui tuʼumaʼu te ʼu palalau ʼaeni ʼi te ʼaho fuli: “E au fealagia te u mea fuli * i ae e ina fakamalohii au.” (Filipe 4:13) ʼI te ʼaho fuli, ʼe foaki mai e Sehova te malohi ʼae ʼe ʼaoga ki te fakahoko ʼaku gaue ʼae ʼi te ʼaho fuli. Neʼe au ako ko Sehova ʼe tokoni tuʼumaʼu mai pe. Koia ʼae neʼe mole au fakagata ai taku tauhi kia te ia.
Neʼe tapuakinaʼi au e Sehova ʼaki tana foaki mai hoku kiʼi famili. Neʼe ko he faʼahi neʼe mole au maʼu ʼi taku kei veliveli mo taku kei tupulaga. Neʼe au maʼu hoku ʼohoana finemui, ko Elke. Ko he fafine manavaʼofa pea mo agalelei. Pea tahi, neʼe liliu te toko miliona kau Fakamoʼoni ʼa Sehova ko ʼoku tehina mo tuagaʼane. Neʼe au kau ki te foʼi famili ʼaia.
Neʼe au toe maʼu he fakalotofimalie ʼi te fakapapau ʼa te ʼAtua ʼo ʼuhiga mo te Palatiso, ʼae ʼe ina “fakafoou [anai] te u mea fuli,” ʼo kau ai toku ʼu nima. (Apokalipisi 21:5) Neʼe au mahino lelei age ki te fakapapau ʼaia ʼi taku fakakaukauʼi te ʼu gaue neʼe fai e Sesu ʼi tana ʼi te kele. Neʼe fakamalolo e Sesu ʼi te moʼi temi pe ʼaia he tagata nima mate pea neʼe ina toe fakamalolo he tahi neʼe tuʼusi tona taliga. (Mateo 12:13; Luka 22:50, 51) Neʼe au falala ʼe kua au vave liliu anai ohage pe ko te tagata fuli ʼuhi ko te ʼu fakapapau ʼa Sehova pea mo te ʼu milakulo ʼa Sesu.
Kaʼe, ko te tapuakina lahi ʼae neʼe au maʼu ʼe ko taku iloʼi ia Sehova ʼAtua. Neʼe liliu ko taku tamai, mo toku kaumeʼa, mo toku nonoʼaga pea mo toku malohi. Neʼe au hage ko te Hau ko Tavite, ʼae neʼe ina tohi fenei: “Ko [Sehova] ko toku malohi . . . nee ina fakamauli au; koia e fiafia lahi osi toku loto.” (Pesalemo 28:7) Neʼe au fia taupau te ʼu moʼoni taulekaleka ʼaia ʼi toku maʼuli. Neʼe au tali te moʼoni logo la neʼe mole ʼi ai hoku ʼu nima.
[ʼU Nota]
^ pal. 17 Ki te tahi age ʼu fakamahino ʼo ʼuhiga mo te fakailoga ʼo te ʼu ʼaho fakamuli, vakaʼi te kapite 9, “ ʼE Tou Māʼuʼuli Koa ʼi “Te ʼu ʼAho Fakamuli”?” ʼi te tohi Koteā ’Aē ’e Ako’i Mo’oni Mai ’i Te Tohi-Tapu? Neʼe ta e te kau Fakamoʼoni ʼa Sehova pea ʼe maʼu ʼi te Neti www.mr1310.com/wls.
^ pal. 24 Ko matou ʼae neʼe matou fakailoga keheʼi.