Ko He Tahi ʼe Tou ʼOʼofa Ai ʼe Kua Vave Mate
NEʼE punamaʼuli ia Doreen ʼi tana iloʼi ʼae ʼe kau tona ʼohoana ko Wesley ʼi te kosea ʼo te ʼulu, kaʼe neʼe kei taʼu 54 pe. * Neʼe ui age e te toketa ʼe kei toe pe ʼona kiʼi mahina ke maʼuli ai. ʼE ina ui fenei: “Neʼe mole au faʼa tui ki ai. Neʼe au lotomamahi ʼosi ʼi ni vahaʼa. Kia au neʼe tonu ia ke hoko ki ʼihi kaʼe mole kia matou. Neʼe heʼeki au teuteu ki te faʼahi ʼaia.”
Ko te aluʼaga ʼae neʼe tau mo Doreen ʼe feala ke hoko kia tatou fuli ʼi he temi pe. Ko te tokolahi ʼe natou lotolelei ke natou tokakaga ki he tahi ʼe natou ʼoʼofa mamahi ai, ʼe mahaki kovi pea kua vave mate. Kaʼe, ʼe ko he aluʼaga ʼe faigataʼa. Kotea ʼae ʼe lava fai e he tahi ʼo te famili moka tokaga ki he tahi ʼe mahaki kovi? ʼE ina lava katakiʼi feafeaʼi te ʼu tuʼania ʼae ʼe feala ke hoko ai? Kotea te ʼu aluʼaga ʼe tou fakatalitali ki ai moka kua tugaki mate? Tou vakaʼi muʼa pe koʼe ʼe faigataʼa ia ʼaho nei te tokaga kia natou ʼae kua vave mamate.
KO HE FIHIFIHIA ʼE HOKO IA ʼAHO NEI
Ia ʼaho nei, kua fetogi te manatu ʼa te kau toketa ʼo ʼuhiga mo he tahi ka mate. Kua hili taʼu ʼe teau pe ʼe laka atu, neʼe mole maʼuʼuli fualoa te hahaʼi, maʼia mo te ʼu fenua koloaʼia. Neʼe mamate vave te hahaʼi ʼuhi ko te ʼu mahaki ʼae neʼe pikisia gafua peʼe ko te ʼu fai fakaʼi. Pea neʼe fakatuʼakoi pe ia natou ʼae neʼe ʼave ki te ʼu lopitali. Kaʼe, ko te tokolahi neʼe taupau pe e ʼonatou famili ʼo natou mamate ai ʼi ʼonatou loto fale.
Ia ʼaho nei, ʼi te kua laka ki muʼa ʼo te poto fakatoketa, ʼe kua feala hanatou fai ni puleʼaki moʼo fakatologa te maʼuli ʼo he tahi. Ko te ʼu mahaki ʼae neʼe feala ke mate vave ai he tahi ki muʼa atu, ʼe kua feala ia ʼaho nei ke tauʼi ke fakaloaloaga atu te maʼuli. Kaʼe, ʼe mole fakaʼuhiga leva kua maʼu he faitoʼo ki ai. Pea ko natou ʼae ʼe kovi tonatou mahaki ʼe maʼua ke taupau natou e he tahi ʼuhi he ʼe mole kei feala hanatou tokakaga kia natou totonu. ʼE mahino ia, ʼe ko he aluʼaga ʼe faigataʼa ʼaupito.
Koia, kua kaugā malie ai ia natou ʼae ʼe mamate ʼi te ʼu lopitali kaʼe mole ʼi ʼonatou loto fale. Ia ʼaho nei, tokolahi ʼe mole natou iloʼi peʼe feafeaʼi te agaaga ʼo he tahi ʼe lolotoga mate. Pea ʼe ko he tokosiʼi pe ʼe natou sisio tonu ki ai. Koia, ko te tupuʼaga la ʼaia ʼo te mole fia tokaga ʼa he tahi ʼo te famili kia ia ʼae ʼe mahaki. Kotea te tokoni ʼae ʼe ʼaoga atu?
HE ʼU FAKATUʼUTUʼU FAKATOMUʼA
Ohage ko te aluʼaga ʼae ʼo Doreen, tokolahi ʼe natou lotomamahi ʼaupito moka ʼe mahaki kovi he tahi ʼe natou ʼoʼofa mamahi ai. Kaʼe kotea te tokoni ʼae ʼe ʼaoga atu, ke kotou nonofo teuteu ai ki te ʼu aluʼaga ʼae ka hoko? Neʼe faikole fenei he kaugana agatonu ʼa te ʼAtua: “Akoi matou ke matou iloi te lau o omatou aho, o tupu ke matou mau he loto ae e poto.” (Pesalemo 90:12) ʼEi, tou faikole fakamalotoloto kia Sehova ʼAtua. Kotea tona tupuʼaga? He ʼe tokoni mai anai ke tou ‘lau fakapotopoto ʼotatou ʼaho’ ke feala hatatou fakaʼaogaʼi lelei mo ia ʼae ʼe tou ʼoʼofa mamahi ai te ʼu kiʼi ʼaho ʼae ʼe kei toe.
Koia, ʼe tonu ai ke tou fai he fakatuʼutuʼu lelei. Kapau ʼe kei lava palalau ia ia ʼae ʼe mahaki, ʼe ko he aga fakapopoto hakotou fehuʼi age ki ai pe kotea tana manatu, ʼo ʼuhiga mo te ʼu tonu ʼae ka toʼo moka ʼe kovi tona mahaki pea ko ai ʼae ka ina fai. Kotou felogoʼi fakahagatonu mo ia ʼo ʼuhiga mo tana takoto ʼi te lopitali peʼe ko te ʼu faitoʼo ʼae ʼe fai anai ki ai. ʼE mole hoko ai anai he ʼu femahinohalaʼaki mo he ʼu tuʼania ʼi te famili. Pea tahi, ʼe feala ai ki te famili ke natou iloʼi pe ʼe feafeaʼi hanatou tokakaga kia ia lolotoga tona mahaki. Koia, ʼe ui fenei ʼi te Tohi-Tapu: “E mole hoko te u fakatuutuu, o tupu ko te masiva fakakaukau.”—Taaga Lea 15:22.
ʼE FEAFEAʼI HATATOU TOKONI KIA IA ʼAE ʼE MAHAKI?
ʼI te agamahani, ko te gaue tafito ʼae ka fai ʼe ia ʼae ʼe taupau mahaki ʼe ko te foaki age ki ai te ʼu meʼa ʼae ʼe ʼaoga. ʼE tonu ke logoʼi ʼe ia ʼae ʼe kua vave mate ʼe mole tokotahi pea ʼe ʼofainaʼi.Koia, kotou lautohi peʼe kotou hiva pea mo ia. Kotou filifili te ʼu tohi pea mo te ʼu hiva ʼae ʼe ina leleiʼia pea mo fakalotomalohi. Tokolahi ʼe natou fiafia moka ʼe puke tonatou nima ʼe he tahi ʼo te famili pea mo palalau fakapelepele ki ai.
ʼE feala pe ke natou iloʼi pe ko ai te kau fakasiosio mahaki. He ʼe ui fenei ʼi te ʼu sivi neʼe fai: “ ʼI te ʼu logoʼaga sino ʼe nima, ko ʼihi ʼe puli vave ohage ko te sio, te mamanu, te fafa pea mo te ʼahiʼahi. Kaʼe, ko te logoʼaga sino ʼae ko te logo ʼe tologa. ʼE feala pe kia ia ʼae ʼe moe ke logo lelei mai. Koia, ʼaua naʼa kotou fai he ʼu palalau ʼe mole kotou fai anai ki ai moka ʼe ala.”
2 Kolonito 1:8-11) Koia, ʼe maʼuhiga ke tou faikole fakamalotoloto moka tou tau mo he mahaki ʼe kovi ʼaupito pea mo fakatuʼania fau.
Kapau ʼe feala, kotou faikole fakatahi mo ia. ʼE ui ʼi te Tohi-Tapu, ʼi te tahi ʼaho neʼe faigataʼa ʼaupito te ʼu aluʼaga neʼe tau mo te apositolo ko Paulo pea mo ʼona tehina. Pea neʼe feala ke tuʼutamakiʼia ai ʼonatou maʼuli. Neʼe natou kumi tokoni kifea? Neʼe kole mamahi fenei e Paulo ki ʼona kaumeʼa: “Mo koutou foki ʼe feala ke kotou tokoni mai kia matou ʼaki ʼakotou kole mamahi.”(TOU TALI TE ALUʼAGA ʼAE ʼE HOKO
Ko te mate ʼo he tahi ʼe tou ʼoʼofa mamahi ai ʼe ko he aluʼaga fakalotomamahi. ʼE mole tou punamaʼuli ki te faʼahi ʼaia, koteʼuhi ko te mate neʼe mole ko he fakatuʼutuʼu ʼa te ʼAtua. Neʼe mole fakatupu tatou ke tou mamate. (Loma 5:12) ʼE ui ʼi te Folafola ʼa te ’Atua ko te mate ʼe ko he “fili.” (1 Kolonito 15:26) Koia, ʼe mole tou loto ai ke mate he tahi ʼe tou ʼoʼofa mamahi ai.
Kaʼe, ʼe lelei ke tou fakakaukauʼi te ʼu aluʼaga ʼae ʼe feala anai ke hoko ki ʼamuli. Kotea tona tupuʼaga? He ʼe tokoni anai ki te famili ke siʼisiʼi ʼanatou tuʼania pea ke natou tokakaga tafito ki te ʼu meʼa ʼae ʼe ʼaoga. ʼE ʼi ai ʼihi aluʼaga ʼe feala ke hoko ʼe ke maʼu anai ʼi te fakamatala ʼae ʼi te ʼa takai “ Te ʼu Kiʼi Vahaʼa Fakaʼosi ʼo Tona Maʼuli.” ʼE mahino ia, ʼe mole hoko anai te ʼu aluʼaga fuli ʼaia kia natou ʼae ʼe mahahaki. Kaʼe, tokolahi ia natou ʼe tau mo te ʼu aluʼaga ʼaia.
Hili te mate ʼo he tahi neʼe tou ʼoʼofa mamahi ai, ʼe lagi lelei ke tou pauʼi hotatou kaumeʼa lelei neʼe ina fakatuʼutuʼu ke tokoni mai. ʼE lagi ʼaoga anai ki te famili pea mo natou ʼae neʼe tokakaga ki ai ke fakalotofimalieʼi ʼuhi ko te mamahi ʼae neʼe tau mo natou. ʼE mahino ia, ʼe mole kei mamahi ia ia ʼae kua mate. He ʼe ui fenei mai e totatou Tupuʼaga ʼofa: “E mole iloi he mea e natou ae kua mate.”—Ekelesiasi 9:5.
IA IA ʼAE ʼE TOKONI KIA TATOU
ʼE ʼaoga tafito kia tatou te tokoni ʼa te ʼAtua moka kua vave mate he tahi ʼo te famili pea mo te temi ʼae ʼi te hili ʼo tona mate. ʼE feala ke ina fakaʼaogaʼi niʼihi moʼo tokoni kia tatou. ʼE ui fenei e Doreen: “Neʼe au ako ke mole au fakafisi ki he tokoni ʼa he tahi. ʼI tona fakahagatonu, neʼe lahi te ʼu tokoni neʼe mā maʼu pea neʼe malave ʼosi kia maua. Neʼe mā iloʼi taumatuʼa neʼe hage pe neʼe ui fenei mai e Sehova: ‘ ʼE au nofo ʼi ʼokolua tafa ʼo tokoni atu ke kolua faʼa kataki.’ ʼE mole au galoʼi anai ʼi he temi te tokoni ʼaia.”
ʼEi, ko Sehova ʼAtua ʼe ko ia tokotahi pe ʼe feala ke tokoni mai. ʼE lotomahino ki ʼotatou mamahi he ʼe ko ia totatou Tupuʼaga. ʼE lava tokoni mai pea mo fakalotomalohiʼi tatou ke tou faʼa kataki. Pea tahi, neʼe ina fakapapau ʼe kua ina vave pulihi te mate ʼo talu ai pea ʼe ina fakatuʼuake anai te toko lauʼi afe hahaʼi ʼae kua mamate. (Soane 5:28, 29; Fakaha 21:3, 4) Pea ʼe feala ke tou fai fuli te ʼu palalau ʼaeni ʼa te apositolo ko Paulo: “Mate, ʼe ʼifea tau malo? Mate, ʼe ʼifea tou kafokona?”—1 Kolonito 15:55.
^ pal. 2 Neʼe fetogi te ’u higoa