Maro olo mijaly mare mitady valiny fan̈ontanian̈a io fa mbala tsy nahafapô iro valiny fan̈ontanian̈a nazondro. Maro koa olo mahita olo mampijaly olo, ke sarotro amindro hino Zan̈ahary.

Hevitry diso: Tsy mety man̈ontany Zan̈ahary nan̈ino izy nan̈ambela olo hamono olo koroabe.

 Ny marin̈y: Nisy panompony Zan̈ahary nan̈ontany izy nan̈ino tsy adosony raha ratsy. Ohatra, karaha ty fan̈ontanian̈any Habakoka tamy Zan̈ahary: “Nan̈ino ma zaho ambelanao mahita olo pandrava ndreky kafiry? Avio nan̈ino koa misy olo mankany ndreky miady fo amy tany jiaby?” (Habakoka 1:3) Zan̈ahary tsy nasiaka Habakoka foeky. Nata fan̈ontanian̈anany io nirahiny nisoratin̈y amy Baiboly ao, hivakinolo jiaby.

Hevitry diso: Zan̈ahary tsy mijery jalinolo.

 Ny marin̈y: Zan̈ahary tsy tia olo ratsy fan̈ahy ndreky jaly baka amy raha ataondro io. (Ohabolana 6:16-19) Karaha ataony tamy faha Noa, Zan̈ahary ‘nalahelo’ fotony feno olo ratsy fan̈ahy tambony tany teto. (Genesisy 6:5, 6) Dikanizen̈y, ten̈a mampalahelo Zan̈ahary koa mahita olo mamono olo koroabe io.​—Malakia 3:6.

Hevitry diso: Famonoan̈a olo koroabe io sazindro Jiosy aby io baka amy Zan̈ahary.

 Ny marin̈y: Jerosalema nambelany Zan̈ahary niravan̈iny Romanin̈y, tamy taonjato voanalohany. (Matio 23:37–24:2) Fa komansy tamy zen̈y, tsiary nisy karazan̈olo tiany Zan̈ahary mare ndreky nisaziny zen̈y. Amy Zan̈ahary, ‘mitovy fo Jiosy ndreky tsy Jiosy.’​—Romanina 10:12.

Hevitry diso: Zan̈ahary koa tia olo ndreky farany mahery, tokony nisakanany famonoan̈a olo marobe in̈y.

 Ny marin̈y: Jaly io tsy baka amy Zan̈ahary zen̈y foeky, fa ndraikindraiky fo izio ambelany misy.​—Jakoba 1:13; 5:11.

 Mira antony mahavy Zan̈ahary man̈ambela jaly jiaby hisy fo antony mahavy izy tsy nisakana famonoan̈ao olo marobe aby io. Antonizio, baka handaminan̈a adihevitry maventy niboaka rango taloha be tan̈y. Ambarany Baiboly mazava fa Devoly fa tsy Zan̈ahary manjaka amy tany ty izioty. (Lioka 4:1, 2, 6; Jaona 12:31) Misy antony aroe baka amy Baiboly mety han̈azavan̈a nan̈ino Zan̈ahary tsy nisakana famonoan̈a olo koroabe io.

1.   Olo nataony Zan̈ahary afaka mifidy. Zan̈ahary nan̈amia fitsipiky Adama ndreky Eva, fa izy tsy nanery iro han̈araka izio. Iro fo nifidy hanapakevitry amy raha momba ny tsara ndreky ratsy amy fiain̈anandro, ke safidy ratsindro zen̈y nisy vokany ratsy taminolombelon̈o jiaby. Mbala zen̈y koa raha mahavy raha ratsy misy amy zioty io. (Genesisy 2:17; 3:6; Romanina 5:12) Karaha ty baka nivolan̈iny boky Toro Lalan̈any Fivavahan̈a Jiosy (angiley): “Baka amy safidy ratsy nataontsika mahavy ankamarozany jaly ambony tany eto.” Fa kanefa olombelon̈o mbala nirahiny nifidy fo fa namiany fotoan̈a fo iro hamahandro tompiny raha manahiran̈a iro.

2.   Zan̈ahary koa han̈ano, vitany tsarabe han̈adoso vokatrany Famonoan̈a olo tambabe io. Zan̈ahary mampan̈anten̈a fa mbala hivilominy iro olo antapitrisany naty aby in̈y, an̈atinizen̈y iro olo naty tamy famonoan̈a olo koroabe io. Mety mbala mijaly jery fo koa iro olo aby tsy naty tamizio, izikoa fa mahatsiaro raha nahazo iro. Fa kanefa, hadosony Zan̈ahary an̈atiny jerindro raha zen̈y. (Isaia 65:17; Asan’ny Apostoly 24:15) Ten̈a tiany Zan̈ahary olombelon̈o, ke atokisan̈a tsarabe fa hataony ankitin̈y raha jiaby efa nivolan̈iny io.​—Jaona 3:16.

 Maro taminolo tamy nisiany famonoan̈a olo koroabe io tsy nivadiky tamy Zan̈ahary. Iro tsy kivy mare, fotony haindro antony mahavy Zan̈ahary mbala tsendriky man̈adoso jaly io. Haindro koa fa hadosony Zan̈ahary vokatranizio.