Mety tsapanolo efa nan̈oatra namono lalitry fa tsy mora mahazo iro io. Farandraha mavitriky eky iro io ke izikoa fa misy raha mitady hamono iro, efa milefa edy iro.

 Hitandro pahay siansy aby io fa misy lalitry sasany mahavita mitilin̈y karaha avion findesin̈y miady in̈y, kanefa antsasaka segondy fo an̈anovany zen̈y. Lalitry pihina voandraha aby io zen̈y. Profesera Michael Dickinson nivolan̈a fa miaraka izy vo foy, efa “ten̈a mahay mitilin̈y.” Nivolan̈a izy fa raha zen̈y “karaha ataony tsaiky vo teraka apetraka an̈aty avion, kanefa direkty hainy mitondra avion io.”

 Nisy pikaroko nangala video lalitry mitilin̈y ke hitandro fa mihofakofaka in-200 isaka segondy elatranany. Ndray mihofakofaka indraiky fo elatranany io, efa afaka mivily vatan̈anany baka io efa afaka milefa izy.

 Akory fo falakisany betronany miasa? Tsy ela iro pikaroko aby io nahita fa ten̈a malaky miasa betronany io, fotony mahavita miasa indimampolo isaka segondy. Karaha ty volan̈iny Dickinson: “Mahavita man̈ano kalikily ten̈a sarotro an̈atiny fotoan̈a fohiky lalitry io hahaizany tany mety hahafaty izy baka io ahaizany tany tokony hiviliany.”

 Akory ahavitany lalitry pihina voandraha aby io zen̈y? Mbala mitsakaraka valinizen̈y iro manampahizan̈a aby io firaka izioty.

 Akory hevitrinao? Baka aminy evolision ma fahaizan̈a lalitry pihina voandraha aby io mitilin̈y sa nisy namoron̈o?