1. Ino ma raha nambarany Panjaka Solomona amy Mpitoriteny 7:20 ao?

 TY RAHA nisoratiny Panjaka Solomona: “Ambony tany eto, olo marin̈y ndray miezaka man̈ano ny tsara, izy tsy maintsy mbala manota fo.” (Mpito. 7:20) Marin̈y tsarabe zen̈y! Panota aby atsika jiaby. (1 Jaona 1:8) Ke atsika jiaby mila familankeloko, na baka amy Zan̈ahary na baka aminolo hafa.

2. Ino raha tsapanao izikoa fa nisy namanao nan̈ambela hadisovan̈anao?

² Asa efa navy nisy fotoan̈a anao nan̈ano raha namparary fôny kamaradinao marikitry? Hay be fa tsy tianao ho tapaka fihavanan̈anaro, ke lôso anao nan̈ano azafady tamy fô jiaby taminany. Ino raha tsapanao izikoa fa nambelany kamaradinao hadisovan̈anao? Mahivankivan̈a oe anao sady ravoravo. Tsy zen̈y?

3. Ino aby fan̈ontanian̈a hivaliantsika ato?

³ Tiantsika izikoa Jehovah manjary Kamaradintsika maletry. Fa tsy iniany tsy amaray, atsika mety ho tafivolan̈a na tafan̈ano raha mampalahelo Jehovah. Nan̈ino atsika mety matoky fa vôn̈ono han̈ambela hadisovan̈antsika izy? Ino tsy mampiran̈a Jehovah mamela heloko ndreky atsika mamela helokonolo? Farany, olo karakory aby mahazo familankeloko baka amy Jehovah?

4. Nan̈ino atsika matoky fa Jehovah vôn̈ono hamela heloko?

⁴ Man̈amia toky atsika Volan̈a Zan̈ahary fa Jehovah vôn̈ono hamela heloko. Azonao onon̈o tamy Jehovah nikoran̈a raha momba izy, tamy Mosesy tamy Bongo Sinay in̈y? Jehovah nandefa anjely nivolan̈a karaha ty: “Jehovah, Jehovah, Zan̈ahary  mamindra fô, mahay mahinakinaka, tsy mora meloko, ten̈a be fitiavan̈a ndreky tsy mivadiky, sady ten̈a tia fahamarin̈ana, be fitiavan̈a ndreky tsy mivadiky aminolo andrivony, mamela heloko sady man̈ambela hadisovan̈a ndreky fahotan̈a.” (Eks. 34:6, 7) Jehovah Zan̈ahary tsara fan̈ahy ndreky mamindra fô. Ke izy vôn̈ono fo han̈ambela hadisovan̈anolo araiky, izikoa olo io ten̈a mibebaka amy raha ratsy vitany.​—Neh. 9:17; Sal. 86:15.

5. Hainy Jehovah aby raha jiaby momba atsika. Mandrisiky izy han̈ino zen̈y? (Salamo 103:13, 14)

⁵ Jehovah Pamôron̈o atsika, ke hainy aby raha jiaby momba atsika. Diniha hely baka! Hainy aminy antsipiriany raha jiaby momba olo tsiaraikiaraiky ambony tany eto. (Sal. 139:15-17) Ke hitany aby tsy fahalavorarian̈a jiaby nilovaintsika baka taminiry olobentsika. Hainy firaka amy raha jiaby efa niain̈antsika ke namolavola toetrintsika. Fahaizany Jehovah raha jiaby zen̈y mahavy izy hamindra fô amintsika.​—Sal. 78:39; vakia Salamo 103:13, 14.

6. Akory nan̈aboahany Jehovah fa izy vôn̈ono han̈ambela hadisovan̈antsika?

⁶ Akory nan̈aboahany Jehovah fa izy vôn̈ono han̈ambela hadisovan̈a? Hainy fa baka tamy raha nataony Adama, lelahy voanalohany, nahavy olombelon̈o jiaby nanjary panota ndreky hofoaty. (Rom. 5:12) Tsisy amintsika iziô mahavita man̈avotro ain̈inany na ain̈inolo hafa, ke ho afaka aminy ozon̈o fahotan̈a ndreky fahafatesan̈a. (Sal. 49:7-9) Nakiry izy, Zan̈aharintsika be fitiavan̈a io mahinakinaka atsika ke nan̈ano raha izy beky atsika ho afaka aminy ozon̈o io. Koran̈iny Jaona 3:16 fa nalefany Jehovah tambony tany teto Zanany lahitokana hofoaty han̈avotan̈a atsika. (Mat. 20:28; Rom. 5:19) Jesosy nahafoe ain̈inany hofoaty tamy plasintsika, beky ho afaka aminy ozon̈o io lan̈iany olo man̈aboaka amy fomba fiain̈ananany fa izy mino Jesosy. (Heb. 2:9) Misaora nangôtsoko mare Jehovah nahita Zanany ten̈a tiany io nampijalian̈a ndreky nivonen̈a tamy fomba nangala baraka! Jehovah tsy mety nan̈ambela Zanany hofoaty, izikoa Izy tsy vôn̈ono hamela helokontsika.

7. Azovy aby sasany aminolo tantarainy Baiboly fa nahazo familankeloko baka tamy Jehovah?

⁷ Amy Baiboly ao misy tantaranolo maro nambelany Jehovah heloko. (Efes. 4:32) Asa mba azovy azonao onon̈o? Mety Panjaka Manase donko! Efa nandombolombo fahotan̈a  vitany lelahy ratsy fan̈ahy io. Nanompo zan̈ahary diso izy salakady nampirisiky olo han̈ano karaha zen̈y koa. Zanany naterany foeky nivoneny, nataony sôron̈o tamindro zan̈ahary diso aby io. Nitondrasany sarivonganany zan̈ahary diso koa tan̈atiny tempoly masin̈iny Jehovah tao. Tsy bôriny Baiboly mivolan̈a karaha ty: ‘Nan̈ano raha ratsy mare tamasony Jehovah i Manase, amy zen̈y Jehovah ho meloko.’ (2 Tan. 33:2-7) Ndray izy man̈ano zen̈y, Manase koa fa nibebaka tamy fô jiaby, nifafany Jehovah hadisovan̈anany jiaby. Nampodiny Jehovah taminany koa fitondrasan̈a, ke nanjary panjaka ndraiky izy. (2 Tan. 33:12, 13) Mety tsaroanao koa donko Panjaka Davida. Nan̈ano fahotan̈a maventy koa izy. Izy tsy vitany nijangajanga fa mbala namono olo koa. Kanefa, Davida koa fa nibebaka ankitin̈y sady nan̈eky fa izy diso, nambelany Jehovah koa hadisovan̈anany. (2 Sam. 12:9, 10, 13, 14) Hitantsika baka amy zen̈y fa Jehovah ten̈a vôn̈ono han̈ambela hadisovan̈a. Ary mbala ho hitantsika afarafara an̈y fa, miavaka mare fahaizany Jehovah man̈ambela hadisovan̈a izikoa ampiran̈iny amy ninolombelon̈o.

8. Tsisy pitsara mahay mandilatra Jehovah. Nan̈ino raha zen̈y mahavy izy hahay han̈ambela hadisovan̈a?

⁸ Jehovah ‘Pitsara tany jiaby.’ (Gen. 18:25) Mahay asanany tsarabe pitsara araiky izikoa mazava aminany tsara raha koran̈iny lalàn̈a. Tsisy mihafa amy zen̈y koa i Jehovah. Izy tsy vitany Pitsara fo fa, Pan̈amia Lalàn̈a lastio. (Isaia 33:22) Tsisy olo mahay ny tsara ndreky ratsy mandilatra Jehovah. Misy raha hafa koa mila ataony pitsara mahay. Alohanizy han̈aboaka didipitsaran̈a, mila hainy antsendriky raha jiaby nandalo. Izikoa zen̈y dinihin̈y, tsisy pitsara mahay mandilatra Jehovah, fotony harany ndreky hainy aby raha jiaby mandalo.

9. Ino aby raha efa hainy Jehovah, lera izy hanapakevitry hamela heloko va tsy hamela heloko?

⁹ Jehovah tsy karaha pitsara olombelon̈o. Izikoa fa misy raha mandalo, hainy raha jiaby momba izio. (Gen. 18:20, 21; Sal. 90:8) Ninolombelon̈o baka, raha hitany masony ndreky ren̈iny sofiny fo hainy, fa Jehovah ndraiky tsy karaha zen̈y. Hainy Jehovah fa misy vokany aminolo araiky toetry nilovainy baka taminiry olobeny, fomba nitarimian̈a izy, tany nipitrahany, fihetsehampônany, asalohanany ndreky fahasalaman̈any jerinany. Jehovah koa mahay raha an̈atiny fônolo. Hainy aby ino mahavy olo araiky han̈ano raha, raha tiany hatao, avio raha iriny. Tsisy raha misitriky amy Jehovah. (Heb. 4:13) Ke matoa Jehovah man̈ambela hadisovan̈a, efa hainy raha jiaby momba izio.

10. Nan̈ino atsika afaka mivolan̈a fa tsy maintsy amy rariny fo didipitsaran̈any Jehovah? (Deoteronomia 32:4)

¹⁰ Didipitsaran̈any Jehovah tsy maintsy amy rariny fo. Izy baka tsy man̈avakavaka! Tsy miankin̈y amy saora na amy fitsanganan̈a, na amy fanan̈ana, na amy fahifan̈a ndreky talenta anan̈anolo araiky mahavy Jehovah han̈ambela hadisovan̈a. (1 Sam. 16:7; Jak. 2:1-4) Tsisy olo afaka miforse Jehovah han̈ambela hadisovan̈a, na han̈ano risoriso aminany. (2 Tan. 19:7) Jehovah koa fa man̈ano raha, izy tsy hindesimpô ke mekimeky hanapakevitry. (Eks. 34:7) Hitantsika baka amy zen̈y fa tsisy Pitsara mahay mandilatra Jehovah, fotony hainy aby raha jiaby momba atsika, ndreky raha iain̈antsika.​—Vakia Deoteronomia 32:4.

11. Ino ma raha mampiavaka familankelokony Jehovah?

¹¹ Niafatra iro panoratra Soratra Hebreo fa miavaka familankelokony Jehovah. Ndraikindraiky, hafa foeky volan̈a hebreo nampiasaindro izikoa fa hikoran̈a momba izio. Misy boky araiky mivolan̈a fa ‘hafa volan̈a hebreo nampisaindro panoratra aby io izikoa fa  nikoran̈a momba familankelokony Zan̈ahary aminolo araiky nanota. Ary izio tsy nampiasain̈y izikoa fa nikoran̈a momba familankeloko aminolombelon̈o samby olombelon̈o, fotony familankeloko amy samby olombelon̈o mbala mahivan̈a izikoa ampiran̈iny amy niny Jehovah.’ Jehovah zaraiky fo manan̈a fahifan̈a han̈ambela amy fomba feno hadisovan̈anolo panota. Ino amy zay vokany izikoa Jehovah efa man̈ambela hadisovan̈antsika?

12-13. a) Ino vokany, izikoa olo araiky mahazo familankeloko baka amy Jehovah? b) Mahadin̈y firaka ombian̈a ma hatsaran̈a azontsika, Jehovah koa fa man̈ambela hadisovan̈antsika?

¹² Izikoa ikeny jerintsika fa nan̈ambela hadisovan̈antsika i Jehovah, atsika mahatsiaro ‘velombelon̈o’ avio jerintsika milamin̈y fotony atsika tsy hinjehiny eritreritry eky. Familankeloko “baka amy Jehovah” fo mahavita zen̈y, fa tsy familankeloko baka aminolombelon̈o. (Asa. 3:19) Jehovah koa fa mamela helokontsika, ampodiny karaha taloha ndraiky fihavanan̈antsika aminany, ke ataony karaha tsiary nanota taminany foeky atsika.

¹³ Jehovah koa fa man̈ambela hadisovan̈antsika, izy efa tsy man̈ady atsika na man̈asazy atsika nohony fahotan̈a vitantsika in̈y eky. (Isaia 43:25; Jer. 31:34) “Mira halavirany antin̈iana ndreky andrefa an̈adosoany fahotan̈antsika lavitry atsika.” b (Sal. 103:12) Tsisy ambaka izy familankelokony Jehovah! Atsika koa fa mandiniky raha aby zen̈y, manjary tihankasitraka izy mare atsika sady tihan̈aja izy. (Sal. 130:4) Fa azovy aby ma mahazo familankeloko baka amy Jehovah?

14. Ino aby raha efa haintsika ziska eto momba familankelokony Jehovah?

¹⁴ Erakany efa hitantsika, tsy habezany fahotan̈a vitanolo araiky na ahilezany fahotan̈a vitany raha zahavany Jehovah koa fa hanapakevitry han̈ambela hadisovan̈a. Nianarantsika koa fa, Jehovah mahay raha jiaby fotony izy Pamôron̈o, Pan̈amia Lalàn̈a, baka io Pitsara. Ke ino fo basy raha dinihiny Jehovah, alohanizy hanapakevitry han̈ambela hadisovan̈a va tsy han̈ambela?

15. Ino an̈isany raha dinihiny Jehovah? (Lioka 12:47, 48)

¹⁵ Ty raha araiky dinihiny Jehovah, alohanizy hanapakevitry han̈ambela hadisovan̈anolo  araiky: Hainolo io ma fa ten̈a ratsy raha nataony? Ahitantsika zen̈y raha nivolan̈iny Jesosy, amy Lioka 12:47, 48 ao. (Vakia.) Ohatra iziô misy olo mieritreritry han̈ano raha tsy manjary. Hainy tsarabe izio tsy manjary salakady halany Jehovah, fa nataony fo. Nan̈ano fahotan̈a maventy izy, ke Jehovah mety tsy han̈ambela hadisovan̈anany. (Mar. 3:29; Jaona 9:41) Fa ny raha mety ho hisy, ndraikindraiky efa haintsika raha nataontsika tsy mety, fa nataontsika fo. Akory zen̈y? Mbala misy raha antinain̈y fo? Zen̈y ke! Alô zahavantsika raha hafa dinihiny Jehovah.

16. Karakory ma mibebaka zen̈y, baka io nan̈ino raha zen̈y ten̈a mila atao izikoa atsika tihahazo familankeloko amy Jehovah?

¹⁶ Dinihiny Jehovah koa izikoa ten̈a nibebaka lay olo nan̈ano fahotan̈a. Karakory ma zen̈y? Dikany mibebaka zen̈y “miova hevitry, avio man̈ova toetsain̈y ndreky raha tian̈a hatao.” Tafiditry amy zen̈y, manen̈iny ndreky malahelo mare izikoa fa mandiniky raha ratsy natao na raha tsara tokony natao kanefa tsy natao. Olo araiky koa ten̈a mibebaka, tsy raha ratsy vitany fo mampalahelo izy fa fihavanan̈anany amy Jehovah koa. Hainy baka fa, efa tsy nihavan̈a tsara tamy Jehovah izy ke zen̈y nahavy izy latsaka tamy fahotan̈a. Aleva onon̈o baka Panjaka Manase ndreky Panjaka Davida. Samby nan̈ano fahotan̈a maventy iro, kanefa nambelany Jehovah hadisovan̈andro fotony iro ten̈a nibebaka. (1 Mpanj. 14:8) Han̈ambela hadisovan̈antsika koa Jehovah, izikoa atsika ten̈a mibebaka. Ndray izy man̈ano zen̈y, tsy ampy manen̈iny. Mila vôn̈ono koa atsika han̈ano raha. c Zen̈y mitondra atsika amy raha hafa dinihiny Jehovah.

17. Ino ma dikany miova zen̈y, baka io nan̈ino izio ten̈a ilain̈a, izikoa atsika tsy tihan̈ampody fahotan̈a vitantsika taloha? (Isaia 55:7)

¹⁷ Ty koa an̈isany raha matomboko dinihiny Jehovah: Miezaka miova ma lay olo? Dikany miova zen̈y “mimpody andalan̈a.” Izikoa atao amy volan̈a hafa, miala amy raha ratsy fataony izy, avio izy man̈araka lalan̈a ambarany Jehovah. (Vakia Isaia 55:7.) Tsy maintsy hivoàny koa toetsain̈inany, amy zen̈y fomba fisain̈anany Jehovah fo mitaridalan̈a izy. (Rom.  12:2; Efes. 4:23) Mila tapakevitry izy hiala amy fomba fisain̈ana ratsy nanan̈any ndreky hiala amy raha ratsy nahazatra izy. (Kol. 3:7-10) Ndray iô raha jiaby zen̈y, mila mino sôron̈o nataony Kristy atsika, zay Jehovah vo han̈ambela hadisovan̈antsika ndreky hamafa fahotan̈antsika. Baka amy sôron̈o io mahavy Jehovah hamela helokontsika, izikoa hitany fa ten̈a mifen̈y amy fô jiaby atsika hiova.​—1 Jaona 1:7.

18. Ino aby raha nidinihintsika tato momba familankelokony Jehovah?

¹⁸ Izikoa fintin̈intsika hevitry maventy sasany hitantsika tato, nianarantsika fa Jehovah ny ten̈a mahay man̈ambela hadisovan̈a. Ino haviantsika mivolan̈a zen̈y? Voanalohany, fotony izy vôn̈ono hamela heloko fo. Faharoe, hainy raha jiaby momba atsika ndreky ny maha atsika atsika, ke izy zaraiky fo ny ten̈a tsara plasy hivolan̈a izikoa ten̈a mibebaka atsika va karakory. Fahatelo, Jehovah koa fa man̈ambela hadisovan̈a, io efa tsisy arakaraka eky. Aminany, atsika miran̈a raha tsiary nanota taminany. Ke manjary milamin̈y jerintsika, avio atsika ravoravo fotony ankasitrahiny Jehovah.

19. Nan̈ino ma atsika pôsibla ho ravoravo fo ndray atsika tsy lavorary sady mbala manota?

¹⁹ Izikoa atsika mbala tsy lavorary, atsika tsy maintsy hanota fo. Kanefa, mankahery raha koran̈iny boky Fandalinana ny Soratra Masina, amy “Fibebahana”: “Hainy Jehovah fahalimian̈any panomponany ke izy mamindra fô amindro. Zen̈y mahavy iro tsy voatery hanen̈iny tsy mahaivita nohony hadisovan̈a vitandro amy maha tsy lavorary iro. (Sl 103:8-14; 130:3) Izikoa iro mifen̈y mare man̈araka fitsipikiny Zan̈ahary, pôsibla ho ravoravo fo iro. (Fi 4:4-6; 1Jn 3:19-22).” Tsy hitanao mankahery volan̈a aby zen̈y?

20. Ino raha hidinihintsika amy lahatsoratra man̈araka?

²⁰ Nakiry Jehovah vôn̈ono han̈ambela hadisovan̈antsika, izikoa atsika manen̈iny ankitin̈y amy fahotan̈a vitantsika. Fa akory mety hangalantsika tahaka izy? Ino raha itovizany familankelokony Jehovah amy nintsika? Baka io ino raha tsy mampiran̈a iro io? Nan̈ino ten̈a ilaintsika mahay raha aby zen̈y? Amy lahatsoratra man̈araka atsika mahita valiny fan̈ontanian̈a aby io.