• TERAKA TAMINY: 1941

• TANY FAVIAN̈A: BÉNIN

• FIAIN̈ANA TALOHA: NANAMBADY EFATRA SADY NAN̈ENJIKY VAVOLOMBELON̈O JEHOVAH

FIAIN̈ANANAKA TALOHA:

Zaho baka a Cotonou, tanàmbe a Bénin eto. Zahay katoliky fa mahalan̈a fo zahay nandeha leglizy. Mampirafy Katoliky aminay atỳ, fotony raha zen̈y tsy voasakanany lalàn̈a. Ke efatra vadiko.

Nisy lagirevo nataony vahoaka taminy 1970 tan̈y. Zaho tamy zen̈y nihevitry fa hampandroso firenenanay izio, ke mba nandeha nilahatra tamy lalabe koa zaho avio nan̈ano politiky. Zahay nan̈enjiky Vavolombelon̈o Jehovah fotony iro tsy nan̈ano politiky. Niroasin̈y iro misionerandro taminy 1976. Zaho tamy zen̈y nan̈anten̈a fa tsy ho hisy misionera eky himpody eto.

BAIBOLY NAN̈OVA FIAIN̈ANANAKA:

Tapitry tolombahoaka in̈y tamy taon̈o 1990. Ny raha nahalany fan̈ahy zaho, nimpody ndraiky misionera. Ke loso eritreritry zaho: ‘Tsao iro io iraka Zan̈ahary ay?’ Zaho tamy zen̈y niova asa, ke nisy Vavolombelon̈o Jehovah zay niaraka niasa taminaka. Direkty izy nitory taminaka. Naboakany zaho baka tamy Baiboly tao fa Jehovah io be fitiavan̈a sady man̈ano ny rariny. (Deoteronomia 32:4; 1 Jaona 4:8) Tiako raha zen̈y, ke nianatra Baiboly zaho, fotony nanjary tiako ho hay tsarabe Jehovah zen̈y.

Nanomboko nan̈aton̈o fivorian̈any Vavolombelon̈o Jehovah zaho, tafara helinizen̈y. Ny raha nahagaga zaho, iro ten̈a nifankatia, avio iro tsy nan̈avakavaka. Zaho koa fa nifanerasera refindrefiny tamindro, hitako fa iro ten̈a pan̈aradia Jesosy.​—Jaona 13:35.

Haiko fa zaho koa tihanompo Jehovah, zaho mila miala amy Katoliky. Tsy nora taminaka raha zen̈y, fotony zaho navozo vavanolo. Kanefa, Jehovah nan̈ampy zaho, ke vitako fo niala izikoa fa nandeha fotoan̈a.

Nisy raha hafa koa ten̈a nila nataoko. Hitako baka tamy fianarako Baiboly baka fa, tsy mety mampirafy, ke vadiko voanalohany fo tokony hiarahako. (Genesisy 2:18-24; Matio 19:4-6) Nisoratra tamy fanjakan̈a zahay. Fa iro vadiko hafa aby in̈y ndraiky nisarahako, fa zaho mbala man̈ampy iro aminy arabola. Tafara tatỳ, nanjary Vavolombelon̈o Jehovah koa aroe tamindro.

HATSARAN̈A NAZOKO:

Vadiko io katoliky fa izy tsy sarotiny mahita zaho manompo Jehovah. Zahay roe samby nahatsapa fa nahaitsara fan̈ahy fo zaho.

Zaho taloha nan̈ano politiky, fotony zaho nieritreritry fa zen̈y hampandroso taninay. Tsisy dikany aby raha zen̈y. Iziô ndraiky zaho mahita fa Fanjakan̈any Zan̈ahary zaraiky fo mahavaha problemo mahazo olombelon̈o. (Matio 6:9, 10) Mankasitraka Jehovah zaho fotony nampiany ke lôso ten̈a sambatra.

• TERAKA TAMINY: 1977

• TANY FAVIAN̈A: BREZILY

• FIAIN̈ANA TALOHA: PASTERA PANTEKOTISTY

FIAIN̈ANANAKA TALOHA:

Zaho nipetraka ta Itu, a São Paulo. Be dahalo tamy tanàna io tao.

Kafiry mare zaho tamy zen̈y sady naditry. Zaho koa nivarotro jamala. Kanefa, niezaka niova zaho tafara tatỳ fotony tontohitry fa izikoa zaho tsy miova, mety higadra na hofoaty foeky. Nivavaka tamy Pantekotisty zaho, ke loso pastera foeky zaho tamy farany.

Zaho tamy zen̈y efa nieritreritry fa ho vitako tsarabe han̈ampy olo. Nitory teny tamy radio foeky zaho, ke nanjary hainolo maro. Kanefa, ny raha hitako, Leglizy Pantekotisty io tsy mikarakara olo pivavaka ao aby. Vola fo raha tadiavindro. Ke farany zaho niala.

BAIBOLY NAN̈OVA FIAIN̈ANANAKA:

Niaraka zaho nianatra Baiboly tamy Vavolombelon̈o Jehovah, efa hitako edy fa tsy mitovy amy fivavahan̈a hafa iro. Raha aroe ten̈a nan̈antsory zaho. Iro ten̈a tia Zan̈ahary ndreky tia olo, fa raha tsy raha mitory fo. Iro koa tsy man̈ano politiky ndreky tsy man̈ano raha misy ifandraisany aminy ady. (Isaia 2:4) Ke resy lahatra zaho fa nahita fahamarin̈ana, na lalan̈a mengo amy fiain̈ana tsisy farany.​—Matio 7:13, 14.

Izikoa tiako han̈ano raha mamparavoravo Zan̈ahary, nisy raha ten̈a nila nataoko. An̈isanizen̈y nikarakara tsarabe fianakavian̈anaka, avio nanetry ten̈a. Tsy mora taminaka raha zen̈y, kanefa vitako fo fotony Jehovah nan̈ampy zaho. Lan̈y fan̈ahy madamonaka nahita zaho niova, ke nanjary nandroso mare izy, kanefa izy nianatra Baiboly talohanaka. Izikoa fa nandeha fotoan̈a, zahay samby nan̈iry hanjary Vavolombelon̈o Jehovah, avio zahay niaraka natao batisa.

HATSARAN̈A NAZOKO:

Amy zioty, sambatra zahay tran̈o araiky. Telo mianadahy zanakanay, ke miezaka zahay man̈ampy iro hanjary kamaradiny Zan̈ahary. Man̈ano mersy Jehovah zaho fotony nataony raha hahaizako ny marin̈y, amy Volan̈anany ao. Niova mare zaho izikoa fa nianatra izio. Man̈ova olo ankitin̈y Baiboly!

• TERAKA TAMINY: 1957

• TANY FAVIAN̈A: AUSTRALIE

• FIAIN̈ANA TALOHA: NIJALY MARE

FIAIN̈ANANAKA TALOHA:

Ta Newcastle, a Nouvelle-Galles Atsimo zaho nipetraka. Fito mianadahy zahay, ke zaho talan̈olo amy man̈angy. Papanay mamolava sady tia mamopoko. Nasiaka mare mamanay, ke matetiky zaho nipopohiny. Navozo mare zaho fotony zaho zen̈y ho izy maditry, ke môtrobe miambin̈y zaho.

Isaka izy namopoko zaho, zaho naratra mare, ke matetiky zaho tsy nandeha lekoly. Zaho koa fa 11 taon̈o, zaho nadosony fanjakan̈a taminiry olobeko. Napetrakandro tamy fikambanan̈a araiky zay zaho, baka io nafindrandro tamy masera. Kanefa, zaho koa fa 14 taon̈o, zaho nilefa, avio zaho tsy nody foeky fa nirenireny ta Kings Cross, a Sydney.

Zaho nanjary nihina jamala, nigiaka toaka, nan̈ano filma vetaveta, avio nan̈ano makorely. Tandraraiky, hariva tamy zen̈y, nisy raha nampavozo zaho mare. Zaho taminio nandeha tamy lelahy araiky tompiny diskoteky zay. Nisy aroe lahy nitady zaho. Nirahindro nandeha taminy efitry an̈ila zaho, fa ren̈iko fo raha jiaby nivolan̈indro. Handeha hivanga zaho zen̈y naviandro aroe lahy io. Tseky hasitrikindro an̈atiny sambo zaho, baka io hindesindro a Japon handeha hiasa amy bara. Niaraka zaho naharen̈y zen̈y, direkty zaho nisôty baka amy lavarangana, nandeha nitady vonjy.

Nahita lelahy araiky zay zaho tamy lalabe. Izio olo nandalo hely ta Sydney tao. Nitantaraiko taminany raha nahazo zaho tsao mba hamezany vola fo zaho. Nirahiny nandeha tamy tran̈o nivantan̈any tan̈y zaho, hamiany hanin̈y hely ndreky rano hisehan̈a. Tsy nisaraka eky zahay, ke nanjary fivadiany taon̈o araiky tafara tatỳ.

BAIBOLY NAN̈OVA FIAIN̈ANANAKA:

Tamy zaho vo nianatra Baiboly tamy Vavolombelon̈o Jehovah, zaho salakady neloko, ravoravo. Neloko zaho fotony tamy zen̈y vo haiko fa Satana mahavy jaly. Ela jiaby zay, nampianarin̈y zaho fa baka amy Zan̈ahary fo raha jiaby mampijaly atsika. Ravoravo mare koa zaho, fotony nanjary haiko fa kaiky Zan̈ahary tsy mampijaly olo amy môtrobe. Raha zen̈y baka ten̈a nampavozo zaho taloha!

An̈isany raha nahalany fan̈ahy zaho, Vavolombelon̈o Jehovah mifen̈y fo man̈araka torohevitriny Baiboly izikoa fa manapakevitry. Arehandro tsarabe koa raha ianarandro. Zaho taloha baka mierin̈y olo, kanefa zaho mbala tiandro ndreky najaindro fo, ndray ino ndray ino raha nivolan̈iko ndreky nataoko.

Nahatsiaro ten̈a tsisy dikany koa zaho, ke io ny ten̈a sarotro taminaka. Tsy afaka tamy jerinaka foeky fihetsehampo io, ndray efa taon̈o maro tafarany batisanaka. Tia zaho Jehovah, kanefa zaho nihevitry fa izy tsy mety ho tia olo karaha ataoko ty.

Niova fo zaho, 15 taon̈o tafarany batisanaka. Nisy kabaro zay ren̈iko, tamy zaho nan̈aton̈o fivorian̈a nataony Vavolombelon̈o Jehovah. An̈isany raha nazavain̈a tamy zen̈y Jakoba 1:23, 24. Koran̈inizio ao fa Baiboly io mira fitaratra, ke ao ahitan̈a karakory fahitany Jehovah atsika. Lôso eritreritry zaho, tsao mba hafa fahitany zaho fa tsy miran̈a amy raha iritriretiko. Tsy nikeny sain̈inaka raha zen̈y tamy voanalohany, fotony zaho mbala nihevitry fo fa izy tsy mety ho tia zaho.

Kanefa andra vitsivitsy tafaranizin̈y, nivakiako raha koran̈iny Isaia 1:18. Ke andininy io ten̈a nampatontohitry zaho. Karaha ty nambarany Jehovah amizio ao: “Avia atsika hifandamin̈y. Fotony ndray mena dà fahotan̈anaro, hataoko fotsy mangatsakatsaka karaha lanezy.” Karaha tihivolan̈a aminaka karaha ty in̈y izy: “Avia atsika hikoran̈a Vicky! Haiko ane anao e! Haiko raha nataonao. Haiko koa fa anao ten̈a manen̈iny, ke matokisa fa anao tiako!”

Tsy tafandry zaho taminy alin̈y io. Mbala tsy nikeny sain̈inaka fo fa Jehovah tia zaho. Ke zaho nisaintsain̈y momba vidipan̈avotan̈a. Tio vo nazava taminaka fa Jehovah ten̈a maharidraha taminaka. Efa matetiky izy nan̈aboaka taminaka fa zaho tiany, fa zaho karaha nivolan̈a taminany karaha ty fo: ‘Anao tsy tia zaho zen̈y, fotony anao tsy ten̈a be fitiavan̈a. Avio soron̈o nataony Zanakanao in̈y tsy mahavita man̈avotro zaho, ke indesa an̈y fa tsisy raha ilako izio.’ Lera zaho nisaintsain̈y momba vidipan̈avotan̈a io, tio zaho vo resy lahatra fa izy ten̈a tia zaho.

HATSARAN̈A NAZOKO:

Zaho iziô mahatsiaro sambatra mare, sady efa tsy miheviten̈a tsisy dikany eky. Mahaimitombo koa fifankatiavan̈anay fivadiany, avio nanjary haiko man̈ampy olo, fotony efa maro raha nandalovako. Nanjary kamaradiko ankitin̈y Jehovah.

• TERAKA TAMINY: 1974

• TANY FAVIAN̈A: RUSSIE

• FIAIN̈ANA TALOHA: TIA ROCK

FIAIN̈ANANAKA TALOHA:

Zaho teraka ta Votkinsk, tany nitirahany Tchaïkovski, pamoron̈o hira malaza. Lafamìnaka olo masikiny. Papanay tsara fan̈ahy fa mamolava, ke tsy dia namparavoravo zahay fiain̈ananay tantran̈o tao.

Zaho tsy dia nahay raha ke zaho tafieritreritry fa zaho dindery, tsy karaha olo hafa. Nanomboko nitokantokana koa zaho, avio loso tsy natoky olo. Tsy tiako foeky nandeha lekoly. Zaho koa fa irahiny papianatra man̈azava raha zahan̈a karaha tsotsotra, tsisy raha haiko, kanefa raha io haiko amy fotoan̈a hafa. Indraiky andra, ty raha nisoratiny papianatra momba zaho: “Tsy maro voambolan̈a hainy, avio tsy hainy foeky man̈azava hevitrinany.” Nahaikivy fo zaho ke nahatsapa ten̈a tsisy dikany. Loso diniky hely zaho, nan̈ino ma zaho velon̈o.

Nanjary nigiaka toaka koa zaho. Lera zaho nigiaka fo karaha ravoravo. Kanefa izikoa fa be loatra toaka laniko, zaho ninjehiny eritreritrinaka. Hitako tsisy dikany foeky fiain̈ananaka ke nahaikivy fo zaho. Ndraikindraiky zaho tsy niboaka tran̈o foeky tan̈atiny andra maromaro, sady tihamono ten̈a.

Nitandren̈y rock zaho, tamy zaho 20 taon̈o, avio olo tia izio fo nataoko naman̈a. Nataoko lava fan̈evanaka, avio zaho nan̈ano kavin̈y. Nalaiko tahaka fomba fisikinan̈anolo pan̈ano rock io sady tiako koa. Karaha azoazoko in̈y ain̈inaka, fa mielan̈a fo raha zen̈y. Nanjary nitôron̈o tsibebe zaho avio nitady ady taminolo fo. Ndray olo tran̈o araiky taminaka mbala nitadiavako ankany fo.

Zaho in̈y nieritreritry fa ho ravoravo zaho koa fa mitandren̈y rock io, kanefa tsy zen̈y aby ny raha nisy. Niova mare toetrinaka. Zaho koa nanjary melomeloko fo isaka zaho naharen̈y raha ratsy nataony pihira tiako io.

Nahaitihamono ten̈a fo zaho. Fa baka tio tsy sakiko nan̈ano zen̈y, fotony haiko fa tsy ho din̈iny mamanay raha zen̈y. Zaho baka tiany, sady izy nan̈ampy zaho fo. Lany ny marin̈inaka. Zaho tsy tafamono ten̈a kanefa zaho koa tsy tiho velon̈o eky.

Tiho varimbarian̈a tamy raha hafa zaho, ke nanomboko namaky boky zaho. Tamy boky araiky nivakiko zay, nisy tantaranolo pivavaka nahavita raha niavaka. Ke loso tihanompo Zan̈ahary zaho sady tihan̈ampy olo. Nikoran̈iko tamy Zan̈ahary aby raha tan̈atiny fônaka. Sambako nan̈ano zen̈y rango niain̈ako. Ho zaho taminany, ino eky raha tokony hataoko baka zaho ho sambatra. Ny raha mahagaga, zaho baka tio naharen̈y nahivankivan̈a be. Nahailany fan̈ahy fo zaho, fotony lera dimy tafarany vavaka nataoko in̈y, nisy Vavolombelon̈o Jehovah nikonkon̈o tambaravaran̈anaka sady nitaon̈o zaho hianatra Baiboly. Nivaly vavakanaka. Nanomboko tamy zen̈y, niova mare fiain̈ananaka. Loso sambatra zaho.

BAIBOLY NAN̈OVA FIAIN̈ANANAKA:

Nariako aby zay raha nanan̈ako nisy nifandraisany tamy rock. Tsy nora taminaka nan̈ano zen̈y! Elaela kony vo nadin̈ako hira jiaby haiko ay! Miaraka zaho mandalo amy tany pandefa izio, direkty fa azoko onon̈o fiain̈ananaka taloha. Halako raha zen̈y fotony izio nan̈elingelin̈y sain̈inaka, salakady zaho lastio efa nianatra raha tsara. Ke tsy nandalondalo tan̈y eky zaho. Nivavaka mare koa zaho, isaka zaho nahatsiaro fiain̈ananaka taloha. Tsapako fa nahazo “fiadan̈ana Zan̈ahary, bebeny eritreritry jiaby” zaho.​—Filipianina 4:7.

An̈isany raha nianarako izioty, olo ten̈a Kristianin̈y mila mitory. Zaho taloha nieritreritry raha zen̈y tsy ho vitako foeky. (Matio 28:19, 20) Kanefa, haiko fa mila mahay ny marin̈y amy Baiboly ao koa olo. Ndray zaho fo karaha zen̈y. Nanjary nilamin̈y jerinaka, avio zaho loso ravoravo. Zen̈y nandrisiky zaho hitory, ndray tio tahotro aby zen̈y. Ny raha nahalany fan̈ahy mare, nanjary natoky ten̈a zaho koa fa nan̈ano izio, ke nahaifatatra fo finoan̈anaka.

HATSARAN̈A NAZOKO:

Iziô zaho manan̈a tokantran̈o sambatra. Ravoravo koa zaho fotony efa maromaro zay olo nampianariko Baiboly, an̈isanizen̈y anabaviko ndreky mamako. Sambatra zaho izioty, fotony manompo Zan̈ahary sady man̈ampy olo hahay izy.