Filankevipitantan̈any io fitambarany rahalahy Kristianin̈y matotro man̈amia taridalan̈a Vavolombelon̈o Jehovah jiaby erantany. Misy karazany aroe asanany io:

•   Iro rahalahy ao man̈aramaso fan̈oman̈ana boky ndreky gazety na raha hafa miorin̈y amy Baiboly, ampiasain̈y amy fivorian̈a, avio amy sekoly jiaby ataony Vavolombelon̈o Jehovah.​—Lioka 12:42.

•   Iro rahalahy ao koa man̈aramaso asa ataony Vavolombelon̈o Jehovah jiaby erantany, ke iro mitariky asa fitorian̈a avio man̈aramaso fomba ampiasan̈a fan̈amezan̈a antsitrapo.

 Filankevipitantan̈a io mangalatahaka modely nambelandro “apostoly ndreky iro antipan̈ahy ta Jerosalema” tamy taonjato voanalohany tan̈y, iro io nangala fanapahankevitry maventy momba Kristianin̈y jiaby. (Asan’ny Apostoly 15:2.) Karaha iro lelahy tsy nivadiky aby io, iro an̈isany Filankevipitantan̈ana io tsy pitariky fandaminan̈a. Iro mizaha taridalan̈any Baiboly, fotony aindro fa Jehovah nanedry Jesosy Kristy ho Lohany Fiangonan̈a.​—1 Korintianina 11:3; Efesianina 5:23.

 Ity aby iro an̈isany Filankevipitantan̈ana: Kenneth Cook, Gage Fleegle, Samuel Herd, Geoffrey Jackson, Stephen Lett, Gerrit Lösch, Anthony Morris, Mark Sanderson, David Splane, baka io Jeffrey Winder. Iro io manompo amy foibe a Warwick, New York, U.S.A.

 Misy komity tsiota niforon̈iny Filankevipitantan̈ana baka andaminan̈a asantsika, ke isaka komity tsy maintsy misy araiky amindro miasa ao, na sasany amindro mety ho an̈isany komity mandilatrany araiky foeky.

•   Komitiny Pandrindra: Man̈aramaso raharaha arapitsaran̈a ndreky problemo mahazo Vavolombelon̈o Jehovah baka amy fan̈injehan̈a nohony raha inoany, avio mamaly fan̈ontanian̈a jiaby mahakasiky Vavolombelon̈o Jehovah.

•   Komitiny Piasa: Man̈aramaso fandaharan̈a atao amy fiankavian̈any Betela.

•   Komity Miandraikitry Asa Fan̈anovan̈a Pirinty: Man̈aramaso asa famokaran̈a ndreky fandifasan̈a boky momba Baiboly avio fan̈oren̈a trano fivorian̈a, birôny fandikanteny, baka io tran̈ony sampan̈a.

•   Komitiny Fanompoan̈a: Miandraikitry asa fitorian̈a “vaovao tsarany Fanjakan̈a.”​—Matio 24:14.

•   Komitiny Fampianaran̈a: Man̈oman̈a hanin̈y arapan̈ahy ilain̈y amy fivorian̈a, sekoly, avio fandaharan̈a momba audio ndreky video.

•   Komitiny Fanoratan̈a: Man̈oman̈a hanin̈y arapan̈ahy atao pirinty ndreky alefa amy internet avio miandraikitry asa fandikanteny.

 Fan̈ampiny asa amy komity aby io, Filankevipitantan̈ana koa mbala mivory isaka herin̈iandra mandiniky raha ilainy fandaminan̈a. Amy fivorian̈a io, iro an̈isany Filankevipitantan̈a miaraka midiniky raha koran̈iny Soratra Masin̈y, ndreky man̈araka fitaritany fan̈ahy masin̈iny Zan̈ahary, avio amy zen̈y mangala fanapahankevitry.​—Asan’ny Apostoly 15:25.

 Iro io Kristianin̈y mafatoky ke man̈ampy komity misy amy Filankevipitantan̈ana. (1 Korintianina 4:2) Iro io manan̈a fahaizan̈a ndreky traikefa ilain̈y aminy asa hiandraiketany komity nanendren̈a iro, avio isaka herin̈iandra iro man̈aton̈o fivorian̈a alamin̈iny komity misy iro. Iro tsy mandray anjara amy fangalan̈a fanapahankevitry, fa iro ndraiky man̈amia torohevitry ndreky fan̈ampiny fan̈azavan̈a ilain̈y, ndreky man̈antanteraka fanapahankevitry nalainy komity io, avio man̈aramaso vokatrany fanapahankevitry io. Iro io koa tindreny Filankevipitantan̈ana hitsidiky rahalahy amy tany samby isany erantany, avio mandray anjara amy fandaharan̈a amy fivorian̈a fatao isaka taon̈o na fandrasan̈a diplominy Gileada.