Zahay tsy mino zen̈y. Zahay Vavolombelon̈o Jehovah man̈eky marin̈y fa Zan̈ahary niasa raha jiaby. Zahay fo tsy mino fa Zan̈ahary niasa raha jiaby tan̈atiny tsiota andra zen̈y. Ino mahavy zahay tsy mino zen̈y? Fotony maro raha ampianariny fivavahan̈a tsy mifan̈araka amy Baiboly. Atsika hizaha ohatra aroe:

1.   Fotoan̈a niasany Zan̈ahary raha jiaby. Misy fivavahan̈a mivolan̈a fa tan̈atiny tsiota andra misy 24 lera niasany Zan̈ahary raha jiaby. Kanefa izikoa Baiboly zahavan̈a, “andra” zen̈y fotoana mahadin̈y ela be.​—Genesisy 2:4; Salamo 90:4.

2.   Fotoan̈a niasany Zan̈ahary tany. Misy fivavahan̈a mivolan̈a fa efa andrivony taon̈o zay niasany Zan̈ahary tany ty. Baiboly ndraiky mivolan̈a fa tany ty ndreky raha hafa jiaby amy lan̈itry an̈y efa nisy talohany andra tsiota niasan̈a raha jiaby volan̈indro zen̈y. (Genesisy 1:1) Zen̈y mahavy zahay Vavolombelon̈o Jehovah matoky fa marin̈y raha volan̈indro manampahaizan̈a momba siansy fa tanintsika ty efa nisy antapitrisany taon̈o loso zay.

 Marin̈y fa zahay Vavolombelon̈o Jehovah mino fa Zan̈ahary niasa raha jiaby, kanefa zen̈y tsy mivolan̈a fa zahay manohitry raha koran̈indro manampahaizan̈a momba siansy. Zahay mino fa Baiboly koa fa mikoran̈a raha momba siansy, io marin̈y fo.