Chikalata Chakwawula kwa Afilipi 2:1-30
2 Sambano naga pasikati penu pana kulimbikasyana kulikose mpela ŵakumkuya ŵa Klistu, naga pana kutendelana chanasa kulikose ligongo lya chinonyelo, naga pana kuganichisyana kulikose, soni naga pana kunonyelana ni kukamusyangana kulikose,
2 mtendeje yeleyi ni nganisyo syakulandana soni mnonyelaneje mwakulandana kuti mundendekasye kuŵa jwakusangalala mnope. Mŵejesoni ŵakamulana yisyesyene soni mkole nganisyo syakulandana.
3 Mkatendaga chilichose ni mtima wakangana kapena mwakulikwesya, nambo mŵeje ŵakulinandiya soni mwawoneje ŵane kuŵa ŵakumpunda.
4 Mkagambaga kuganichisya yakusaka yenupe basi, nambo mganichisyejesoni yakusaka ya ŵane.
5 Mkole nganisyo syelesi syelesoni Klistu Yesu ŵakwete.
6 Atamose kuti jwalakwe jwakwete uwoneche wa Mlungu, nambo nganalinga kusumula udindo wa Mlungujo kuti aŵe jwakulandana najo.
7 Jwalakwe nganatenda yeleyo, nambo jwalesile yosope yaŵakwete ni kulitenda kuŵa mpela kapolo mwamti jwaŵele mundu.
8 Konjechesya pelepa, jwalakwe paŵaŵele mundu, ŵalinandiye mwamti jwaŵele jwakupikanila mnope mpaka pandaŵi jiŵawile. Elo, mpaka pandaŵi jiŵawile pachitela chakulagasichila.*
9 Paligongo lyeleli, Mlungu ŵamkwesisye jwalakwe ni kumŵika pamalo gapenani mnope, soni ŵamnonyele ni kumpa lina lyakupunda mena gane gosope.
10 Ŵatesile yeleyi ni chakulinga chakuti m’lina lya Yesu, yakupanganyikwa yosope yakwinani, yapachilambo, soni yapasi pa litaka yitindiŵale.
11 Nambosoni kuti jwalijose ajitichisye pameso pa wosope kuti Yesu Klistu ali Ambuje ni chakulinga chakuti Mlungu jwali Atati achimbichikwe.
12 Achalongo achimjangu ŵapamtima, jemanja mŵele ŵakupikanila ndaŵi syosope, ngaŵaga pandili ni jemanjape nambo mkusapikanilasoni mnope pandaŵi jandili kwine. Myoyo mtendeje yiliyose yakomboleka kuti chimkulupuche soni mtendeje yeleyi mwawoga ni kutetemela.
13 Pakuŵa Mlungu akusatenda yindu m’litala lyakumsangalasya jwalakwejo, soni akusamkamuchisya jemanja kuti mŵeje ŵakusachilila kutenda yindu yakumsangalasya jwalakwe.
14 Mpitilisye kutenda yindu yosope, nambo mkayitendaga ni mtima wakudandawula kapena wakangana.
15 Mtendeje yeleyi kuti mŵe ŵangali magambo soni ŵangali chakulemwa, soni kuti mŵe ŵanache ŵa Mlungu ŵangali chakulemwa chilichose pasikati pa ŵandu ŵautambwali soni ŵandamo syakusakala. Jemanja mkuŵala pasikati pa ŵandu ŵeleŵa mpela yakumulichila m’chilambochi.
16 Nambosoni mkamule mwamachili maloŵe gakupeleka umi. Naga mkutenda yeleyi, tinjikola ligongo lyakusangalalila pa lisiku lya Klistu, pakuŵa chinjimanyilila kuti nganimbutuka pachabe kapena kulimbichila masengo pachabe.
17 Atamose kuti ngulipeleka mpela mbopesi jachakumwa, nambope ngumkamuchisya jemanja pa kulipeleka kwenu soni pa masengo gamkumtendela Mlungu* mwakulupichika. Myoyo ndili jwakusangalala soni ngusangalala ni jemanja wosope.
18 Paligongo lyeleli, ngumŵenda jemanjasoni kuti msangalale ni une.
19 Sambano ngukulupilila kuti Ambuje Yesu changamuchisye kuti namtumisye Timoteyo kwa jemanja pangakaŵapa ni chakulinga chakuti uneji sangalale pachimbikane yakwamba jemanja.
20 Pakuŵa nganingolasoni jwine jwamtima mpela wa jwalakweju, jwampaka amsamalile yisyesyene pa yakusosechela yenu.
21 Ligongo ŵane wosope akusosasosa yakulisangalasya jika ngaŵaga yakumsangalasya Yesu Klistu.
22 Nambo jemanja mkumanyilila mbili jambone jakwete jwalakweju. Mpela mwanache ni babagwe, jwalakwe atumichile pampepe ni une mpela kapolo pa masengo gakulalichila ngani syambone.
23 Jwalakweju ni jwangusaka kumtumisya kwa jemanja pachimanyilile mwachiyiŵele yindu paumi wangu.
24 Ngukulupililasoni kuti Ambuje changamuchisye kuti mbiche kwa jemanja pangakaŵapa.
25 Nambo apano nayiweni kuti mpaka yiŵe chenene kumtumisya kwa jemanja Epafulodito. Jwalakwe ali mlongo mjangu, jwamasengo mjangu, soni msilikali mjangu. Jwalakwe alisoni jwamtenga jumwamtumisye jemanja kuti andumichileje.
26 Pakuŵa jwalakwe ali jwakusachilila kumwona jemanja wosope, soni akudandawula ligongo lyakuti jemanja mwapikene yakuti jwalakwejo akulwala.
27 Yisyene, jwalakwe jwalwaliche mnope mpaka kusigala panandi kuwa. Nambo Mlungu ŵamtendele chanasa, soni chanasacho nganamtendela jwalakwe pejo nambo ŵandendelesoni une ni chakulinga chakuti une ngagambaga kutamila kudandawula.
28 Myoyo ngumtumisya jwalakweju kwa jemanja mwachitemachitema ni chakulinga chakuti pachimumwone mtandilesoni kusangalala, soni kuti kudandawula kwangu kunandipe.
29 Myoyo mumpochele jwalakwejo mwakusangalala mpelaga mwamkusati pakwapochela ŵakutumichila wosope ŵa Ambuje, soni ŵandu mpela ŵeleŵa mkusosekwa mwachimbichisyeje mnope.
30 Jwalakwe jwasigele panandi kuwa ligongo lya masengo ga Klistu.* Jwalakwe ŵaŵisile umi wakwe pangosi kuti ayiche kwa une kukundumichila mmalo mwa jemanja.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “masengo gakwatumichila ŵandu.”
^ Kagopolele kanesoni, “masengo ga Ambuje.”
