Chikalata Chakwawula kwa Akolose 2:1-23
2 Pakuŵa ngusaka kuti jemanja mmanyilile ngondo jangulimbana najo mmalo mwenu, soni mmalo mwa ŵele ŵali ku Laodikaya nambosoni mmalo mwa wosope ŵanganamboneje meso ni meso.*
2 Ngusaka kuti mitima jenu jiŵe jakulimba soni kuti mŵe ŵakamulana mnope m’chinonyelo soni kuti mpate chipanje chejinji, chachili kupikanichisya soni kumanyilila chenene yakusisika ya Mlungu, yayili Klistu.
3 Mwa jwalakwejo ŵasunjilemo chenene chipanje chosope chakamulana ni lunda soni kumanyilila yindu.
4 Nguŵecheta yeleyi kuti jwalijose akamsokonasya ni maloŵe gakumnyenjelela.
5 Atamose nganimba kweleko, nambo ngumganichisyape jemanja. Ndili jwakusangalala kupikana kuti mkutenda yindu mwadongosolo soni kuti mkwete chikulupi chakulimba mwa Klistu.
6 Myoyo, pakuŵa mpochele Klistu Yesu Ambuje ŵetu, mpitilisye kwenda mwakamulana najo.
7 Mpela mumwalijiganyichisye, mŵeje ŵakutamilichika chenene soni ŵakulimba mwa jwalakwe. Mŵeje ŵangatenganyika m’chikulupi, soni ndaŵi syosope mpopeleje mwakuyamichila.
8 Mkalamuche, komboleka jwine kumkamula mpela kapolo* mwa lunda lwa ŵandu soni chinyengo changali mate, mwakamulana ni miyambo ja ŵandu, mwakamulanasoni ni nganisyo syakusajendela ŵandu m’chilambochi, ngaŵaga mwakamulana ni chijiganyo cha Klistu,
9 ligongo mwa jwalakwejo ni mwasigumbele chenene ndamo syosope sya Mlungu.
10 Myoyo jemanjasoni mli ŵakwanila chenene ligongo lya jwalakwejo. Jwalakwejo ni jwali penani pa* maboma ni maulamusi gosope.
11 Pakuŵa mli ŵakamulana ni jwalakwejo, jemanja mwawumbelesoni, ngaŵaga kuwumbala kwakusatendaga ŵandu nambo kwakuwula chilu chaulemwa, ligongo kuwumbala kweleku ni kwakusatenda ŵakutumichila ŵa Klistu.
12 Pakuŵa mwasililidwe najo pampepe mwakubatisidwa ubatiso wakulandana ni wakwe, soni ligongo mli ŵakamulana ni jwalakwejo, mwajimusidwesoni yimpepe ni jwalakwejo kupitila pa chikulupi chimkwete jemanja pa masengo gekulungwa ga Mlungu, jwele ŵamjimwisye jwalakwejo ku chiwa.
13 Nambosoni, atamose kuti mwaliji ŵawe ku yakulemwa yenu, soni mwaliji ŵangawumbala, Mlungu ŵampele umi kuti mŵe ŵakamulana ni Klistu. Jwalakwe mwachinonyelo ŵatukululuchile yakulemwa yetu yosope.
14 Jwalakwe ŵafutile* chikalata chakulembedwa payala, chakola malamusi gejinji soni chele chaliji mkutusisya. Jwalakwe ŵachityosisye mwakuchikomela pa chitela chakulagasichila.*
15 Pakamulichisya masengo chitela chakulagasichilachi,* jwalakwe ŵagawusile maboma soni maulamusi ni kugaleka gangawala soni ŵagalosisye peswela kuti ŵandu wosope alole kuti agagomeche ni kugalongolelaga mpela achikayidi.
16 Myoyo, mkakunda kuti jwalijose am’welusye pakwamba ya yakulya soni yakumwa kapena ya masiku ga yisangalalo kapenasoni lisiku lyakuwoneka kwa mwesi kapena ya kusunga lisiku lya sabata.
17 Yindu yeleyo yaliji chiwulili cha yindu yayaliji mkwika, nambo yisyesyene yakwe yili mwa Klistu.
18 Jemanja mkakunda kuti mundu jwalijose jwakunonyela kulinandiya kwaunami soni kutindiŵalila malayika jumjasikasye mbotojo.* Ŵandu ŵeleŵa akusakanganichila pa yindu yayiweni. Ligongo lya nganisyo syawo syakulemwecheka, jemanjaji akusalikwesya pamagongo gangapikanika,
19 soni ŵangamkuya jwele jwali mtwe, jwele kupitila mwa jwelejo, chilu chosope chikusapochela yakusosechela yakwe, soni chikusalumbikana chenene ni mbindi soni mitasi jakwe, nambosoni chikusakulape ni machili ga Mlungu.
20 Naga mwakanile nganisyo syakusajendela ŵandu m’chilambochi ni kuwa yimpepe ni Klistu, ligongo chichi mkupitilisya kutama mpela kuti mli mbali ja chilambochi mwakupikanilape malamusi gakuti,
21 “Mkajigala achi, mkapasya achi, soni mkakamula achi”?
22 Yindu yeleyo yichijonasika pakuyikamulichisya masengo soni malamusi gelega gagambile kuŵa yijiganyo ya ŵandu basi.
23 Atamose kuti malamusi gelega gakusawoneka mpela galunda, nambo gangakamuchisya ŵandu kulimbana ni yakumbila ya chilu chawo. Yeleyi yikusatendekwa ligongo ŵanduwo akusalisagulila jika litala lyakumtindiŵalila Mlungu, akusalinandiya mwaunami soni akusayilagasyaga yilu yawo.
Maloŵe Gamwiŵanda
^ Maloŵe gakwe gandanda, “ŵele nganajiwoneje ngope jangu.”
^ Kapena kuti, “kumkamula mpela nyama.”
^ Maloŵe gakwe gandanda, “mtwe wa.”
^ Kapena kuti, “ŵatyosisye.”
^ Alole Kugopolela kwa Maloŵe Gane.
^ Kagopolele kanesoni, “Klistu.”
^ Ŵane akusati “mbote; chakupochela.”
