Chikalata Chakwawula kwa Aloma 12:1-21
12 Myoyo, ngumchondelela jemanja achalongo achimjangu mwa umbone wa Mlungu kuti mpeleche yilu yenu mpela mbopesi jaumi, jeswela, soni jakuŵajilwa pameso pa Mlungu. Soni mtumichileje Mlungu pakamulichisya masengo lunda lwenu lwakuganisya.
2 Mkajigalilaga kaganisye ka ŵandu ŵa mu ndaŵi* ajino, nambo mgalawuche mwakuchenga nganisyo syenu, kuti mmanyilile chakulinga cha Mlungu chachili chambone, chakuŵajilwa, soni chakwanila.
3 Mwa umbone mtima wekulungwa wanapochele kutyochela kwa Mlungu, ngumŵenda jwalijose mwa jemanja kweleko kuti akaliganichisyaga mwakupundanganya. Nambo jwalijose aliganichisyeje m’litala lyakuŵajilwa mwakamulana ni chikulupi chiŵapochele kwa Mlungu.
4 Pakuŵa chilu chikwete yiŵalo yejinji, nambo yiŵalo yosopeyo yangakamula masengo gakulandana.
5 M’wejisoni, atamose kuti tuli ŵajinji, nambo tuli chilu chimpepe ligongo tuli ŵakamulana ni Klistu mwamti jwalijose pajika ali chiŵalo kwa mjakwe.
6 Myoyo, tukwete upile wakutenda yakulekanganalekangana mwakamulana ni umbone mtima wekulungwa waŵatupele Mlungu. Naga tukwete upile wakusala yamsogolo, kwende tusaleje mwakamulana ni chikulupi chiŵatupele.
7 Chinga tukwete upile wakutumichila, kwende tutumichileje. Chinga upile wetu uli wakwiganya, kwende tujiganyeje.
8 Chinga tukwete upile wakulimbikasya ŵane, kwende twalimbikasyeje. Naga tukusagaŵila ŵane,* kwende twagaŵileje mwakoloŵa makono. Jwakwete upile wakulongolela, alongoleleje mwakulipeleka,* soni jwakwatendela ŵane chanasa, atendeje yeleyo ni mtima wosope.
9 Chinonyelo chenu chiŵeje changali chinyengo. Mŵenganeje ni chakusakala, soni mlimbichileje kutenda chachili chambone.
10 Mwanonyeleje yisyesyene achalongo achimjenu. Mŵeje ŵandanda* pakwachimbichisya ŵane.
11 Mŵeje ŵakulimbichila,* ngaŵaga ŵaulesi. Mkunde kuti msimu weswela umpeje machili. Mtumichileje Yehofa ni mtima wenu wosope.
12 Msangalaleje ni chembecheyo chenu. Mpilileje pamkusimana ni yakusawusya. Mkaleka kupopela.
13 Mwagaŵileje achalongo achimjenu* yindu yimkwete. Mŵeje ŵakwapochela chenene achalendo.
14 Mwasoseleje yambone ŵandu ŵakumlagasya, mwasosele yambone ngaŵaga kwatembelela.
15 Msangalaleje ni ŵele ŵakusangalala, soni mlileje ni ŵele ŵakulila.
16 Mwawoneje ŵane mpela mwamkusaliwonela mwasyene. Mkaŵaga ni nganisyo syakulikwesya nambo mŵeje ni nganisyo syakulinandiya. Mkaliwonaga kuti mli ŵalunda kupunda ŵane.
17 Ŵane pamtendele yakusakala, mkawuchisyaga ni yakusakala. Mtendeje yindu yele ŵandu wosope akusayiwona kuti yili yambone.
18 Naga kuli kwakomboleka, mtendeje yiliyose yampaka mkombole kuti mtameje mwamtendele ni ŵandu wosope.
19 Achalongo achimjangu ŵapamtima, mkawuchisyaga chakusakala nambo mumlechele Mlungu kuti alosye ukali wakwe. Pakuŵa Malemba gakusati, “‘Kuwuchisya kuli kwangu, chinjiwuchisya namsyene,’ akuti myoyo Yehofa.”
20 Naga mdani jwenu jimkwete sala, mumpe chakulya. Naga jimkwete njota, mumpe mesi gakumwa. Pamkutenda myoyo, chimchitamika pasi mtima wa mundujo ni kumasya ukali wakwe.*
21 Mkakunda kuti chakusakala chimgomeche, nambo mchigomecheje chakusakala mwakutenda yambone.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “tukusapeleka kwa ŵane.”
^ Kapena kuti, “mwakusachilila.”
^ Kapena kuti, “Mŵeje pasogolo.”
^ Kapena kuti, “ŵakulipeleka.”
^ Maloŵe gakwe gandanda, “ŵaswelawo.”
^ Maloŵe gakwe gandanda, “Chimchiŵika makala ga moto pamtwe pakwe.”
