Ngani Syambone Syaŵalembile Mateyu 18:1-35
18 Pandaŵi jelejo ŵakulijiganyawo ŵayiche chiŵandika ni Yesu ni kumwusya kuti, “Ana ŵani kusyesyene jwali jwamkulungwa mu Uchimwene wakwinani?”
2 Myoyo jwalakwe ŵakaŵilasile kamwanache ni kukajimika pasikati pawo
3 ni ŵatite, “Nditu ngumsalichisya jemanja kuti, naga ngamkuchenga ni kuŵa mpela tuŵanache, ngasimjinjila kose mu Uchimwene wakwinani.
4 Myoyo, jwalijose jwakulinandiya mpela kamwanacheka, ni juchachiŵa jwamkulungwa mu Uchimwene wakwinani.
5 Jwalijose jwakukapochela kamwanache mpela keleka ligongo lya lina lyangu, akumbochelasoni une.
6 Nambo jwalijose jwakukatendekasya kwasa chikulupi kamwanache kamo pa tuŵanache twatukusangulupililatu, yikaliji chenene kwa jwalakwejo kumtaŵilila m’lukosi mwakwe liganga lyekulungwa lyakusyajila, lyalikusawutidwa ni bulu ni kumponya m’nyasa jakusokoka.
7 “Likungu* ku chilambo ligongo lya yakuŵasya! Yisyene yakuŵasya chiyiyicheje, nambo likungu kwa mundu jwakusayika ni yakuŵasya!
8 Sambano naga mkono wenu kapena lusajo lwenu lukumlemwekasya, mlukate ni kulujasa. Kuli kwambone kuti mkapate umi mli ŵangali chiŵalo chimpepe kapena ŵalemale kulekangana ni kuti akamponye m’moto wangamala mli mkwete makono gaŵili kapena sajo siŵili.
9 Nambosoni naga liso lyenu likumlemwekasya, mlikolotole ni kulijasa. Kuli kwambone kuti mkapate umi mli mkwete liso limo kulekangana ni kuti akamponye mu Gehena* jwa moto mli mkwete meso gaŵili.
10 Msamale kuti mkakanyosya kamo mwa tuŵanache tweletu, pakuŵa ngumsalila kuti malayika gawo kwinani ndaŵi syosope gakusalola ngope ja Atati ŵangu ŵali kwinani.
11 *——
12 “Ana akuganisya wuli? Naga mundu ali akwete ngondolo 100, ni jimo mwa ngondolosyo jisokonechele, ana nganaŵa alesile ngondolo 99 mwitumbi ni kwawula kukujisosasosa jimo jajisokonechelejo?
13 Soni pajipatile, nditu ngumsalichisya kuti akusajisangalalila mnope kulekangana ni ngondolo 99 syele nganisisokonechela.
14 Mwakulandanamo, Atati ŵangu* ŵali kwinani ŵangasaka atamose jumo mwa tuŵanache tweletu ali ajonasiche.
15 “Nambosoni, naga mlongo mjenu atesile chakulemwa, mjawule ni mkamsalile ya chakulemwacho* kwa ŵaŵilipe. Naga akumpikanila, nikuti mumkamuchisye mlongo mjenujo kuwujila m’litala lyakuŵajilwa.
16 Nambo naga ngakumpikanila, mjawule ni mundu jumo kapena ŵaŵili, kuti ngani josope akajisimichisye ni umboni wakupeleka* ŵandu ŵaŵili kapena ŵatatu.
17 Nambo naga ngakwapikanilasoni jemanjajo, mkawusalile mpingo. Naga ngakuwupikanilasoni mpingowo, aŵe mpela mundu jwakusa soni mpela jwakomesya msongo.
18 “Nditu ngumsalichisya jemanja kuti, chilichose chachimchitaŵa pachilambo chapasi chichiŵa chetaŵe kala kwinani, nambosoni chilichose chachimchigopola pachilambo chapasi chichiŵa chegopole kala kwinani.
19 Ngumsalichisyasoni kuti, naga ŵandu ŵaŵili mwa jemanja pachilambo chapasi akamulene kuti aŵende chilichose chachili chakusosekwa, Atati ŵangu ŵakwinani chachatendela.
20 Pakuŵa kulikose kwele ŵandu ŵaŵili kapena ŵatatu chachisongana m’lina lyangu, une chinjiŵa pasikati pawo.”
21 Kaneko Petulo jwayiche kwa jwalakwe ni kumwusya kuti, “Ambuje, mlongo mjangu pandemwechesye, ana mpaka namkululuchile kalingwa? Ana mpaka ka 7 kapena?”
22 Yesu ŵamjanjile kuti, “Ngumsalila kuti, ngaŵa ka 7 basi nambo ka 77.
23 “Ni ligongo lyakwe Uchimwene wakwinani mpaka tuwulandanye ni mwenye juŵasakaga kuti achikapolo ŵakwe amwuchisye ngongole jakwe.
24 Paŵatandite kupochela ngongolesyo, ŵakutumichila ŵakwe ŵayiche ni mundu jwine juŵakwete ngongole ja matalente 10,000.*
25 Nambo ligongo lyakuti nganakola chilichose chakuti apeleche pakuwusya ngongolejo, mwenyewo ŵalamwile kuti amsumisye jwalakwejo, ŵamkwakwe soni ŵanache ŵakwe ni yindu yosope yakwete ni kuja kuwusya ngongolejo.
26 Pelepo kapolojo jwatindiŵele ni kutanda kuchondelela kuti, ‘Anjembecheye chonde, soni chinjawuchisya yindu yosope.’
27 Paŵapikene yeleyi, mwenyewo chakamwile chanasa mwamti ŵamlesile jwalakwejo soni ŵamkululuchile ngongolejo.
28 Nambo kapolojo paŵakopweche pasa ŵasimene ni kapolo mjakwe juŵamkongwesye madinali 100. Ŵamkamwile ni kumminya palukosi ni kumsalila kuti, ‘Mumbuchisye ngongole jangu josope.’
29 Kapolo mjakwejo jwatindiŵele ni kutanda kumchondelela kuti, ‘Munjembecheye chonde, soni chinjimwuchisya ngongole jenu.’
30 Nambope jwalakwe nganakunda, mwamti jwapite kukumpeleka mjakwejo kundende mpaka pachachiwusya ngongolejo.
31 Achikapolo achimjakwe paŵayiweni yayatendekweyi, yakwayiye mnope mwamti ŵapite kwa mwenye ŵala kuja kwasalila yosope yayatendekwe.
32 Kaneko mwenyewo ŵamŵilasile jwalakwejo ni kumsalila kuti, ‘Mmwe mli kapolo jwakusakala, une namkululuchile ngongole jangu josope pamwanjondelele.
33 Ana mmwejosoni ngamkanimumtendela chanasa kapolo mjenu mpela munamtendele unejo?’
34 Pelepo mwenyewo ŵatumbile mnope ni yeleyi, mwamti ŵampeleche kwa jwakulolela ndende kuti amtaŵe mpaka pachachiwusya ngongole josope.
35 Mwakulandana ni yeleyi, Atati ŵangu ŵakwinani chachitendasoni myoyo ni jemanja naga ngamkumkululuchila mlongo mjenu ni mtima wosope.”
Maloŵe Gamwiŵanda
^ Ŵane akusati “utapani.”
^ Alole Kugopolela kwa Maloŵe Gane
^ Maloŵe ga mundimeji gangasimanikwa mu yakulemba yine yakala mnope. Yeleyi yikulosya kuti nganigaŵa mbali ja Malemba gakusalilidwa ni Mlungu.
^ Kagopolele kanesoni, “ŵenu.”
^ Maloŵe gakwe gandanda, “mkamjamuche.”
^ Maloŵe gakwe gandanda, “wa pakamwa pa.”
^ Matalente 10,000 ga silifa winji wakwe uli madinali 60,000,000.
