Tuwanichisye kuti akumwona mtati ali mkukunguluka ni mwanache jwakwe jamlume jwa yaka 7. Kaneko mtatijo akumsalila mwanachejo kuti, “Kalakala, Mlungu ŵapanganisye chilambo chapasi soni yindu yosope yayili pachilambopa. Nambosoni ŵapanganyisye lyuŵa, mwesi soni ndondwa.” Kaneko mwanacheju akuganichisya yeleyi kwakandaŵi ni akwawusya babagwewo kuti, “Baba, sambano ŵani ŵaŵampanganyisye Mlungu?”

Kaneko mtatijo akwanga kuti, “Mlungu nganapanganyidwa ni jwalijose.” Akonjechesyasoni kuti, “Jwalakwe ali jwandaŵi syosope.” Pandaŵiji mwanachejo akwikutila ni mwajanjile babagwewo. Nambope, pakukula mwanacheju akusachilila kumanyilila chenene kwanga kwa chiwusyo chila. Jwalakwe akuyiwona kuti yili yakusawusya kuti chindu chipagwe pali pangali ŵakuchipanganya. Ligongo atamose kwinani ni chilambo chapasichi pana juŵayipanganyisye. Kaneko jwalakwe akuliwusya kuti, ‘Ana Mlungu jwatyochele kwapi?’

Ana Baibulo jikusajanga wuli chiwusyo chelechi? Jikusajanga mwakulandana ni yatesile nangoloju pakumjanga mwanache jula. Mwambone Mose jwalembile kuti, “AMBUJE, . . . mkanagapanganye matumbi, atamose mkanachipanganye chilambo ni pakutama ŵandu, ŵalakwe ali Mlungu kutandilila kwa yaka mpaka yaka yosope.” (Salimo 90:1, 2) Nambosoni jwakulochesya Yesaya jwasasile kuti, “Ana ngimkumanyilila? Ana nganimpikana? AMBUJE, ali Mlungu jwachitamile jwangamala, juŵapanganyisye chilambo chapasi.” (Yesaya 40:28) Mwakulandana ni yeleyi Yuda m’chikalata chakwe jwasasile kuti Mlungu apali “kutandila mkanijitande ndaŵi.”​—Yuda 25.

Mwakamulana ni yaŵasasile ndumetume Paulo pakwamba ya Mlungu, malembaga gakulosya kuti Mlungu ali “Mwenye jwampaka kalakala.” (1 Timoteo 1:17) Yeleyi yikugopolela kuti Mlungu jupali kutandila kalakala soni atamose tuli tuganichisye mwakusosokoka chamtuli nganituŵa tupatile pajwatandile. Nambosoni jwalakwe chachiŵape mpaka kalakala. (Chiwunukuko 1:8) Mfundo jeleji jikupeleka umboni wakusimichisya kuti jwalakwe ali Jwamachiligosope.

Ligongo chichi yeleyi yili yakusawusya kuyipikanichisya? Ligongo lyakuti ŵanduwe tukusatama ni umi kwa yaka yamnono pakulandanya ni ndaŵi ja Yehofa. Nambosoni ligongo lyakuti Mlungu ali jwampaka kakakala, kwa jwalakwe yaka 1,000 yili mpela lisiku limo. (2 Petulo 3:8) Mwachisyasyo, ana chitete chachikusatama ni umi masiku 50 basi mpaka chipikanichisye yakuti ŵanduwe tukusatama ni umi kwa yaka 70 kapena 80? Yili yakusawusya. Ni ligongo lyakwetu Baibulo jikusasala kuti tuli mpela yitete pakutulandanya ni Mkupanganya jwetu Jwamkulungwa. Atamosesoni kaganisye ketu kali kakupelembela mnope pakukalandanya ni ka jwalakwe. (Yesaya 40:22; 55:8, 9) Myoyo yili yangasimonjesya kuti ŵanduwe nganituŵa tupikanichisye yindu yine yakwamba Yehofa.

Atamose kuti mfundo jakuti Mlungu ali jwandaŵi syosope jili jakusawusya kujipikanichisya, nambope jili jakuwona. Naga mundu jwinejwakwe ŵampanganisye Mlungu nikuti jwalakwejo akaliji Mkupanganya. Baibulo jikusasala kuti Yehofa ni ‘juŵapanganyisye yindu yosope.’ (Chiwunukuko 4:11) Konjechesya pelepa tukumanyilila kuti ndaŵi jine kwinani soni chilambo chapasichi nganiyipagwa. (Genesesi 1:1, 2) Nambi yeleyi yatyochele kwapi? Chandanda pasosekwe Mkupanganya. Jwalakwe jwapalisoni kuli kwangali yakupanganyikwa yalunda mpela Yesu soni malayika. (Yobu 38:4, 7; Akolose 1:15) Yili yakupikanika kuti jwalakwe jwaliji jika pandanda. Mlungu nganapanganyidwa ni jwalijose soni pangali chilichose chachikampanganyisye jwalakwejo.

Kupanganyidwa kwa ŵanduwe soni kwinani ni chilambo chapasi yili umboni wamachili wakulosya kuti Mlungu apali. Jwalakwe jwatamilikasisye malamusi gayikusajendela yindu yiŵapanganyisye kwinani soni pachilambo chapasi pano. Yeleyi yikutusimichisya kuti jwalakwe ali jwandaŵi syosope. Nambosoni jwalakwe ni jwakusapeleka umi wa chindu chilichose.​—Yobu 33:4.