Ngani syambone sikusatyochela kwa Yehofa, Mlungu jwakusangalala, jwakusasaka kuti maŵasa gasangalaleje. (1 Timoteo 1:11) Jwalakwe ŵatandisye ulombela. Kulombana mwa lilamusi kuli kwakusosekwa kuti liŵasa liŵe lyakusangalala ligongo ŵanache akusakola malo gambone gakwalelela. Aklistu akusosekwa kuya malamusi ga kumalo kwakutama gakwamba ya kulembesya ulombela. ​—Aŵalanje Luka 2:1, 4, 5.

Ana Mlungu akusawuwona chamtuli ulombela? Jwalakwe akusasaka kuti uŵe mkamulano wangamala wa jwamlume ni jwamkongwe. Yehofa akusasaka kuti ŵalombane aŵeje ŵakulupichika kwa jwine ni mjakwe. (Ahebeli 13:4) Jwalakwe akusaŵengana ni kumasya ulombela. (Malaki 2:16) Nambo akusakunda Aklistu kumasya ni kulombela kapena kulombegwasoni naga mjawo atesile chikululu.​—Aŵalanje Mateyu 19:3-6, 9.

Yehofa ŵapanganyisye jwamlume ni jwamkongwe kuti akamusyanganeje. (Genesesi 2:18) Jwamlume pakuŵa ali mtwe wa liŵasa, akusosekwa kulipatila liŵasa lyakwe yindu yakusosechela pa umi, soni kulijiganya liŵasalyo pakwamba ya Mlungu. Akusosekwa ŵanonyeleje mnope ŵamkwakwe. Ŵalombane akusosekwa kunonyelanaga, soni kuchimbichisyanaga. Pakuŵa achalume ni achakongwe wosope ali ŵangali umlama, kukululuchilana kuli kwakusosekwa mnope kuti asangalaleje mu ulombela.​—Aŵalanje Aefeso 4:31, 32; 5:22-25, 33; 1 Petulo 3:7.

Naga akusimana ni yakusawusya mu ulombela wawo, jemanja wosope mkusosekwa kulingalinga kuŵechetanaga ni kutendelanaga yindu mwachinonyelo. (1 Akolinto 13:4, 5) Maloŵe  ga Mlungu gangalimbikasya kuwunduka pakusaka kumasya yakusawusya.​—Aŵalanje 1 Akolinto 7:10-13.

Yehofa akusasaka kuti msangalaleje. Jwalakwe akusasala yampaka mtende kuti msangalaleje pa unyamata wenu. Akusasaka kuti lunda, soni yindu yasimene nayo achinangolo ŵenu yimkamuchisyeje jemanja. (Akolose 3:20) Yehofa akusasakasoni kuti jemanja mkuwone kusangalasya kwakumtumichila Mkupanganya jwenu ni Mwanagwe.​—Aŵalanje Jwakulalichila 11:9–12:1; Mateyu 19:13-15; 21:15, 16.

Akusosekwa kulingalinga mnope kwapatila ŵanache ŵawo yakulya, pakugona, soni yakuwala. (1 Timoteo 5:8) Nambo kuti ŵanache ŵawo asangalaleje, akusosekwasoni kwajiganya kunonyela Mlungu, soni kulijiganya kutyochela kwa jwalakwe. (Aefeso 6:4) Chisyasyo chawo chambone chakumnonyela Mlungu mpaka chimkamuchisye mnope mwanache jwawo. Naga akusiŵajamuka mwakamulana ni Maloŵe ga Mlungu, ni kuti chachakamuchisya ŵanachewo kuŵa ŵaganisya chenene.​—Aŵalanje Detulonomo 6:4-7; Misyungu 22:6.

Naga akwalimbikasya ni kwayamichila ŵanache ŵawo, yikusaŵa yakwakamuchisya. Akusasosekwasoni kwajongolela ni kwajamuka. Kutenda yeleyi kukusachenjela ku ndamo jampaka jatendekasye kuti akasangalalaga. (Misyungu 22:15) Nambope, chamuko chikaŵaga chakupundanganya kapena changalwe.​—Aŵalanje Akolose 3:21.

Mboni sya Yehofa sikusawandisya mabuku gaŵagalembile kuti gakamuchisye achinangolo ni ŵanache. Ngani sya m’mabukuga sili syakutyochela m’Baibulo.​—Aŵalanje Salimo 19:7, 11.