Kumtendela mundu jwine canasa kukusagopolela “kupikana mpela mwakupikanila mjetu mumtima, kapena kuliwanicisya mwampaka tupikanile m’weji tuli tusimene ni yakusawusya yakusimana nayo mjetu.” Dokotala jwine jwa ulwele wa nganisyo lina lyakwe Rick Hanson jwasasile kuti “wosopewe mwacipago, tukusasaka kwatendela ŵane canasa.”

AGANICISYE AYI: Mwakulekangana ni yinyama, ŵanduwe tukusakombola kwatendela ŵane canasa. Ana ligongo cici yili myoyo? Baibulo jikusasala kuti Mlungu ŵatupanganyisye ŵanduwe m’ciwanicisyo cakwe. (Genesesi 1:26) Ni ligongo lyakwe tukusakombola kumsyasya jwalakwe soni kulosya ndamo syakwe syambone. Kwatendela ŵane canasa kukusatutendekasya kuti twakamucisyeje. Yeleyi yikusalosya mwaŵelele Mkupanganya jwetu Jwacanasa, Yehofa Mlungu.—Misyungu 14:31.

Mlungu akusatutendela canasa m’weji mwamti yikusampweteka pakutuwona tuli mkulagasika. Pakwamba ya Ayisalayeli ŵaŵapilile ukapolo ku Iguputo soni yakusawusya yaŵasimene nayo m’cipululu kwa yaka 40, Baibulo jikusati, “Pa yipwetesi yawo yosope yaŵalagasikaga nayo, Mlungu nombe najo jwalagasikaga.” (Yesaya 63:9) Ngaŵa kuti Mlungu ŵagambagape kumanyilila yakusawusya yawo, nambo yampwetekagasoni mumtima. Jwalakwe jwatite, “Ngumanyilila yipwetesi yakulaga nayo.” (Ekisodo 3:7) Mlungu akusasalasoni kuti, “Pakuŵa jwalijose jwakumkwaya jemanja, nikuti akukwaya mwanace jwa m’liso lyangu.” (Sakaliya 2:8) Yeleyi yikugopolela kuti patukulagasika Mlungu yikusampweteka mumtima.

Atamose kuti tukusalijimbaga magambo soni kuliwona kuti tuli ŵangaŵajilwa canasa ca Mlungu, nambo Baibulo jikusatusimicisya kuti, “Mlungu ali jwamkulungwa kujipunda mitima jetu soni akusamanyilila yindu yosope.” (1 Yohane 3:19, 20) Mlungu akusatumanyilila cenene kupunda mwatukusalimanyilila acimsyewe. Jwalakwe akusamanyilila mwayiŵelele yindu paumi wetu, nganisyo syetu, soni mwatukupikanila. Jwalakwe akwete canasa ni m’weji.

Malemba gakusatusimicisya kuti:

• Jemanja cimciŵilanga soni Yehofa cacijanga, cimcilila pamkusaka cikamucisyo ni jwalakwe cacijanga kuti, “une ndili apano.’”—YESAYA 58:9.

• “‘Yehofa akusala kuti, ‘Une ngumanyilila cenene yangwaganicisya jemanja. Nguganisya yakwapa mtendele kuti akole sogolo jambone soni cembeceyo, ngaŵaga yisawusyo.’ Nambosoni cacimbilanga ni kwisa kukupopela kwa une, soni une cinjapikanila.’”—YELEMIYA 29:11, 12.

• “Asunje misosi jangu mumsaku wawo wa lipende. Ana misosi jangu nganijiŵa m’buku jawo?”—MASALIMO 56:8.

Kumanyilila kuti Mlungu akusatutendela canasa kukusatutendekasya kuwa wakulimba patusimene ni yakusawusya. Aganicisye yayamtendecele Maria:

Jwalakwe jwatite, “Mnyamata jwangu jwa yaka 18 pajwalwasile ulwele wa kansa kwa yaka yiŵili ni kuwa, nayiweni kuti umi wangali mate basi soni namtumbilile Yehofa ligongo lyangamposya mwanangu.

“Pali pamasile yaka 6, mjangu jwacinonyelo soni jwacanasa jwa mumpingo wetu jwambikanilaga panasalaga munapikanilaga mumtima kuti Yehofa ngakusanonyela. Ŵambikanile kwa ndaŵi jelewu mwangangata maloŵe, kaneko jwakolasile lilemba lyalyangamucisye lya 1 Yohane 3:19, 20, lyalikusati, ‘Mlungu ali jwamkulungwa kujipunda mitima jetu soni akusamanyilila yindu yosope.’ Jwalakwe jwasasile kuti Yehofa akusapikanicisyaga yakusawusya yatukusimana nayo.

“Atamose kuti ŵangamucisye, nambope nganindeka kumtumbilila Yehofa. Ni kaneko naŵalasile Masalimo 94:19 lyalikusati, “Panalagaga mnope nganisyo, ŵangamucisye soni ŵandamice mtima pasi.” Panamalisisye kuŵalanga nalipikene mpela kuti lilembali ŵalembile une. Pambesi pakwe, mtima wangu watemi pasi mwamti namsalile Yehofa yakusawusya yanasimanaga nayo pakumanyilila kuti akusatupikanicisya.”

Yili yakulimbikasya kumanyilila kuti Mlungu akusatupikanicisya soni yikusamkwaya patukusimana ni yakusawusya. Nambo ana ligongo cici tukusimana ni yipwetesi yejinji? Ana ligongo lyakuti Mlungu akutupa cilango pa yakulemwa yetu? Ana Mlungu catendepo kandu kuti amasye yipwetesi yosopeyi? Yiwusyo yeleyi yicijanjidwa mu ngani syakuyicisya.