1. Atamose kuti Yehofa ali Jwaulamusi Wosope, ana aŵele ali mkwasalila ŵandu kuti atende cici?

YEHOFA ali Jwaulamusi Wosope, Mkupanganya jwa yindu yosope, soni ali Msyene lunda ni macili gosope. Yobu ŵamanyililagasoni yeleyi. Yehofa ali am’wusisye jwalakwe yiwusyo yakwamba yam’cipago, Yobu ŵajanjile kuti, “Ngumanyilila kuti ŵalakwe akusakombola kutenda yosope, soni pangali yampaka yaleme.” (Yobu 42:2) Yehofa mpaka atende cilicose casacile pali pangali mundu jwakumkamucisya. Nambope kutandila kalakala jwalakwe mwacinonyelo aŵele ali mkwasalila ŵane kuti akamule najo masengo ni lisosa lyakuti akwanilisye cakulinga cakwe.

2. Ana Yehofa ŵampele Yesu masengo gakusosekwa gapi?

² Mlungu mkanapanganye cilicose ŵatandite ni kupanganya Mwanagwe jwausimu. Yehofa ŵamkundile Mwanacejo kamula najo masengo gakupanganya yindu kupwatikapo yausimu. (Yoh. 1:1-3, 18) Pakwamba ya Yesu, ndumetume Paulo ŵatite, “Kupitila mwa jwalakwe  yindu yosope yapanganyikwe, yakwinani ni yapacilambo capasi. Elo, yindu yakuwoneka ni yangawoneka, cinga yitengu yaucimwene, kapena acambuje, kapena maboma, kapena maulamusi. Yindu yine yosope yapanganyikwe kupitila mwa jwalakwe soni ligongo lya jwalakwe.” (Akolo. 1:15-17) Yeleyi yikulosya kuti Yehofa ŵamcimbicisye mnope Mwanagwejo pakumpa masengo gakupanganya nawo yindu soni pakwasalila ŵandu ukumu wa Mwanagwejo.

3. Ana Yehofa ŵampele Adamu masengo gapi soni ligongo cici?

³ Yehofa akusasakasoni kuti ŵandu akamuleje najo masengo. Mwambone, jwalakwe ŵampele Adamu masengo gakuti apelece mena kwa yinyama yosope. (Gen. 2:19, 20) Adamu ŵasangalele mnope ni masengo gaŵampelega. Jwalakwe ŵacilolecesyaga cinyama cilicose, kulola mwacikusatendela yindu, kaneko ni ganicisya ya lina lyampaka liŵe lyakuŵajilwa. Yehofa akakombolece kupeleka jika mena kwa yinyama yosope ligongo jwalakwe ni juŵayipanganyisye. Nambo, mwacinonyelo jwalakwe ŵampele masengogo Adamu. Mlungu ŵampelesoni Adamu masengo gakukusya Paladaiso. (Gen. 1:27, 28) Nambo cakutesya canasa cili cakuti Adamu ŵakanile kamula masengo ni Mlungu, yayatendekasisye kuti jwalakwe soni ŵanace ŵakwe wosope asimaneje ni yakusawusya.—Gen. 3:17-19, 23.

4. Ana ŵandu ŵane ŵakamwile mwatuli masengo ni Mlungu kuti akwanilisye cakulinga cakwe?

⁴ Mkupita kwandaŵi, Mlungu ŵapelesoni ŵandu ŵane masengo kuti cakulinga cakwe cikwanilicikwe. Mwambone, Nowa ŵataŵile combo cacakamucisye kuti jwalakwe soni liŵasa lyakwe akulupuce pacigumula. Mose ŵakulupwisye Ayisalayeli ku Iguputo. Yoswa ŵalongolele Ayisalayeli ni kwinjila nawo m’Cilambo Celagucisye. Solomoni ŵataŵile nyumba ja Mlungu ku Yelusalemu. Maliya ŵaŵele mamagwe Yesu. Ŵandu ŵakulupicikaŵa soni ŵane ŵajinji ŵakamwile masengo ni Yehofa pakwanilisya cakulinga cakwe.

5. Ana mpaka tukamule nawo masengo gapi, soni ana Yehofa yikamlemile kamula jika masengoga? (Alole ciwulili cacili kundanda kwa nganiji.)

⁵ Moŵa agano, Yehofa akusaka kuti tukamuleje najo masengo gakamucisya Ucimwene wa Mesiya. Pana matala gamajinji gakutumicilila Mlungu. Atamose kuti wosopewe nganituŵa tukombwele kutumicila Mlungu mwakulandana, nambope mpaka tukamule nawo masengo gakulalicila ngani syambone syakwamba ya Ucimwene. Yehofa akakombolece kamula jika masengoga. Akakombolece kwalalicila jika ŵandu ŵapacilambo capasi jwalakwe ali kwinani. Yesu ŵasasilesoni kuti Yehofa mpaka akamulicisyesoni masengo maganga pakwenesya Ucimwene wa Mesiya. (Luk. 19:37-40) Nambo Yehofa ŵasacile kuti tuŵe “ŵamasengo acimjakwe.” (1 Akoli. 3:9) Ndumetume Paulo ŵalembile kuti, “Patukukamula najo masengo yimpepe, tukwadandawulilasoni kuti akapocela umbone mtima wekulungwa wa Mlungu ni kuleka cakulinga ca umbone mtimawo.” (2 Akoli. 6:1) Kamula masengo ni Mlungu kuli upile wekulungwa, soni kukusatutendekasya kuŵa ŵakusangalala. Kwende tulole magongo gatukuŵecetela yeleyi.

6. Ana mwanace jwandanda jwa Mlungu ŵasasile yatuli pakwamba ya kamula masengo ni Atatigwe?

⁶ Kutandila kalakala, ŵakutumicila ŵa Yehofa aŵele ali mkusangalala pakamula masengo ni Mlungu. Mwanace jwa Mlungu jwandanda kupagwa mkanayice pacilambo capasi ŵatite, “Yehofa ŵambanganyisye mpela ndanda ja litala lyakwe . . . naliji pambali pakwe mpela m’misili jwamkulungwa. Lisiku ni lisiku jwalakwe ŵaliji mkusangalala mnope ni une. Unejo naŵaga jwakusangalala pameso pakwe ndaŵi syosope. (Miy. 8:22, 30) Yesu ŵasangalalaga kamula masengo ni Atatigwe ligongo ŵatesile yindu yejinji soni ŵamanyililaga kuti Yehofa ŵamnonyelaga. Wuli pakwamba ya m’weji?

7. Ligongo cici masengo gakulalicila gakusatukamucisya kuŵa ŵakusangalala?

 ⁷ Yesu ŵasasilesoni kuti tukusasangalala patukupeleka soni kupocela yindu. (Mase. 20:35) Twasangalele mnope patwapocele usyesyene. Tukusasangalalasoni patukwagaŵila ŵane usyesyenewo. Patukwagaŵila ŵane usyesyene ŵa m’Baibulo, tukusitwawona ŵandu ŵasala jausimu ali mkusangalala ligongo lyakummanyilila ni kum’yamicila Mlungu jwetu, soni ligongo lya usyesyene wawukusasimanikwa m’Maloŵe gakwe. Tukusasangalala mnope patukwawona ŵandu ŵeleŵa ali mkucenga nganisyo soni yitendo yawo. Tukusamanyilila kuti masengo gakwagaŵila ŵane usyesyene gali gakusosekwa mnope. Gakusawugula litala lyakuti ŵandu ŵakamulana ni Mlungu akapocele umi wangamala. (2 Akoli. 5:20) Ana panasoni masengo gane gakusangalasya mnope kupunda gakwakamucisya ŵandu kuti catame ni umi kwangamala?

8. Ana ŵandu ŵane aŵecete yatuli pakwamba ya cisangalalo cacikusayika ligongo lyakamula masengo ni Yehofa?

⁸ Ŵandu papocele cenene utenga wetu tukusasangalala. Tukusasangalalasoni kumanyilila kuti Yehofa akusangalala ni masengo getu soni kuti akusayamicila mtawu watukusakola patukumtumicila jwalakwe. (Aŵalanje 1 Akolinto 15:58.) M’bale jwine jwa ku Italy lina lyakwe Morco ŵatite, “Ngusasangalala mnope kumanyilila kuti ngumpa Yehofa yindu yambone mnope, ngaŵaga mundu jwampaka aliŵalile mwangasawusya yandesile.” M’bale jwinesoni jwa ku Italy kukoko lina lyakwe Franco ŵatite, “Kupitila m’Maloŵe gakwe soni yindu yausimu yakusatupa, Yehofa akusatukumbusya lisiku lililyose kuti akusatunonyela soni kuti cilicose catukusamtendela jwalakwe cili cakusosekwa mnope, atamose kuti m’weji mpaka tuyiwone mpela yangasosekwa mnope. Ligongo lya yindu yeleyi ngusakuwona kamula masengo ni Mlungu kuŵa kwakusangalasya mnope.”

9. Ana unasi wawapali pasikati pa Yehofa ni Yesu waliji watuli soni ligongo cici?

⁹ Patukukamula masengo ni ŵandu ŵatukusanonyela, tukusalimbisya unasi wetu ni jemanjajo, soni tukusamanyilila umundu ni ndamo syawo. Tukusamanyilila yakulinga yawo soni yakusatenda kuti akwanilisye yakulingayo. Yesu ŵakamulaga masengo ni Yehofa kwa yaka mabiliyoni gamajinji. Yeleyi yakamucisye kuti aŵe paunasi wakulimba soni kuti anonyelaneje mnope. Pakusala ya unasi wawowo, Yesu ŵatite, “Une ni Atati tuli ŵamo.” (Yoh. 10:30) Jemanjaji ŵakamulanaga soni ŵakamulilaga masengo pamo.

10. Ligongo cici masengo gakulalicila gakusatutendekasya kum’ŵandicila Mlungu soni Aklistu acimjetu?

¹⁰ Yesu ŵam’ŵendile Yehofa kuti ŵalolele ŵakulijiganya ŵakwe. Ligongo cici? Jwalakwe ŵatite, “Kuti aŵe ŵampepe mpela mwatuŵelelesoni m’weji ŵampepe.” (Yoh. 17:11) Patukupikanila malamusi ga Mlungu soni kamula nawo masengo gakulalicila, tukusamanyilila cenene ndamo sya Mlungu. Tukusakuwonasoni kusosekwa kwa kumkulupilila jwalakwe soni kuya malamusi gakwe.  Patukum’ŵandicila Mlungu, jwalakwe akusatuŵandicilasoni. (Aŵalanje Yakobo 4:8.) Ligongo lyakuti tukwete cakulinga cakulandana ni abale soni alongo ŵetu, tukusasimana ni yakusawusya soni yindu yakusangalasya yakulandana. Yisyene, tukusakamulila yimpepe masengo, tukusasangalala pampepe, soni tukusapilila yakulingwa pampepe. Mlongo jwine jwa ku Britain lina lyakwe Octavia ŵatite, “Kamula masengo ni Yehofa kungamucisye kuŵandikana ni Aklistu acimjangu ligongo wosopewe tukamula masengo gakulandana soni tukwete cakulinga cakulandana.” Ana wawojo ngakusapikana mwakulandana ni mlongoju? Ana pakuwuwona mtawu wa Aklistu acimjawo ngakusasacilila kuŵa nawo paunasi wakulimba?

11. Ligongo cici m’cilambo casambano tucim’ŵandicila mnope Yehofa soni abale ŵetu?

¹¹ Mkamulano watukwete apano ni Mlungu soni ŵakulambila acimjetu mpaka uŵe wakulimba, nambo uciŵa wakulimba mnope m’cilambo casambano ca cilungamo. Agambe ganisya ya masengo gagali kusogoloku. Tukwembeceya kwimuka kwa ŵawe ŵacacisosekwa kwajiganya matala ga Yehofa. Cilamboci cicisosekwa kucilinganya kuti ciŵe paladaiso. Masengo gelega gaciŵa gekulungwa, nambo tucisangalala kamula masengoga mwakamulana mpela mbamba. Tucisangalalasoni patucicengaga ni kuŵa ŵamlama pasi pa Ucimwene wa Mesiya. Ŵandu wosope caciŵa ŵakamulana jwine ni mjakwe soni ni Mlungu jwawo, ‘jucacikwanilisya cakumbila ca cindu cilicose ca umi.’—Sal. 145:16.

12. Ana masengo gakulalicila gakusatuteteya mwatuli?

¹² Tukusosekwa kuwuteteya usimu wetu. Yili yangasawusya kujigalila kaganisye soni yitendo ya m’cilamboci ligongo lyakuti Satana ni jwakucilamulila soni ligongo lyakuti tuli ŵangali umlama. Msimu wacilamboci mpaka tuwuwanicisye ni mesi gakuwutuka gagakutuwutila kwine. Kuti tukajigalwa ni mesigo tukusosekwa kung’ambila mwamacili. Mwakulandana ni yeleyi, pakusasosekwa mtawu kuti tukajigalwa ni msimu wa cilambo ca Satanaci. Patukulalicila, tukusaganicisya mnope ya yindu yausimu yayili yakusosekwa mnope, ngaŵaga ya yindu yampaka yijonanje cikulupi cetu. (Afi. 4:8) Kulalicila kukusalimbisyasoni cikulupi cetu ligongo patukulalicila tukusakumbucila ya yilanga ya Yehofa soni cinonyelo cakwe. Kukusatukamucisyasoni kuti tukawula cakuwala cetu ca pangondo jausimu.—Aŵalanje Aefeso 6:14-17.

13. Ana m’bale jwine akusagawona mwatuli masengo gakulalicila?

¹³ Patukukamula masengo gakulalicila mwamtawu soni kutenda yindu yine yausimu, ngatukusaganicisya mnope ya yakusawusya yetu, soni yeleyi yikusatuteteya. Mwambone, m’bale jwine jwa ku Australia lina lyakwe Joel, ŵatite, “Kamula masengo gakulalicila kukusangamucisya kuti manyilile yayikutendekwa m’cilamboci. Kukusangumbusyasoni ya yakusawusya yakusimana nayo ŵandu soni ya umbone wumbatile ligongo lyakamulicisya masengo Maloŵe ga Mlungu paumi wangu. Kulalicila kungamucisyesoni kuŵa jwakulinondiya. Kukusandendekasyasoni kuti njegamileje kwa Yehofa soni kwa abale ni alongo acimjangu.”

14. Ligongo cici kwendelecela kulalicila kukusalosya kuti tukamula masengo ni msimu wa Mlungu?

¹⁴ Kulalicila kukusatukamucisya kumanyilila kuti msimu wa Mlungu ukutukamucisya. Aganicisye ayi: Tuwanicisye kuti atandite masengo gagaŵila ŵandu ŵa mumkuli wawo yakulya. Nambo ngasapocela malipilo galigose soni ngasiŵawucisya mbiya syakukamulicisya masengo. Nambi ana mpaka apikane wuli naga akuyiwona kuti ŵajinji ngakusaka yakulya yakwapayo, soni ŵane akwaŵenga ligongo lyagaŵa yakulyayo? Ana mpaka ajendelecele kamula masengogo? Mwangakayicila mpaka atenguce mnope ligongo  lyakuti ŵandu ngakwapocela cenene. Yeleyi mpaka yatendekasye kusaka kuleka masengogo. Mwakulekangana ni yeleyi, ŵajinjiwe tukwendelecela kulalicila caka ni caka pakamulicisya masengo yindu yetu mwangasamala kandu kuti ŵandu ŵane akutunyosya. Ana yeleyi ngayikulosya kuti msimu wa Mlungu ukutukamucisya?

15. Ana kulalicila ngani syambone kukusakamulana catuli ni lisosa lya Mlungu kwa ŵandu?

¹⁵ Masengo gakulalicila ngani syambone syakwamba ya Ucimwene gakusakamulana ni lisosa lya Yehofa kwa ŵandu. Jwalakwe ŵasakaga kuti ŵandu akawaga. Atamose kuti Adamu ŵalemwisye, Yehofa nganacenga lisosa lyakweli. (Yes. 55:11) Ni ŵalinganyisye yakwakulupusya ŵandu ku ulemwa ni ciwa. Pakusaka kuti lisosali likwanilicikwe, Yesu ŵayice pacilambo capasi ni kupeleka umi wakwe mpela mbopesi kuti ŵawombole ŵandu ŵakupikanila. Nambo kuti ŵandu apikanile Mlungu ŵasosekwaga kumanyilila kaje yakusasaka jwalakwejo. M’yoyo, Yesu ŵajiganyisye ŵakulijiganya ŵakwe malamusi ga Yehofa, soni ŵasalile kuti atendeje yindu mwakamulana ni malamusigo. Patukwakamucisya ŵandu kamulanasoni ni Mlungu, tukusaŵa tuli mkwakulupusya ku ulemwa ni ciwa.

16. Ana masengo getu gakulalicila gakusakamulana catuli ni malamusi gekulungwa ga Mlungu?

¹⁶ Kwakamucisya ŵane kwenda pa litala lyakwawula ku umi wangamala kukusalosya kuti tukusanonyela mnope ŵandu soni Yehofa, “jwele lisosa lyakwe lili lyakuti ŵandu, cinga aŵe ŵamtundu watuli, akulupuce ni kuŵa ŵakumanyilila cenene usyesyene.” (1 Tim. 2:4) Mundu jwine ali am’wusisye Yesu ya lilamusi lyekulungwa mnope pa malamusi gosope gaŵapele Ayisalayeli, Yesu ŵajanjile kuti, “‘Mumnonyeleje Yehofa Mlungu jwenu ni mtima wenu wosope, umi wenu wosope, soni nganisyo syenu syosope.’ Lyeleli lili lilamusi lyekulungwa mnope soni lyandanda. Lyaŵili lyakulandana nalyo ni ali, ‘Mumnonyeleje mjenu mpela mwamkusalinonyelela mwasyene.’” (Mat. 22:37-39) Patukukamula nawo masengo gakulalicila, tukusalosya kuti tukusapikanila malamusi gelega.—Aŵalanje Masengo 10:42.

17. Ana akusapikana wuli mumtima ligongo lyakola upile wakulalicila ngani syambone?

¹⁷ Yehofa atujaliwe mnope pakutupa masengo gagakusatutendekasya kuŵa ŵakusangalala mnope, gagakusatukamucisya kum’ŵandicila jwalakwe soni acimjetu, soni gagakusatuteteya mwausimu. Masengoga gakusatupasoni upile wakulosya cinonyelo cetu kwa Mlungu soni kwa ŵandu ŵane. Atamose kuti ŵandu ŵa Mlungu pacilambo cosope akusasimana ni yakusawusya yakulekanganalekangana, nambope wosope, cinga ŵacinandipile kapena ŵacikulile, ŵakusicila kapena ŵakulaga, ŵakwete macili kapena ŵacekulupe soni ŵakulwala, akupata matala gakwasalila ŵane ya cikulupi cawo. Mwangakayicila, mpaka ajiticisye yaŵasasile Chantel jwakusatama ku France. Jwalakwe ŵatite, “Mlungu jwakusangalala, juŵapanganyisye yindu yosope akusalila une kuti, ‘Mjawule, mkambecetele, mkaŵecete mwakutyocela pasi pa mtima. Cinampe macili gangu, Baibulo, malayika, acimjenu ŵakamusyana nawo, majiganyo, soni malamusi gakumkamucisya pandaŵi jakuŵajilwa.’ Uli upile wekulungwa kamula masengo gatutumile Yehofa pampepe ni jwalakwe msyene.