PANA abale ni alongo ŵajinji ŵakutumicila m’mikuli jakusosecela ŵakulalicila ya Ucimwene ŵajinji. Nambo mwa jemanjaji mwana alongo ŵajinji ŵanganaŵa peŵasa. Ŵane mwa alongoŵa aŵele ali mkutumicila m’yilambo yine kwa yaka yejinji. Ana cici cacakamucisye jemanjaji kuti akombole kusamila ku yilambo yine? Ana ŵalijiganyisye yatuli paŵatumicilaga m’yilambo yineyo? Ana apatile majali gatuli ligongo lya yaŵatesileyi? Twaŵecetene ni ŵajinji mwa alongoŵa. Naga wawojo ali mlongo jwanganaŵa peŵasa, soni ali ŵakusacilila mnope kutenda nawo undumetume wakusangalasyawu, nikuti yaŵasasile alongoŵa ciyakamucisye mnope. Tukulupililasoni kuti yisyasyo ya alongo ŵeleŵa ciyakamucisye abale ni alongo wosope.

Ana akusakayicila naga mpaka akakombole kutumicila cenene m’cilambo cine mpela mpayiniya jwanganaŵa peŵasa? Anita, jwakwete yaka 75, ŵalikayicilaga mnope kuti nganaŵa akombwele kutumicila m’cilambo cine. Jwalakwe ŵakulile ku England, kuŵatandite kutenda upayiniya ali akwete yaka 18. Anita ŵasasile kuti, “Nanonyelaga kwajiganya ŵandu yakwamba Yehofa, nambo nayiwonaga kuti nganimba ngombwele kuja kutumicila ku cilambo cine. Naliji mkaninalijiganyepo ciŵeceto cilicose soni naliwonaga kuti nganimba ngombwele kulijiganya atamose cimo. M’yoyo, paŵambilasile kuti ngajinjile Sukulu ja Gileadi, nalasile mnope nganisyo. Nasimonjile mnope kuti mundu jwangali mate mpela une mpaka yikombolece wuli kupocela upile welewu. Nambope, naganisisye kuti, ‘Naga Yehofa akuganisya kuti mpaka ngombole kutenda yeleyi, cilinjilile.’ Yeleyi yatendekwe yaka 50 yipiteyo. Kutandila ndaŵi jelejo, mbele ndili mkutumicila mpela m’mishonale ku Japan.” Anita ŵajonjecesye kuti, “Ndaŵi sine ngusinasalila alongo ŵacisikana kuti, ‘Mkolecele yikwama yenu kuti tuŵe yalumo mu ulendo wapajika wandaŵi syosopewu.’ Ngusangalala mnope ligongo ŵajinji atesile yeleyi.”

Alongo ŵajinji ŵaŵele ali mkutumicila ku yilambo yine, pandanda ŵakayicilaga yakuti asamile ku yilambo yineyo. Ana jemanjaji ŵapatile catuli macili?

Maureen, jwakwete yaka 64 ŵasasile kuti, “Panakulaga nasacililaga kutenda yindu yakwakamucisya ŵane.” Paŵakwete yaka 20, jwalakwe ŵasamile mu upande wa Quebec, m’cilambo ca Canada, kukwasosecelaga apayiniya ŵajinji. Maureen ŵasasilesoni kuti, “Mkupita kwa ndaŵi, naŵilanjidwe ku Sukulu ja Gileadi, nambo najogopaga kuti cakandumisye kumalo kwanganinakumanyililaga soni kwangali acimjangu. Nadandawulagasoni kuti cinalece mama ŵaŵasamalilaga baba ŵangu ŵaŵaliji ali mkulwala mnope. Kwa masiku gejinji, nam’ŵendaga Yehofa cilo cilicose kwineku ndili mkulila kuti angamucisye pa ngani jeleji. Panaŵecete ni  acinangolo ŵangu ya yindu yayandagasyaga nganisyo, jemanjajo ŵalimbikasisye kuti njawule ku sukuluko. Nayiwenisoni muwatendelaga mpingo wetu pakwakamucisya acinangolowo. Pakulola mwele Yehofa ŵakamucisyaga, yangamucisye kumanyilila kuti jwalakwe cakasamalileje. M’yoyo, naliji jwakoseka kuti njawule.” Kutandila mu 1979, Maureen ŵaŵele ali mkutumicila mpela m’mishonale ku West Africa kwa yaka yakupunda 30. Apano, Maureen akutumicilape mpela mpayiniya jwapajika ku Canada, kwineku ali mkwasamalila mamagwe. Pakuganicisya ya yaka yaŵaŵele ali mkutumicila ku cilambo cine, jwalakwe ŵatite, “Ndaŵi syosope Yehofa ŵambaga yindu yanasosecelaga soni pandaŵi jakwe.”

Wendy, jwa ku Australia, jwakwete yaka 65 ŵatandite kutenda upayiniya ali akwete yaka 14. Jwalakwe ŵasasile kuti, “Naliji jwawoga mnope soni yasawusyaga kuŵecetana ni ŵandu ŵacilendo. Nambo kutenda upayiniya kwangamucisye kuti ngomboleje kuŵecetana ni ŵandu ŵamitundu josope, m’yoyo natandite kulimba mtima. Kaneko, nayiweni kuti kulimba mtima nganijiŵa ngani kwa une. Upayiniya wanjiganyisye kuti namjegamileje Yehofa, soni natandite kola nganisyo syakuti ngatumicileje ku cilambo cine. Nambosoni, mlongo jwine juŵatumicile ku Japan kwa yaka yakupunda 30 ŵasalile kuti tujawule yimpepe ku Japan kuti tukalalicile kwa miyesi jitatu. Kutumicila yimpepe ni mlongoju kwandendekasisye kuti sacilile mnope kuja kutumicila ku cilambo cine.” Mu 1986, Wendy ŵasamile ku cilumba ca Vanuatu, cacili pa lutando lwa makilomita 1,770 cakungopoko lyuŵa kwa Australia.

Wendy ali ciŵela ku Vanuatu, soni apano akutumicila pa ofesi jagopolela mabuku. Jwalakwe ŵasasile kuti, “Ngusasangalala mnope kulola mwele makuga soni mipingo jikusapagwila m’mikuli jakumisi. Kola mbali pamasengo ga Yehofa ku yilumba yeleyi uli upile wekulungwa mnope wanganimba nawulondesye.”

Kumiko, jwele apano akwete yaka 65, ŵatendaga upayiniya wakutamilicika ku Japan. Kaneko mjakwe juŵatendaga najo upayiniya ŵam’ŵendile kuti asamile yalumo ku Nepal. Kumiko ŵasasile kuti, “Jwalakwe ŵambendaga yeleyi mwakuwilisyawilisya, nambo nakanaga. Nadandawulaga kuti cingasosekwe kulijiganya ciŵeceto cine soni kucenga yindu yine kuti ngakombole kutama malo gasambano. Cakusawusya cine caliji kupata mbiya syakuti ngakamulicisyeje masengo ku cilamboco. Ndili mkuganicisyape yakuti sagule, lisiku line natesile ngosi pa njinga jamoto mpakana ŵangonece m’cipatala. Ndili m’cipatalamo naganisisye kuti, ‘Ngangumanyilila campaka cindendecele kaneko, mwine mpaka ndwale mnope ni kwasa upile wakuja kutumicila ku cilambo cine. Ana nganimba ngombwele kwamba kuja kutumicila kwa caka cimope?’ Napopelaga kwa Yehofa ndaŵi ni katema kuti angamucisye kutenda yeleyi.” Paŵakopwece m’cipatala, Kumiko ŵapite kukulola ku Nepal, soni kaneko jwalakwe ni mjakwe jula ŵasamileko.

 Pakuganicisya ya yaka 10 yaŵele ali mkutumicila ku Nepal, Kumiko ŵasasile kuti, “Yakusawusya yanayidandawulaga yila yandukwice mpela mujatendele Nyasa Jecejewu. Ngusangalala mnope ligongo lyakuti nasagwile kutumicila kwakusosecela ŵakulalicila ŵajinji. Ndaŵi syejinji patukulalicila pa nyumba jimo, akusayika ŵandu ŵane ŵakuŵandicila panyumbajo ŵakwana 5 kapena 6 kukupikanila nawo. Atamose ŵanace akusambenda mwakunjimbicisya kuti nagaŵile kapepala kakusala ya Baibulo. Yili yakusangalasya mnope kulalicila mu mkuli welewu.”

Yili yangakayikasya kuti alongo ŵakulimbicila ŵatwaŵecete nawoŵa ŵasimenaga ni yakusawusya. Ana ŵamalanaga nayo catuli?

Diane jwa ku Canada, jwakwete yaka 62 ŵasasile kuti, “Pandanda yasawusyaga mnope kutama kwakutalikangana ni ŵamwiŵasa mwangu.” Jwalakwe aŵele ali mkutumicila mpela m’mishonale ku Côte d’Ivoire kwa yaka 20. Diane ŵasasilesoni kuti, “Nam’ŵendaga Yehofa kuti angamucisye kuti nanonyeleje ŵandu ŵa mumkuli unatumicilaga. M’bale Jack Redford juŵatujiganyaga ku Gileadi, ŵatulondecesye kuti pandanda mpaka tulagasiceje nganisyo pakulola mwayiŵelele yindu kumalo kwatukutumicilako, mnopemnope patukutumicila kumalo kwakulaga mnope. Nambo ŵatusalile kuti, ‘Mkasim’ŵikaga nganisyo pa kulagako. Nambo mlolecesyeje mwasikuwonecela ngope soni meso ga ŵandu. Mlolecesyeje yakutenda papikene usyesyene wa m’Baibulo.’ Yeleyi ni yanatendaga, soni yangamucisye kwabasi! Panalalicilaga utenga wakutondoya wakwamba ya Ucimwene wa Mlungu kwa ŵandu, nagawonaga meso gawo gali mkulangucilwa.” Ana cindu cine capi cacamkamucisye Diane kuti akombole kucenga yindu? Jwalakwe ŵatite, “Nanonyelaga mnope ŵandu ŵanajiganyaga Baibulo soni nasangalalaga mnope kwawona ali mkuŵa ŵakutumicila ŵa Yehofa ŵakulupicika. Kumalo kunatumicilaga kwaŵele mpela kumangwangu. Napatile mwanja mama, baba, acimwene soni cemwali ŵausimu, mpela muŵalagucisye Yesu.”—Maliko 10:29, 30.

Anne, jwakwete yaka 46, akusatumicila ku Asia kwele masengo getu ŵagalekasisye. Jwalakwe ŵasasile kuti, “Kwa yaka yosope yambele ndili mkutumicila m’mikuli jakulekanganalekangana m’yilambo yine, mbele ndili mkutama ni alongo ŵele kumangwawo soni umundu wawo yili yakulekangana mnope ni une. Ndaŵi sine, yeleyi yatendekasyaga kuti tukapikanganaga. Yeleyi payitendekwe, nalingagalingaga kusyoŵekana nawo mnope kuti nasimanyilile cenene ndamo syawo. Nalingagalingagasoni kuti nanonyeleje soni kutenda yindu mwakwaganicisya. Ngusangalala mnope ligongo lyakuti mtawu wanguwo wakamucisye kuti mbe pa unasi wambone mnope ni ŵandu ŵane, yayingamucisye kuti njendelecelepe ni undumetumewu.”

 Mu 1993, Ute, jwa ku Germany, jwele apano akwete yaka 53, ŵamtumisye kuti akatumicileje mpela m’mishonale ku Madagascar. Jwalakwe ŵasasile kuti, “Pandanda, yasawusyaga kulijiganya ciŵeceto ca kweleko, kusyoŵelela nyengo jakwe, soni kupilila ulwele wa malungo, nambosoni tunyongolosi twakutandisya yilwele. Nambo ŵandu ŵangamucisye mnope. Alongo ŵa mumpingo unaliji, ŵanace ŵawo soni ŵanajiganyaga Baibulo ŵangamucisye mwakuwusimana mtima kuti nacikombole ciŵeceto ca kweleko. Mjangu junatendaga najo umishonale ŵasamalilaga mwacinonyelo panalwalaga. Nambo cakupunda pa yosope, Yehofa ni juŵangamucisye. Napopelaga kwa jwalakwe ndaŵi ni katema ni kumsalilaga yayikundagasya nganisyo. Ni najembeceyaga mwakuwusimana mtima, mwine kwa masiku kapena miyesi kuti jwalakwe ajanje mapopelo gangu. Yehofa ŵangamucisyaga pa cakusawusya cilicose.” Ute aŵele ali mkutumicila ku Madagascar kwa yaka 23.

Mpela abale ni alongo ŵane ŵakutumicila kwakusosecela ŵakulalicila ŵajinji, alongo ŵanganaŵa peŵasa ŵakutumicila m’yilambo yine akusasala kuti apatile majali gejinji ligongo lyakutumicila ku yilambo yine. Ana gane mwa majali gapatile jemanjaji gali gatuli?

Heidi, jwa ku Germany, jwele apano akwete yaka 73, aŵele ali mkutumicila mpela m’mishonale ku Côte d’Ivoire kutandila mu 1968. Jwalakwe ŵasasile kuti, “Cindu cakusangalasya mnope cambatile cili kwawona ŵanace ŵangu ŵausimu ali ‘mkwendelecelape kwenda mu usyesyene.’ Ŵane mwa ŵandu ŵanajiganyaga Baibulo apano ali apayiniya soni ŵane ali acakulungwa ŵa mumpingo. Ŵajinji mwa jemanjaji akusangolanga kuti Mama kapena Anganga. Jumo mwa acakulungwa ŵa mumpingoŵa ni ŵamkwakwe soni ŵanace ŵakwe akusambona mpela nangolo jwawo jusyesyene. M’yoyo, Yehofa ambele mwanace jwamlume, akwegwe, soni yisukulu yitatu.”—3 Yoh. 4.

Karen jwa ku Canada, jwakwete yaka 72, ŵatumicile ku West Africa kwa yaka yakupunda 20. Jwalakwe ŵatite, “Umi waumishonale wanjiganyisye kuti mbe jwakulipeleka, jwacinonyelo soni jwakuwusimana mtima. Nambosoni kamula masengo yimpepe ni ŵandu ŵamitundu jakulekanganalekangana kwangamucisye kuti nayiwoneje yindu m’litala lyakuŵajilwa. Nalijiganyisye kuti pana matala gakulekanganalekangana gakutendela yindu. Soni yili yakusangalasya mnope kuti mbatile acimjangu ŵakunonyelwa ŵakutyocela m’yilambo yakulekanganalekangana. Atamose kuti apano umi soni undumetume wetu ucenjile, nambo unasi wetu uli ciŵela.”

Margaret, jwa ku England, jwakwete yaka 79, ŵatumicile mpela m’mishonale ku Laos. Jwalakwe ŵatite, “Kutumicila m’cilambo cine kwangamucisye kulola mwele Yehofa akusiŵawutila ŵandu ŵamitundu josope kuti aŵe m’likuga lyakwe. Kuyiwona yeleyi kwalimbisye mnope cikulupi cangu. Ndili jwakusimicisya mnope kuti Yehofa akulongolela likuga lyakwe soni kuti lisosa lyakwe licikwanilicikwa.”

Kusala yisyene, alongo ŵanganaŵa peŵasa ŵakutumicila m’yilambo yine atesile yindu yapajika mnope mu mbili ja undumetume waciklistu. Tukusosekwa kwayamicila mnope jemanjaji. (Ower. 11:40) Cakusangalasya cili cakuti, ciŵalanjilo ca alongoŵa cikonjecekwa. (Sal. 68:11) Ana wowojo mpaka akombole kucenga yindu yine paumi wawo kuti akuye sajo sya alongo ŵamtawu ŵatuŵecetene nawo mu nganiji? Naga akutenda yeleyi, mwangakayicila ‘cacipasya ni kulola kuti Yehofa ali jwambone.’—Sal. 34:8.