Yiputiputi yikusalolaga, nambo pakuswele yejinji yikusakamulichisyaga masengo namaloŵe pakusaka kumanyilila yindu yayili chiŵandika. Yeleyi yikusakamuchisya chiputiputicho kumanyilila lutando lwalupali kutyochela pachili chiputiputicho kuja kwika pachili chindu chine. Ligongo lya yeleyi, yiputiputi yine mpaka yilekanganye ususu ni tulombo twine. Yiputiputiyi yikusamanyilila yeleyi pakujigalila kawutusye ka mapapiko ga yilomboyi payikuguluka.

 Aganichisye ayi: Yiputiputi yejinji yikusakoposya maloŵe kutyochela mumbula kapena pakamwa. Maloŵe gala gakusajendaga nikuja kuchigunda chindu. Kaneko gakusawujilasoni kuchili chiputiputi chila. Myoyo pakuŵa yiputiputi yana mawiwi gekulungwakulungwa, yikusakombola kupikana chenene namaloŵe. Namaloŵeji jikusachikamuchisyaga chiputiputi kulolaga munganisyo mwakwe yindu yayili pamalo gachiligo. Chiputiputi chikusambolasoni kumanyilila malo gachili chindu. Nambosoni chikusamanyililaga mwachitite kakwele chinducho mwinani soni lutando lwalupali kutyochela pachili chiputiputicho kuja kwika pachili chinducho. Chiputiputi mpaka chimanyilile yeleyi atamose yiputiputi yine yili mkutenda masegwe.

 Namaloŵe jikusasosekwa kuchikamuchisyaga chiputiputi kumanyilila malo gasyesyene gachili chindu chakusaka kuchikamula. Naga pana chindu chine chakuchisokonasya panandi atamose mwangakwana sekondi jimo, nikuti mpaka chilepeleje kamula tulombo. Ŵakuwungunya ŵane ŵapatile kuti, chiputiputi changakulusyaga pachikusaka kamula chindu. Kuwungunya kwine kulosisye kuti, chiputiputi pachitumisye maloŵe, chikusamanyililaga kuti chipamale ndaŵi jelewu chamtuli kuti maloŵe gala gawujilesoni kuchili chiputiputicho. Yeleyi yikusachikamuchisyaga chiputiputicho kumanyilila lutando lwalupali kuti chikayiche pachili chinducho mwangakulusya.

 Ŵakuwungunya apanganyisye ndodo jakwendela magesi jajikusakamulichisya masengo namaloŵe. Chakulinga chakwe chili chakuti jakamuchisyeje ŵandu ŵangalola kumanyilila yindu yayili chiŵandika ni jemanjajo. Ndodoji mpaka jakamuchisye kumanyilila yindu yampaka yawulasye mu mtwe pakwenda. Yinduyi mpaka yipwatichepo nyambi sya yitela. Achinamatetule ŵane (Brian Hoyle ni Dean Waters) ŵaŵapanganyisye ndodoji ŵatite, “Chachatukamuchisye kuti tupanganye ndodoji chili umanyilisi watwapatile kutyochela ku yiputiputi wakwayana ni kumanyilila kwakwe malo gayili yindu ligongo lya namaloŵe.”

 Ana wawojo akuganisya wuli? Ana mpaka tujile kuti lunda lwa yiputiputi lwakupakombola kumanyilila malo ga yili yindu ligongo lya namaloŵe lwapali mwajika jakwe? Kapena pana jwine jwaŵayipele lundalu?