Jesuseʼ tsʼoʼok u náatsʼal Betania, kex óoxpʼéel kilómetros yanil tiʼ Jerusalén, letiʼeʼ tiʼ lukʼ Pereaeʼ. María, u kiik Lázaro, yéetel Marta, u yíitsʼineʼ, yaachajaʼan u yóoloʼob úuchik u kíimil. Yaʼab máakoʼob taaljaʼanoʼob líiʼsik u yóoloʼob.

Aʼalaʼab tiʼ Martaeʼ táan u taal Jesús, ka bin u yáalkab u kʼam u beel. Martaeʼ tu yaʼalajtiʼ Jesús le baʼax ku tuklik yéetel María ichil le kanpʼéel kʼiinoʼob tsʼoʼok u máanoʼ: «Yuumtsil, wa way yanech kaʼacheʼ, bejlaʼa maʼ tu kíimil in wíitsʼineʼ». Baʼaleʼ maʼ tumen wa maʼatech u creertik le kaʼa kuxtaloʼ. Martaeʼ tu yaʼalaj: «In wojel jeʼel baʼalak ka a kʼáat tiʼ Dioseʼ, Dioseʼ yaan u tsʼáaiktech» (Juan 11:21, 22). Letiʼeʼ u yojel láayliʼ jeʼel u páajtal u yáantaʼal u yíitsʼin tumen Jesuseʼ.

Jesuseʼ tu núukaj: «A wíitsʼineʼ yaan u líikʼil». Martaeʼ tu tukleʼ táan u tʼaan Jesús tiʼ le kaʼa kuxtal kun antal way Luʼum, ku páaʼtik xan Abrahán yéetel uláakʼ máakoʼoboʼ. Letiʼeʼ tu yaʼalaj jach ku creertik yaan u yúuchul leloʼ: «Teneʼ in wojel yaan u líikʼil ken kaʼa kuxkíintaʼak le kimenoʼob teʼ tu tsʼook kʼiinoʼ» (Juan 11:23, 24).

Baʼaleʼ ¿yaan wa baʼax jeʼel wa u páajtal u beetik Jesús teʼ kʼiin jeʼeloʼ? Letiʼeʼ tu kʼaʼajsaj tiʼ Marta tsʼoʼok u tsʼaʼabal poder tiʼ tumen Dios yóokʼol le kíimiloʼ, tu yaʼalajtiʼ: «Le máax ku tsʼáaik u fe tiʼ teneʼ, kex ka kíimkeʼ yaan u kaʼa kuxtal. Tuláakal xan máax kuxaʼan yéetel ku tsʼáaik u fe tiʼ teneʼ, mix bikʼin kun kíimil» (Juan 11:25, 26).

Jesuseʼ maʼ táan u yaʼalik wa maʼ kun kíimil u disipuloʼobiʼ. Tak letiʼeʼ unaj u kíimil, jeʼex tsʼoʼok u yaʼalik tiʼ u apostoloʼoboʼ (Mateo 16:21; 17:22, 23). Baʼaxeʼ Jesuseʼ táan u yaʼalikeʼ le máaxoʼob ken u tsʼáa u fejoʼob tiʼ letiʼoʼ yaan u yantal kuxtal minaʼan u xuul tiʼob. Yaʼabeʼ unaj u kaʼa kuxkíintaʼaloʼob utiaʼal u yilkoʼob lelaʼ. Baʼaleʼ le máaxoʼob meyajtik Dios yéetel chúukaʼan óolal tak ken xuʼulsaʼak tiʼ le kʼasaʼan yóol kaabaʼ maʼ kun kíimloʼob mix bikʼin. Jeʼel máakalmáak tiʼ le kaʼa jaats ka yanakoʼonaʼ, k-ojel chéen junsúutuk ken k-kíimil.

Le ka tu yaʼalaj Jesús «teen le kuxtaloʼ, bey xan le kaʼa kuxtaloʼ», ¿táan wa u yaʼalik jeʼel u páajtal u kaʼa kuxkíintik Lázaro kex tsʼoʼok cuatro días kíimkeʼ? Letiʼeʼ tu yaʼalaj tiʼ Marta: «¿Ka creertik wa lelaʼ?». Letiʼeʼ tu núukaj: «Kin creertik, Yuumtsil; teneʼ tsʼoʼok in creertik teech le Cristo u Paal Dios, le Máax aʼalaʼan kun taal way yóokʼol kaaboʼ». Tumen yaan u fe jeʼel u páajtal u kaʼa kuxkíintaʼal Lázaro tumen Jesús teʼ súutuk jeʼeloʼ, bin u yaʼal tiʼ María, u yíitsʼin: «Le j-Kaʼansajoʼ way yaneʼ yéetel táan u tʼankech» (Juan 11:25-28). Ka jóokʼ teʼ najoʼ, u maasil máakoʼoboʼ joʼopʼ u binoʼob tu paach, tumen tu tukloʼob táan u bin teʼ tuʼux tsʼaʼan Lázarooʼ.

Baʼaleʼ Maríaeʼ bin yiknal Jesús, ka kʼucheʼ xolaj yiknal u yookeʼ ka tu yaʼalaj le baʼax aʼalaʼab xan tumen Martaoʼ: «Yuumtsil, wa way yanech kaʼacheʼ, bejlaʼa maʼ tu kíimil in sukuʼuneʼ». Ka tu yilaj Jesús táan u yokʼol María yéetel u maasil  máakoʼoboʼ, ka joʼopʼ u yokʼol xan, ka tak joʼopʼ u jóokʼol u jaʼil u yich. Lelaʼ jach kʼuch tu puksiʼikʼal le máaxoʼob yanoʼoboʼ. Baʼaleʼ yanoʼobeʼ joʼopʼ u yaʼalikoʼob: ‹Wa Jesús tu tsʼáaj u sáasilil u yich le máak chʼóopeʼ, ¿maʼ wa túun tu páajtal kaʼach u beetik wa baʼax utiaʼal maʼ u kíimil le máakaʼ?› (Juan 11:32, 37).