BAʼAX KU YAʼALIK LE BIBLIAOʼ: «Baʼaxoʼob ku maʼalob tukultaʼaloʼobeʼ maʼalob u jóokʼloʼob; baʼaxoʼob chéen [jáan] beetbileʼ maʼ uts [u] jóokʼoliʼ» (Proverbios 21:5).

BAʼAX U KʼÁAT U YAʼALE: Utiaʼal u jóokʼol maʼalob wa baʼaxeʼ yáaxeʼ kʼaʼabéet u kutal máak u tukle yéetel u beetik jeʼex tu tukultiloʼ. Kʼaʼajaktecheʼ maʼ tu páajtal k-manik tuláakal baʼal. Le oʼolaleʼ kanáant bix a xupik a taakʼin.

BAʼAX JEʼEL U PÁAJTAL A BEETKEʼ:

• Ilawil bukaʼaj jeʼel u páajtal a xupkeʼ. Tsʼíibt tiʼ baʼaxoʼob suuk a xuup yéetel ilawil máakalmáak maas kʼaʼanaʼaniʼ. Tsʼoʼoleʼ jóoʼs le bukaʼaj taakʼin kun meyajtech tiʼ cada junpʼéel baʼaloʼ. Wa ka wilik kʼaʼabéettech u maasil taakʼin utiaʼal a boʼotik wa baʼaxeʼ, chʼaʼ tiʼ uláakʼ baʼaloʼob maʼ jach kʼaʼabéet a manikiʼ. Jeʼex wa tsʼoʼok u yaʼabtal a xuup tiʼ gasolinaeʼ meyajnaktech le taakʼin a jóoʼsmaj kaʼach utiaʼal uláakʼ baʼaloʼob maʼ jach kʼaʼanaʼantak jeʼex a bin janal wa tuʼuxoʼ.

• Maʼ a pʼaxkaba. Maʼ a pʼaxkaba wa maʼ kʼaʼabéetiʼ. Maas maʼalob ka a líiʼs a taakʼin yéetel kéen chúukpajaktecheʼ ka manik le baʼax kʼaʼabéettechoʼ. Wa ku meyajtech tarjeta de creditoeʼ ilawil a boʼotik cada mes, beyoʼ maʼ tun cobrartbil tech interés. Wa yaan a pʼaaxeʼ, tukult bix ken a boʼotil yéetel ilawil a beetik jeʼex tsʼoʼok a tuklikoʼ.

  Tsʼoʼok u yilaʼaleʼ maas yaʼab taakʼin ku xupik máak wa ku meyajtiʼ tarjeta de crédito. Le oʼolaleʼ kanáant bix u meyajtech.

BAʼAX KU YAʼALIK LE BIBLIAOʼ: «Tu kʼiinil u péeksaʼal luʼumeʼ maʼakʼóoleʼ maʼ tu péeksik luʼum; baʼaleʼ le kéen kʼuchuk u kʼiinil joocheʼ mix baʼal bíin u [joche]» (Proverbios 20:4).

BAʼAX U KʼÁAT U YAʼALE: Juntúul máax maʼakʼóoleʼ jeʼel tak u kʼuchul u kʼiinil u yóotsiltaleʼ. Le oʼolaleʼ ilawil a meyaj yéetel kanáant bix a xupik a taakʼin, beyoʼ yaan u yantaltech baʼax kʼaʼabéet maas táanil.

BAʼAX JEʼEL U PÁAJTAL A BEETKEʼ:

• Tsʼáa a wóol meyaj. Wa ka tsʼáaik a wóol meyaj yéetel maʼalob bix a beetkeʼ, maʼ xaaneʼ maas maʼ kun jáan luʼsbiltech meyaj. Le patronoʼoboʼ uts tu tʼaanoʼob le máaxoʼob j-meeyjiloʼoboʼ.

• Maʼ a wookol. U yookol máakeʼ jeʼel u beetik u luʼsaʼal meyaj tiʼeʼ, u kʼaj óoltaʼal beyoʼ yéetel u talamtal u tsʼaʼabal meyaj tiʼ.

• Maʼ a tsʼíiboltik ayikʼaliloʼob. Le bix a wilik le taakʼinoʼ jeʼel u beetik a kʼojaʼantaleʼ wa jeʼel u beetik a náachtal tiʼ máaxoʼob u yaabiltmechoʼobeʼ. Kʼaʼajaktecheʼ le taakʼinoʼ maʼ letiʼe baʼax maas kʼaʼanaʼan ichil u kuxtal máakoʼ.

MAʼ A XUʼUXUPIK A TIEMPO YÉETEL A TAAKʼIN TIʼ YAANAL BAʼALOʼOB

«Tumen le kalaʼanoʼob yéetel le yaʼab u janaloʼoboʼ ku yóotsitaloʼob, maʼakʼóoloʼob xaneʼ ku búukbesikoʼob tsiʼitsik nookʼoʼob» (PROVERBIOS 23:21).

MAʼ A SEN CHIʼICHNAKTAL

«Xuʼuluk a chiʼichnaktaleʼex yoʼolal a kuxtaleʼex tu yoʼolal baʼax ken a jaanteʼex wa baʼax ken a wukʼeʼex, wa yoʼolal a wíinklileʼex tu yoʼolal baʼax ken a búukinteʼex» (MATEO 6:25).

MAʼ A TSʼÍIBOLTIK U MAASIL BAʼALOʼOB

«Juntúul máak maʼ tu conformar yéetel baʼax yaantiʼeʼ jach ku tsʼíiboltik ayikʼalil, pero maʼ u yojel wa óotsilil kun taal tu yóokʼoliʼ» (PROVERBIOS 28:22, TNM).