Dioseʼ tu yaʼalaj tiʼ Abraháneʼ «tuláakal le luʼumoʼob yaan yóokʼol kaaboʼ yaan u bendecirtaʼaloʼob» yoʼolal juntúul máax kun taal ichil u familia (Génesis 22:18). ¿Máax ta tʼaaniʼ?

Walajki dos mil añosaʼ Dioseʼ tu tsʼáaj poder tiʼ Jesús utiaʼal u beetik milagroʼob. Le milagroʼobaʼ tu yeʼeseʼ letiʼ le máax kun taal ichil u familia Abrahánoʼ yéetel tu yoʼolal kun bendecirbil tuláakal le kaajoʼoboʼ (Gálatas 3:14).

Yoʼolal le milagroʼob tu beetaj Jesúsoʼ páajchaj u yilaʼal letiʼ le profeta aʼalaʼan tumen Dios kun bendecirtik le máakoʼoboʼ. Lelaʼ ku yeʼesik xaneʼ letiʼ tsʼaʼan utiaʼal u béeykuntik tuláakal le baʼaxoʼob u tukultmaj Diosoʼ. Koʼox ilik máakalmáak le jatsʼuts modos tu yeʼesaj Jesús le ka tu beetaj milagroʼoboʼ.

Tu yaabiltaj u maasil yéetel tu tsʼakaj le kʼojaʼanoʼoboʼ

Juntéenjeakeʼ juntúul máak yaan lepra tiʼeʼ tu kʼáataj tiʼ Jesús wa jeʼel u tsʼakikeʼ. Jesúseʼ tu macheʼ ka tu yaʼalajtiʼ: «Teneʼ in kʼáat in tsʼakech». Ka tsʼoʼokeʼ lukʼ le lepra tu wíinklil le máakoʼ (Marcos 1:40-42).

Tu yeʼesaj utsil yéetel tu tséentaj u milesil máakoʼob

Jesúseʼ maʼ u kʼáat kaʼach ka u máans wiʼijil le máakoʼoboʼ. Letiʼeʼ tu beetaj junpʼéel milagroeʼ ka tu tséentaj u milesil máakoʼob chéen yéetel wa jaypʼéel waaj yéetel kayoʼob (Mateo 14:17-21; 15:32-38). Tuláakloʼob naʼajchajoʼob yéetel yaʼab janal pʼáat ka tsʼoʼoki.

Tu chʼaʼaj óotsilil yéetel tu kaʼa kuxkíintaj le kimenoʼoboʼ

Ka tu yilaj Jesús kíim u juntúuliliʼ hijo juntúul koʼolel kimen u yíichameʼ «tu chʼaʼaj óotsilil tiʼeʼ» ka tu kaʼa kuxkíintaj le xiʼipaloʼ (Lucas 7:12-15).