U millonesil máakoʼob tiʼ tuláakal yóokʼol kaabeʼ suuk u kʼiinbeskoʼob le Navidadoʼ tumen ku creertikoʼobeʼ letiʼe kʼiin ka síij Jesusoʼ. A tuklikeʼ le máaxoʼob máanoʼob yéetel Jesusoʼ, ¿tu kʼiinbesoʼob wa le Navidadoʼ? ¿Baʼax ku yaʼalik le Biblia yoʼolal le kʼiin kʼaabaʼoʼ? K-ojéeltik lelaʼ yaan u yáantkoʼon k-il wa unaj k-kʼiinbesik le Navidadoʼ.

Yáaxeʼ le Bibliaoʼ mix tuʼux ku yaʼalik wa beetaʼab u kʼiin u kʼaabaʼ Jesús. Mix tech u yaʼalik xan wa beetaʼab u kʼiin u kʼaabaʼ le máaxoʼob chúukpaj u yóol u meyajtoʼob Diosoʼ. Le Bibliaoʼ chéen ku tʼaan tiʼ kaʼatúul máaxoʼob tu beetaj u kʼiin u kʼaabaʼob baʼaleʼ mix juntúul tiʼ letiʼob ku adorartikoʼob Jéeoba, le Dios beet u tsʼíibtaʼal le Bibliaoʼ. Tsʼoʼoleʼ teʼ kʼiin kʼaabaʼoboʼ yaan baʼaxoʼob maʼ maʼalob beetaʼabiʼ (Génesis 40:20; Marcos 6:21). Junpʼéel enciclopediaeʼ ku yaʼalikeʼ le yáax cristianoʼoboʼ maʼ táakpajoʼob «teʼ kʼiin kʼaabaʼob ku beetik le máaxoʼob maʼatech u adorartikoʼob Diosoʼ» (Encyclopædia Britannicaoʼ).

Le Bibliaoʼ maʼatech u yaʼalik baʼax kʼiin ka síij Jesús. Junpʼéel diccionarioeʼ ku yaʼalik: «Minaʼan mix baʼal eʼesik baʼax kʼiin yéetel baʼax mesil ka síij Cristo» (Diccionario de historia de la Iglesia). Wa u kʼáat kaʼach Jesús ka beetaʼak u kʼiin u kʼaabaʼ tumen u disipuloʼobeʼ tsʼoʼok kaʼach u yaʼalik baʼax kʼiin ka síijeʼ.

U kaʼapʼéeleʼ le Bibliaoʼ maʼatech u yaʼalik wa Jesús yéetel u disipuloʼobeʼ tu kʼiinbesoʼob le Navidadoʼ. Junpʼéel enciclopediaeʼ ku yaʼalikeʼ le Navidadoʼ yáax chíikpaj tiʼ «le Cronógrafo Filócalo, junpʼéel calendario romano meyajnaj tu jaʼabil 336 [tsʼ.t.J.]» (New Catholic Encyclopedia). Jeʼex k-ilkoʼ lelaʼ beetaʼab yaʼab años tsʼoʼokok u tsʼíibtaʼal le Bibliaoʼ yéetel tsʼokaʼaniliʼ u máan yaʼab años kíimik Jesuseʼ. Tsʼoʼoleʼ uláakʼ enciclopediaeʼ ku yaʼalikeʼ le Navidadoʼ maʼ Dios aʼalmil ka beetaʼakiʼ yéetel mix teʼ Nuevo Testamento ku chíikpajloʼ (Cyclopedia de McClintock y Strong). *

Jesús, le nojoch j-kaʼansajoʼ, tu yaʼalaj tiʼ u disipuloʼob baʼax unaj u beetkoʼob, le baʼaloʼob tu yaʼalajtiʼobaʼ tiaʼan teʼ Bibliaoʼ. Chéen baʼaleʼ maʼ tu yaʼalajtiʼob ka u kʼiinbesoʼob le Navidadoʼ. Juntúul maestroeʼ ku páaʼtik maʼ u beetaʼal yaanal baʼal tiʼ le ku kaʼansikoʼ, Jesús xaneʼ maʼ u kʼáat ka beetaʼak baʼaloʼob minaʼanoʼob ichil «le baʼaxoʼob tsʼíibtaʼan» teʼ Bibliaoʼ (1 Corintoiloʼob 4:6).

Chéen baʼaleʼ le máaxoʼob meyajtik Diosoʼ yaan junpʼéel baʼal suuk u kʼiinbeskoʼob kaʼachi: u kʼiinil ka kíim Jesús. Letiʼeʼ tu yaʼalaj tiʼ u disipuloʼob baʼax kʼiin yéetel bix unaj u beetkoʼob. Le baʼaxoʼob tu yaʼaloʼ tiaʼan teʼ Bibliaoʼ (Lucas 22:19; 1 Corintoiloʼob 11:25).

Jeʼex tsʼoʼok k-ilkoʼ teʼ Navidadoʼ ku beetaʼal u kʼiin u kʼaabaʼ Jesús chéen baʼaleʼ maʼ teʼ Biblia u taaloʼ, le oʼolal le yáax cristianoʼoboʼ maʼ táakpajoʼobiʼ. Le Bibliaoʼ maʼatech u yaʼalik wa Jesús yéetel u disipuloʼobeʼ tu kʼiinbesoʼob le Navidadoʼ. Yoʼolal lelaʼ u millonesil máakoʼob ku beetkoʼob baʼax ku yaʼalik le Bibliaoʼ tsʼoʼok u chʼaʼtuklikoʼob maʼ u kʼiinbeskoʼob le Navidadoʼ.