Kaanbalnakoʼon tiʼ u tʼaan Dios

¿Baʼaxten kʼaʼabéet k-kaanbal tiʼ Dios?

Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ, jeʼel a wáantaʼal tumen u j-jaajkunajoʼob Jéeoba (testigos de Jehová) utiaʼal ka a wojéelt u núukil le kʼáatchiʼobaʼ.

1. ¿Baʼaxten kʼaʼabéet k-kaanbal tiʼ Dios?

Dioseʼ yaan junpʼéel baʼax ku yaʼalik ken u beet utiaʼal u yutsil wíinik. Lelaʼ tiʼ ku chíikpajal teʼ Bibliaoʼ, yéetel bey junpʼéel carta u túuxmajtoʼon Dioseʼ. (Xok Jeremías 29:11.)

2. ¿Baʼax ku yaʼalik Dios ken u beet t-oʼolal?

Mix juntúul gobierno béeyak u xuʼulsik le baʼateloʼ, le kʼasaʼaniloʼ, le kʼojaʼaniloʼ mix le kíimiloʼ. Baʼaleʼ Dioseʼ u yaʼalmaj u taasik junpʼéel maʼalob gobierno ken u xuʼuls tuláakal le baʼaloʼob ku muʼyajtik wíinikoʼ. (Xok Daniel 2:44.)

3. ¿Baʼaxten unaj k-séeb kaanbal tiʼ Dios?

Maʼ kun xáantaleʼ Dioseʼ yaan u xuʼulsik tuláakal le máakoʼob kʼasaʼanoʼoboʼ. Baʼaleʼ táanil tiʼ u beetkeʼ táan u kaʼansik u millonesil máakoʼob u yaabilt u yéet máakiloʼob yéetel ka yanaktiʼob junpʼéel maʼalob kuxtal. Le Bibliaoʼ jeʼel u yáantkoʼon k-aktáant le talamiloʼoboʼ, ka yanaktoʼon kiʼimak óolal yéetel ka k-kiʼimakkúunt u yóol Dios. (Xok Sofonías 2:3.)

  4. ¿Máax beet u tsʼíibtaʼal le Bibliaoʼ?

Le Bibliaoʼ ku taasik 66 libroʼob tsʼíibtaʼab tumen kex 40 máakoʼob. Le yáax cinco libroʼoboʼ tsʼoʼok tres mil quinientos jaʼaboʼob tsʼíibtaʼak tumen Moises, yéetel le u tsʼook librooʼ tsʼoʼok mil novecientos jaʼaboʼob tsʼíibtaʼak tumen le apóstol Juanoʼ. Le máakoʼobaʼ maʼ tu tsʼíibtoʼob chéen baʼax ku taal tu tuukuloʼobiʼ, baʼaxeʼ tu tsʼíibtoʼob baʼax yaan tu tuukul Dios. Le oʼolaleʼ le Bibliaoʼ Dios beet u tsʼíibtaʼal. (Xok 2 Timoteo 3:16 yéetel 2 Pedro 1:21.)

¿Baʼaxten jeʼel u páajtal k-aʼalik tiʼ Dios u taal le Bibliaoʼ? Tumen le ken u yaʼal baʼax ku taal u kʼiin u yúuchleʼ ku béeytal, lelaʼ junpʼéel baʼal maʼ tu páajtal u beetik wíinik (Isaías 46:9, 10). Ichil le Bibliaoʼ tiʼ ku chíikpajal xan u jatsʼuts modosoʼob Diosiʼ. Tsʼoʼoleʼ le Bibliaoʼ yaan xan u páajtalil u kʼexik u kuxtal yaʼab máakoʼob. Yoʼolal lelaʼ, yaʼab máak jach u yojel tiʼ Dios u taal. (Xok Josué 23:14 yéetel 1 Tesalonicailoʼob 2:13.)

5. ¿Baʼax jeʼel u yáantkoʼon k-naʼat le baʼax ku yaʼalik Bibliaoʼ?

Jesuseʼ tu kaʼansaj tubeel baʼax ku yaʼalik le Bibliaoʼ. Teʼ kʼiinoʼoboʼ kex yaʼab máak kʼaj óoltmil le Bibliaoʼ, maʼatech u naʼatkoʼob. Utiaʼal ka u yáantoʼobeʼ, Jesuseʼ ku chʼaʼchiʼitik wa baʼax versiculoiloʼobeʼ yéetel ku tsoliktiʼob. Le xookaʼ láayliʼ xan bey ken u beet utiaʼal a maas naʼatik le baʼaxoʼob ku kaʼansik le Bibliaoʼ. (Xok Lucas 24:27, 45.)

K-ojel yaan u taasiktech kiʼimak óolal a kaanbal tiʼ Dios yéetel a wojéeltik baʼax u tukultmaj u beetik yéetel le kuxtaloʼ. Baʼaleʼ maʼ u tuʼubultecheʼ maʼ tuláakal máak kun kiʼimaktal u yóol ken u yil táan a xokik le Bibliaoʼ, kex beyoʼ maʼ unaj u xuʼulul a beetkiʼ. Tumen le Bibliaoʼ ku yaʼalikeʼ, le máaxoʼob ku kaanbaloʼob tiʼ Diosoʼ, yaan u kʼamkoʼob le kuxtal minaʼan u xuuloʼ. (Xok Mateo 5:10-12 yéetel Juan 17:3.)

Wa a kʼáat a wojéelt u maasileʼ, ilawil u kaʼapʼéel xookil le libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.