Síijen Rmeich, junpʼéel u chan kaajil Líbano, naatsʼ tiʼ Israel. Nojochchajen tu kʼiinil baʼateltáambal. Láayliʼ kʼajaʼanten bix u wáakʼal le bombaʼob mukaʼanoʼob yéetel bix u móochkíintik le máakoʼoboʼ. Jach yaj le kuxtaloʼ; tuláakal tuʼux yaan kʼasaʼanil yéetel baʼatelil.

In láakʼtsiloʼobeʼ suuk u binoʼob teʼ Iglesia Católica Maronitaoʼ, junpʼéel tiʼ le jejeláas iglesiaʼob yaan Lakʼinoʼ. Tin wotocheʼ 12 u túulaloʼon, le oʼolal in taataeʼ chʼiikil meyaj utiaʼal u tséentikoʼon, baʼaleʼ in maamaeʼ suuk u biskoʼon teʼ iglesiaoʼ. Ka máan kʼiineʼ tin tsʼáaj cuentaeʼ le Iglesia yéetel u maasil máakoʼoboʼ maʼ tu yáantkoʼob le óotsiloʼoboʼ.

Tin paalileʼ jach utschaj tin wich kung fu, junpʼéel deporte jeʼex le karateoʼ. Jach tin tsʼáaj in wóol kaanbal, le oʼolal ka máan kʼiineʼ tin kanaj kóochaʼ, loox yéetel u meyajten le nuʼukuloʼob ku meyaj tiʼ le karatecaʼoboʼ. Kin tuklikeʼ kex maʼ tu páajtal in xuʼulsik le baʼateltáambaloʼ jeʼel u páajtal in jetsʼik le máaxoʼob ku beetkoʼob loob tiʼ u maasiloʼ. Le oʼolaleʼ ken in wil táan u baʼateʼel kaʼatúul máakoʼobeʼ kin wokskinbaiʼ. Séeb in pʼuʼujul, maʼ tu páajtal in controlartkinba. Le máakoʼob kajaʼanoʼob tu lakʼinil Líbanoeʼ saajkoʼob tiʼ teen, tumen u yojloʼob taak kaʼach in xuʼulsik le kʼasaʼanil yéetel le baʼateloʼ.

Tu jaʼabil 1980, ooken tiʼ junpʼéel u escuelail kung fu teʼ Beirutoʼ. Sáamsamal in practicar kex táan le baʼateltáambaloʼ wa kex táan u kʼáaxal bombaʼob. Chéen kin janal, kin wenel yéetel kin kuxtal jeʼex Bruce Lee, juntúul artista chino kajaʼan kaʼach Estados Unidos yéetel jach u yojel kung fu. Hasta kin xáacheʼtik in pool jeʼex letiʼeʼ, kin xíimbal jeʼex u xíimbaloʼ yéetel kin awat jeʼex letiʼeʼ. Maʼatech in cheʼej kaʼachi.

Tin tsʼíiboltaj in bin China utiaʼal in maas kanik kung fu. Juntéenjeak táan in practicareʼ yaan máax kʼoopnaj tu jool in wotoch: juntúul  in amigo yéetel kaʼatúul u j-jaajkunajoʼob Jéeoba. In tsʼaamaj u box nookʼil kung fu yéetel papaʼkilen yéetel in kʼíilkab. Kʼajaʼanten tin waʼalajtiʼob: «Maʼ in wojel mix baʼal tiʼ le Bibliaoʼ». Maʼ tin tuklaj wa yaan u kʼexpajal in kuxtaliʼ.

Le j-Jaajkunajoʼoboʼ tu yeʼesoʼobten teʼ Biblia baʼaxten mix máak jeʼel u páajtal u xuʼulsik le kʼasaʼanil yéetel le baʼateloʼ. Tu yaʼaloʼobteneʼ u Kʼaasilbaʼal beetik u yúuchul (Apocalipsis 12:12). Tin wilaj tu yichoʼobeʼ ku creertikoʼob le baʼax ku kaʼanskoʼoboʼ. Kiʼimakchaj in wóol ka tin wojéeltaj yaan u kʼaabaʼ Dios (Salmo 83:18). Tu xokoʼobten 1 Timoteo 4:8, tuʼux ku yaʼalik: «U jóoʼsik u muukʼ u wíinklil máakeʼ chéen junpʼíit utsil ku taasik; baʼaleʼ u jach kʼubik u yóol máak u meyajt Dioseʼ maas yaʼab utsil ku taasik ichil tuláakal baʼax ku beetik, tumen ku taasiktoʼon utsil ichil k-kuxtal bejlaʼeʼ bey xan ichil le kuxtal kun antaloʼ». Le tekstoaʼ tu yáanten in wil baʼax ken in beet yéetel in kuxtal.

Maʼ tin kaʼa ilaj le j-jaajkunajoʼoboʼ tumen in láakʼtsiloʼobeʼ tu yaʼaloʼobtiʼob maʼ u kaʼa suutoʼob. Kex beyoʼ xuʼul in practicartik kung fu, ka joʼopʼ in xokik le Bibliaoʼ. Kex maʼ utschaj tu yich in sukuʼunoʼobeʼ, tin chʼaʼtuklaj in kaxtik le j-Jaajkunajoʼob utiaʼal in maas kaanbaloʼ.

Kex máanen in kaxtoʼob tuláakal tuʼuxeʼ maʼ tin wiloʼobiʼ. In taataeʼ chéen ka téek kíimi. Tsʼoʼoleʼ úuch uláakʼ loobiloʼob tiʼ in láakʼtsiloʼob; leloʼ tu beetaj u jach lúubul in wóol. Le táan in meyaj kaʼach tiʼ junpʼéel empresa ku beetik najoʼoboʼ, juntúul in wéet meyaj ku kʼaabaʼtik Adeleʼ tu yilaj lubaʼan in wóoleʼ ka tu kʼáatajten baʼaxten. Tu tsikbaltajten baʼax ku yaʼalik le Biblia yoʼolal k-láakʼtsiloʼob tsʼoʼok u kíimloʼoboʼ. Ichil nueve meses tu tsʼáajten xook yéetel le Bibliaoʼ. Jach uts yéetel chúukpaj u yóol u kaʼansen.

Jujunpʼíitileʼ tin tsʼáaj cuenta yaan baʼaxoʼob ichil in kuxtal unaj in kʼexik. Teʼ Mateo 5:44, Jesuseʼ tu tsʼáaj le tsolnuʼukaʼ: «Maʼ u xuʼulul a yaabiltikeʼex a enemigoʼex yéetel orarneneʼex tu yoʼolal le máaxoʼob chʼaʼpachtikeʼexoʼ». Romailoʼob 12:19, ku yaʼalik xan: «Maʼ a sutkeʼex u jeel le kʼaas ku beetaʼalteʼexoʼ [...] tumen tsʼíibtaʼan: ‹Teen ken in sut u jeel le kʼaas ku beetkoʼoboʼ; teen ken in tsʼáa baʼax ku náajmatkoʼob, ku yaʼalik Jéeoba›». Le baʼax ku yaʼalik le Bibliaoʼ tu yáanten utiaʼal maʼ in séeb pʼuʼujul.

Kex in láakʼtsiloʼob maʼ u kʼáatoʼob kaʼach ka xooknaken yéetel le j-Jaajkunajoʼoboʼ, bejlaʼeʼ maʼatech u yaʼalikoʼob mix baʼal. Juntúul in wíitsʼineʼ tu beetuba j-Jaajkunaj. In maama xaneʼ tʼaanaj maʼalob tiʼ le baʼaxoʼob k-creertik tak ka kíimoʼ.

Jéeobaeʼ tu kiʼikiʼtʼanten yéetel juntúul maʼalob atantsil, u kʼaabaʼeʼ Anita. Tu kaʼatúulaloʼoneʼ precursor regularoʼon; leloʼ u kʼáat u yaʼaleʼ k-kʼaʼaytaj setenta horaʼob cada mes. Desde tu jaʼabil 2000, kajaʼanoʼon Eskilstuna (Suecia) yéetel k-kaʼansik le máakoʼob ku tʼankoʼob arabeoʼ.

Láayliʼ kin tuukul yoʼolal le máaxoʼob ku muʼyajoʼob yoʼolal le kʼasaʼaniloʼ. Baʼaleʼ bejlaʼeʼ kin naʼatik baʼaxten ku muʼyaj máak, yéetel kiʼimak in wóol in wojéeltikeʼ Dioseʼ yaan u xuʼulsik le muʼyajiloʼ (Salmo 37:29).