Le anticristooʼ maʼ juntúul máakiʼ mix xan junpʼéel organizacióniʼ tumen le Bibliaoʼ ku yaʼalikeʼ «yaʼab anticristoʼob» yaan (1 Juan 2:18). Ich griegoeʼ le tʼaan «anticristooʼ» u kʼáat u yaʼaleʼ «tiaʼan tu contra Cristoeʼ». Ku yaʼalaʼal xan anticristo tiʼ le máaxoʼob ku tuukuloʼob beyaʼ:

•   Jesúseʼ maʼ letiʼe Cristooʼ, yéetel maʼ u hijo Diosiʼ (1 Juan 2:22).

•   Maʼ tin beetik baʼax ku yaʼalik Cristo tumen maʼ letiʼe máax yéeyaʼan tumen Diosoʼ (Salmo 2:1, 2; Lucas 11:23).

•   Ku tuklikoʼobeʼ letiʼob le Cristooʼ (Mateo 24:24).

•   Ku chʼaʼpachtikoʼob le máaxoʼob beetik baʼax tu kaʼansaj Cristooʼ, lelaʼ bey tiʼ Jesús ku beetkoʼobeʼ (Hechos 9:5).

•   Ku yaʼalikubaʼob cristianoʼob pero chéen baʼaloʼob kʼaastak ku beetkoʼob yéetel ku tuskoʼob u maasil (Mateo 7:22, 23; 2 Corintios 11:13).

 Le Bibliaoʼ ku yaʼalikeʼ tuláakal le máaxoʼob bey u tuukuloʼoboʼ letiʼob le «anticristooʼ» (2 Juan 7). Le anticristooʼ chíikpaj desde tu kʼiinil le apóstoloʼoboʼ yéetel jeʼex tu yaʼalil le Bibliaoʼ tak teʼ kʼiinoʼobaʼ táan u beetkoʼob baʼaloʼob kʼaastak (1 Juan 4:3).

•   Le anticristoʼoboʼ ku yaʼalikoʼob baʼaloʼob maʼ jaajtak yoʼolal Jesúsiʼ (Mateo 24:9, 11). Ku kaʼanskoʼob le Trinidadoʼ yéetel ku yaʼalikoʼobeʼ Jesúseʼ Dios, le máakoʼob beyaʼ ku binoʼob tu contra le baʼax tu kaʼansaj Jesúsoʼ, letiʼeʼ tu yaʼalaj: «Le Taataoʼ maas nojoch tiʼ teen» (Juan 14:28).

•   Tsʼoʼoleʼ maʼatech u kʼamkoʼob baʼax tu kaʼansaj Jesús yoʼolal u Reino Dios. Jujuntúul tiʼ u nuuktakil le religiónoʼoboʼ ku kaʼanskoʼobeʼ Jesúseʼ ku usartik u gobierno wíinik utiaʼal u yáantik le máakoʼoboʼ. Pero le baʼax ku yaʼalikoʼobaʼ ku bin tu contra baʼax tu kaʼansaj Jesús, letiʼeʼ tu yaʼalaj: «In reinoeʼ maʼ yóokʼol kaabiliʼ» (Juan 18:36).

•   Ku yaʼalikoʼobeʼ táan u beetkoʼob baʼax ku yaʼalik Jesús, chéen baʼaleʼ maʼ jaajiʼ tumen letiʼobeʼ maʼatech u tsʼáaikoʼob ojéeltbil le jatsʼuts baʼaloʼob ken u beet le Reinooʼ (Mateo 28:19, 20; Lucas 6:46; Hechos 10:42).