YJeʼeleʼ. Le Bibliaoʼ kex junpʼéel libro úuch tsʼíibtaʼakeʼ, ku núukik le baʼaloʼob jach taak k-ojéeltikoʼ yéetel ku tsʼáaik u biilal k-kuxtal. Lelaʼ jujunpʼéel tiʼ le baʼaloʼob ku núukikoʼ:

1.   ¿Yaan wa Máax beet tuláakal baʼal? Le Bibliaoʼ ku yaʼalikeʼ Dios beet tuláakal baʼal (Apocalipsis 4:11). Como letiʼ beetmiloʼoneʼ u yojel baʼax jeʼel u taasiktoʼon kiʼimak óolaleʼ.

2.   ¿Ku yilik wa Dios baʼax ku yúuchulten? La Bibliaoʼ ku yaʼalikeʼ Dioseʼ «maʼ náach yanil tiʼ máakiʼ» (Hechos 17:27). Ku yilik baʼaxoʼob ku yúuchultoʼon yéetel u kʼáat ka xiʼiktoʼon maʼalobil (Isaías 48:17, 18; 1 Pedro 5:7).

3.   ¿Jeʼel wa u yantal u biilal in kuxtal wa kin kʼaj óoltik Dioseʼ? Dioseʼ tu beetoʼon yéetel u tsʼíibolalil k-natsʼikba tu yiknal yéetel k-ojéeltik baʼax u biilal k-kuxtal (Mateo 5:3). Lelaʼ ku beetik u taaktal k-kʼaj óoltik yéetel k-bisikba tu yéetel. Letiʼeʼ bey u kʼáat ka k-beetoʼ, le Bibliaoʼ ku yaʼalik: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8).

 U millonesil máakoʼobeʼ tsʼoʼok u yilkoʼobeʼ maas kiʼimak u yóoloʼob ikil u biskubaʼob yéetel Dios, tsʼoʼoleʼ maas maʼalob u bintiʼob ichil u kuxtaloʼob. Kex yaan kʼiin jeʼel u yantaltoʼon problemaseʼ le baʼaxoʼob ku yaʼalik le Bibliaoʼ jach jeʼel u yáantkoʼon utiaʼal:

•   U yantal kiʼimak óolal ichil k-familiaeʼ.

•   K-bisikba maʼalob yéetel u maasil.

•   K-ilik baʼax jeʼel u páajtal k-beetik wa yaantoʼon depresión, minaʼantoʼon taakʼin wa yaantoʼon wa baʼax kʼojaʼanileʼ.

 Yaʼab religiónoʼobeʼ maʼatech u beetkoʼob le baʼax ku yaʼalik le Bibliaoʼ. Pero le máaxoʼob yanoʼob ichil le religión ku kaʼansik u jaajiloʼ ku beetkoʼob baʼax ku yaʼalik le Bibliaoʼ yéetel ku yáantkoʼob u maasil u natsʼubaʼob tiʼ Dios.