Tu mesil julio tiʼ 2013, le Cuerpo Gobernanteoʼ tu túuxtaj junpʼéel carta tiʼ le misioneroʼob yéetel tiʼ uláakʼ máakoʼob meyajtik Dios bul kʼiin táanxel luʼumiloʼ. Le cartaaʼ jach jatsʼuts baʼax ku yaʼalik tumen tu tsʼáaj u yojéeltoʼob tsʼoʼok u tuklaʼal bix kun áantbiloʼob utiaʼal u viajaroʼob teʼ asamblea internacional wa regional kun beetbil kaʼach 2014 yéetel tu káajbal 2015.

Le baʼax tuklaʼab u beetaʼalaʼ maʼ chéen utiaʼal u binoʼob teʼ asambleaoʼ, baʼaxeʼ utiaʼal u máanskoʼob tiempo yéetel u láakʼtsiloʼob wa yéetel u amigoʼob. Le cartaoʼ tu yaʼaleʼ letiʼe organización kun boʼotik tuláakal le boletoʼoboʼ.

Le baʼax tuklaʼabaʼ óoliʼ jeʼex le tsʼoʼok u beetaʼal teʼ jaʼaboʼob tsʼoʼok u máanoʼoboʼ. Baʼaleʼ teʼ jaʼabaʼ le Comité tiʼ Enseñanza tiʼ le Cuerpo Gobernanteoʼ tu yilaj ka beetaʼak junpʼéel túumben departamento ku kʼaabaʼtik Sección de Viajes tiʼ le sede mundialoʼ. U biilal le departamentoaʼ u manik le boletoʼoboʼ.

Maʼ úuch túuxtaʼak le cartaoʼ ka joʼopʼ u sen kʼuchul correoʼob teʼ sede mundial utiaʼal u kʼáataʼal u boletosil avionoʼ. Tiaʼal enero tiʼ 2014, jach níik le meyaj teʼ departamentooʼ. Le máaxoʼob ku meyajoʼob teʼ Sección de Viajesoʼ júup u kaxtoʼob yéetel u manikoʼob u boleto le sukuʼunoʼob yanoʼob tiʼ jejeláas luʼumoʼob utiaʼal u binoʼob teʼ asambleaoʼ.

Yaan tiʼ le boletoʼoboʼ maʼ chéen chʼaʼabil úuchik u maʼanaliʼ. Yaan máakoʼobeʼ yaan kaʼach u viajaroʼob desde Reykjavík (Islandia) tak Cochabamba (Bolivia), uláakʼoʼobeʼ desde Nouméa (Nueva Caledonia) tak Antananarivo (Madagascar). Yaneʼ viajarnajoʼob desde Port Moresby (Papúa Nueva Guinea) tak Seattle (Washington, Estados Unidos) yéetel uláakʼoʼobeʼ desde Ouagadougou (Burkina Faso) tak Winnipeg (Canadá).

Le cinco sukuʼunoʼob ku meyajoʼob teʼ Sección de Viajes tiʼ le sede mundialoʼ tu manoʼob kex 19,000 u boletosil avión utiaʼal 4,300 máakoʼob yanoʼob tiʼ 176 luʼumoʼob. Lelaʼ béeychaj yéetel le taakʼin tu túuxtaj le múuchʼuliloʼob yéetel le tuukulil jeʼeloʼ.

Yaʼab máaxoʼob tsʼáa u diosboʼotikil yoʼolal le siibal beetaʼabtiʼoboʼ. Juntúul misionero yéetel u yataneʼ tu tsʼíibtoʼob: «Bejlaʼa k-suut tu noojolil u luʼumil Asia tuʼux táan k-meyajtik Dioseʼ. Jach k-tsʼáaikteʼex u diosboʼotikil yoʼolal le siibal ta tsʼáajeʼextoʼon utiaʼal k-viajar Inglaterra, le luʼum tuʼux síijoʼonoʼ, utiaʼal k-antal yéetel k-láakʼtsiloʼob tsʼoʼok cinco años maʼ k-iloʼobiʼ. Chéen yoʼolal a wáantajeʼex béeychaji. Yéetel tuláakal k-puksiʼikʼal k-tsʼáaikteʼex u diosboʼotikil».

Juntúul misionero ku meyajtik Dios Paraguayeʼ tu tsʼíibtaj: «Teen yéetel in wataneʼ taak k-tsʼáaikteʼex u diosboʼotikil, tumen béeychaj k-bin teʼ asamblea internacional beetaʼab Nueva Jerseyoʼ (Estados Unidos). Tu káajbal 2011 káaj k-ahorrar utiaʼal k-bin k-kʼaj óolt le sede mundial yaan Estados Unidosoʼ. Baʼaleʼ tu mesil junioeʼ invitartaʼaboʼon utiaʼal k-xíimbaltik le múuchʼuliloʼob ich señas yaan Paraguayoʼ. Jach yaan k-viajar kaʼachi. Ka tsʼoʼok k-sen tuklikeʼ t-aʼaleʼ maʼ táan k-bin Estados Unidos, baʼaxeʼ t-manaj junpʼéel coche utiaʼal u páajtal k-xíimbaltik le múuchʼuliloʼob aʼalaʼabtoʼonoʼ. Ka túun invitartaʼaboʼon teʼ asamblea internacionaloʼ. ¡Hasta ka béeychaj le baʼax k-tsʼíiboltikoʼ! K-tsʼáaik u diosboʼotikil tiʼ Jéeoba yoʼolal le yaabilaj yéetel le utsil eʼesaʼabtoʼonoʼ».

«Chéen t-túuxtaj le correo utiaʼal k-aʼalikteʼex: ‹¡Jach diosboʼotik!› —tu tsʼíibtaj juntúul sukuʼun yéetel u yatan yanoʼob Malaui—. K-aʼalikeʼ jach yaʼab meyaj beetaʼab yéetel yaʼab tiempo tu bisaj u maʼanal le bajun boletoʼobaʼ. K-agradecertik le nojoch meyaj tu beetaj u kaajal Jéeobaoʼ, maases le yaabilaj tu yeʼesajtoʼon utiaʼal u béeytal k-bin teʼ asamblea internacionaloʼ yéetel k-máansik tiempo yiknal k-láakʼtsiloʼob yéetel k-amigoʼob.»

Le máaxoʼob yanoʼob teʼ sede mundialoʼ jach kiʼimakchaj xan u yóoloʼob yéetel u meyajoʼob. «K-áantik le misioneroʼob utiaʼal u kaʼa ilik u láakʼtsiloʼobeʼ junpʼéel baʼal jach jatsʼuts», tu yaʼalaj Mileivi. Dorise, uláakʼ juntúuleʼ, tu yaʼalaj: «Tsʼoʼok in wilik le yaabilaj ku yuʼubik le organización yoʼolal le máaxoʼob meyajtik Dios táanxel luʼumoʼ». Tsʼoʼoleʼ Rodney, le máax ilik le departamentoaʼ, tu yaʼalaj: «Jach kiʼimakchaj in wóol yéetel le meyaj tin beetaʼ».

U j-jaajkunajoʼob Jéeoba tiʼ tuláakal yóokʼol kaabeʼ kiʼimak u yóoloʼob úuchik u tsʼáaik u siibaloʼob utiaʼal ka páajchajak u yáantaʼal máaxoʼob jach u tsʼaamaj u yóol u meyajtoʼob Dios kex kʼaʼabéet u pʼatkoʼob juntséelil jujunpʼéel baʼaxoʼob uts tu tʼaanoʼob.