Tiʼ tuláakal yóokʼol kaabeʼ yaan 15 u pʼéelel sucursaloʼob tuʼux ku imprimirtaʼal jóoʼsaʼaniloʼob tumen u j-jaajkunajoʼob Jéeoba. U sucursalil Europa centraleʼ tiaʼan Alemania tu kaajil Selterseʼ. Le kaajaʼ tiaʼan tiʼ junxóotʼ luʼum kʼaj óolaʼan Steinfels, u kʼáat u yaʼaleʼ «Tuunich».

Tu kʼiinil 23 tak 25 tiʼ mayo tiʼ 2014, invitartaʼab le vecinoʼoboʼ, le empresarioʼoboʼ bey xan u autoridadiloʼob le kaaj utiaʼal u xíimbaltikoʼob le sucursaloʼ. Le xíimbalaʼ tsʼaʼab u kʼaabaʼt «Treinta años tu kaajil Selters», tumen le sucursaloʼ 21 tiʼ abril tiʼ 1984 ka káaj u meyaj.

Teʼ kʼiinoʼobaʼ maas tiʼ 3,000 máakoʼob bin u xíimbaltoʼob le sucursaloʼ. U alcaldeil le kaajoʼ, máax óoliʼ treinta años káajak u meyaj teʼ ayuntamientooʼ, tu yaʼalaj: «U xíimbaltaʼal u sucursal u j-jaajkunajoʼob Jéeobaeʼ mantatsʼ junpʼéel baʼal jatsʼuts. Kʼajaʼanten le ka beetaʼab le sucursal way Steinfels tu jaʼabil 1979 tak 1984. ¡Jach séeb úuchik u beetaʼal!».

Junjaats tiʼ le xíimbaloʼ tsʼaʼab u kʼaabaʼt «U kaajal Jéeoba teʼ Europa Centraloʼ». Teʼeloʼ eʼesaʼab baʼax tsʼoʼok u sen beetik le j-Jaajkunajoʼob ichil u tsʼook 120 años teʼ xóotʼ luʼumoʼ. Le baʼaxoʼob eʼesaʼaboʼ maʼ luʼsaʼabiʼ, pʼaʼat utiaʼal u chaʼantaʼal mantatsʼ teʼ sucursaloʼ.

Le máaxoʼob binoʼoboʼ tu yiloʼob xan jujunpʼéel Bibliaʼob maʼ suuk u yilaʼaliʼ, baʼaleʼ jach kʼaʼanaʼantak. Por ejemploeʼ tu yiloʼob junpʼéel Biblia chúukaʼan ich alemán jóoʼsaʼab 1534, bey xan u jaats junpʼéel Biblia políglota (ich 12 idiomaʼob yaan u tsʼíibil) beetaʼab 1599 tumen Elias Hutter. Yaan tuʼuxeʼ tu yiloʼob takʼaʼan fotoʼob, carteloʼob yéetel graficaʼob; tu chaʼantoʼob xan videoʼob tuʼux ku yeʼesaʼaleʼ tak bejlaʼa ku taasik utsil u beetaʼal baʼax ku yaʼalik le Bibliaoʼ.

Ich kaʼajaats tiʼ le xíimbaloʼ le máakoʼoboʼ páajchaj u kʼaj óoltikoʼob tu juunaloʼob bix u kuxtal yéetel bix u meyaj le maas tiʼ mil máakoʼob kajaʼanoʼob teʼ sucursaloʼ. Le yáax jaatsoʼ tu kʼaabaʼtaj «Bix kuxlikoʼon». Béeychaj u kʼaj óoltikoʼob jujunpʼéel cuartoʼob, jaanoʼob teʼ comedoroʼ yéetel tu xíimbalkúunsubaʼob teʼ jardinoʼ. Juntúul koʼoleleʼ tu yaʼalaj: «Jach táaj jatsʼuts wayeʼ».

Le u kaʼa jaatsoʼ tu kʼaabaʼtaj «Producción». Teʼelaʼ béeychaj u yilkoʼob tuʼux ku beetaʼal le libroʼoboʼ yéetel tuʼux yaan u Departamentoil Envíos. Jach yéetel u yichoʼob tu yiloʼob bix u imprimirtaʼal le jóoʼsaʼaniloʼoboʼ, bey xan bix u tsʼaʼapal utiaʼal u túuxtaʼal tiʼ maas tiʼ 50 luʼumoʼob. Juntúul máakeʼ tu yaʼalaj: «Maʼ in wojel kaʼach wa jach kʼaj óolaʼan tuláakal tuʼux u j-jaajkunajoʼob Jéeoba. Le libroʼob ku beetkoʼoboʼ ku kʼuchul tiʼ tuláakal yóokʼol kaab. Lelaʼ junpʼéel milagro, tumen le máaxoʼob beetkoʼ maʼ táan u náajaloʼobiʼ».

Junpʼéel baʼax jach jatsʼuts ilaʼabeʼ letiʼe baʼaloʼob tsʼaʼab utiaʼal u kʼaj óoltaʼal le kúuchil jw.org yaantoʼon ich Internetoʼ. Táankelmoʼob yéetel nukuch máakoʼobeʼ béeychaj u yilkoʼob videoʼob yéetel uláakʼ baʼaloʼob; núukaʼab xan tiʼob tuláakal le baʼaxoʼob tu kʼáatoʼoboʼ.

Úuchik u kʼaj óoltikoʼob le meyaj ku beetik le j-Jaajkunajoʼob tiʼ tuláakal yóokʼol kaaboʼ, yaʼab tiʼ le máakoʼoboʼ le ka jóokʼoʼoboʼ táan u cheʼejoʼob yéetel táan u tʼaanoʼob maʼalob tiʼ le meyaj ku beetaʼal teʼ sucursaloʼ. Juntúul máakeʼ tu yaʼalaj: «Maʼ maʼalob in tuukul kaʼach tu yoʼolal le j-Jaajkunajoʼoboʼ. Beoraaʼ tsʼoʼok u kʼexpajal in tuukul». Juntúul koʼoleleʼ maʼ tu xuʼulul u yaʼalik kaʼachi: «Lelaʼ yaan u beetik u xuʼulul u pʼektaʼal le j-Jaajkunajoʼoboʼ».