Dxi mayaca gati Jesús guníʼ ca diidxaʼ riʼ: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14). Ximodo gaca dxiiñaʼ riʼ lu guidubi naca Guidxilayú yaʼ. Zácani ra chinanda ca discípulo stiʼ Jesús ejemplu ni bisaana dxi guyuu lu Guidxilayú (Lucas 8:1).

Rigánnadu binni ralidxi. Jesús bisiidiʼ ca discípulo stiʼ gucheechecaʼ ca diidxaʼ nacubi ne galán stiʼ Reinu de yoo pur yoo (Mateo 10:11-13; Hechos 5:42; 20:20). Ca primé xpinni Cristu que maca guʼtaʼ paraa zanda gucheechecaʼ diidxaʼ (Mateo 10:5, 6; 2 Corintios 10:13). Zacaca nga rúnidu ca dxi riʼ, cada neza binni ridagulisaa maca nexheʼ paraa gucheeche diidxaʼ. Nga racané laadu gucheechedu diidxaʼ ra nuu guiráʼ binni casi guníʼ Jesús gácani (Hechos 10:42).

Rúnidu stipa pur guinínedu binni ratiica nuu. Zacá bisihuinni Jesús ni purtiʼ laa bicheeche diidxaʼ ra nuu stale binni, ruaa nisadóʼ o ruaa bizé ra rié stale binni (Marcos 4:1; Juan 4:5-15). Laadu laaca ruyúbidu guinínedu binni de Biblia ratiica nuudu: lu calle, ra cutoo binni, ra parque o pur teléfono. Laaca rinínedu ca xpecínudu de cani runi credu, cani runinedu dxiiñaʼ, ne cani rinedu scuela ne ora ganda la? laaca rinínedu ca binnilídxidu. Pur nga stale millón de binni ni nuu lu guidubi naca Guidxilayú randa rucaadiágacaʼ «ca diidxaʼ nacubi ne galán ni rulá» (Salmo 96:2).

Guníʼ ique ti binni ni ñuuláʼdxiluʼ ñuíʼneluʼ ca diidxaʼ nacubi ne galán stiʼ Reinu stiʼ Dios ne ximodo zanda gacaneni binni ca despué. Cásipeʼ ganda guniʼné guiráʼ binni ni maʼ biziidiluʼ.

• Xii nga ca «diidxaʼ nacubi ne galán» ni naquiiñeʼ guinidu.

• Ximodo rusihuinni ca testigu stiʼ Jiobá cayúnicaʼ cásica biʼniʼ Jesús ora rucheechecaʼ diidxaʼ.