NABEZA familia stiʼ John ndaaniʼ ti guidxihuiiniʼ stiʼ Gujarat (India). Ra ziluxe década stiʼ iza 1950, guyuunisa bixhózebe casi testigu stiʼ Jiobá. Peru John, jñaa ne xcaayuʼ biʼchiʼ ne bizaʼnaʼ nabé católicu laacaʼ ne qué ñuuláʼdxicaʼ religión stiʼ bixhózecaʼ.

Ti dxi gunabaʼ bixhozeʼ John laa chisaana ti sobre ra nuu ti xhamigu de congregación stiʼ. Siadóʼ queca guizáʼ feu modo bichuuguʼ John ti bicuini náʼ ra cuxheleʼ ti lata de guiibaʼ. Neca zaqué, cumu racaláʼdxibe guzuubabe stiidxaʼ bixhózebe la? bichendabe ti ndaa lari bicuini nabe ne bireebe zebe ra lidxi xhamigu bixhózebe.

Ora yendabe raqué, xheelaʼ hermanu que, ni laaca naca testigu stiʼ Jiobá, gucuaa sobre que. Ora biʼyaʼ hermana riʼ ra biruuguʼ náʼ John, nagueendaca gudxi laabe pa zacané laabe. Gulee botiquín de primeros auxilios stiʼ, biʼniʼ desinfectar ra biruuguʼ que ne bindiibi venda bicuini nabe. Despué biʼniʼ ti taza té para guebe. Ne laga nuube raqué guniʼné laabe de Biblia.

Bizulú bichaa John modo riníʼ ique de ca testigu stiʼ Jiobá. Ngue runi bíʼnibe chupa chonna pregunta hermana que. Laabe biʼniʼ crebe Jesús nga Dios ne naquiiñeʼ guni orárcabe María, peru cadi zaqueca riníʼ ique bixhózebe. Hermana riʼ biziidiʼ gujarati, ngue runi bixheleʼ Biblia ne bisiene John xi rusiidiʼ ni de guiropa tema riʼ lu idioma ni riníʼ. Despué bidiibe laa folletu “Estas buenas nuevas del reino”.

Ora biʼndaʼ John folletu que, bidii cuenta laani nga ni dxandíʼ. Guyebe ra nuu cura stiʼ yuʼduʼ ra riebe ne gunabadiidxabe laa laaca cani gunabadiidxabe hermana que. Peru bidxiichi cura que, bindaa ti Biblia laabe ne bicaa ti ridxi rabi laabe: «¡Maʼ Binidxabaʼ lii yanna! ¿Paraa ná Biblia cadi Jesús nga Dios? ¿Paraa ná cadi naquiiñeʼ guni orarnu María? ¿¡Paraa!?». Qué guirá guidxagayaa John modo bicabi cura que laa, ne gudxi laabe: «Qué ziuuruʼ dxi chiguzuhaaʼ ndaaniʼ ti yuʼduʼ católicu». Ne zaqué guca ni.

Bizulú John biʼniʼ estudiar Biblia né ca testigu stiʼ Jiobá, biʼniʼ crebe cani dxandíʼ, ne bizulú bíʼnibe xhiiñaʼ Jiobá. Yenanda xcaadxi de familia stibe ejemplu stibe. Dede yanna napa John pesu lu bicuini náʼ ni láʼ índice ni nuu ladu derechu, ne ora ruuyabe ni, né stale cariñu rietenaláʼdxibe ximodo pur guendanachaʼhuiʼ ni biluíʼ hermana que laabe raca sesenta iza atrá gucané ni para gánnabe ximódopeʼ nga naquiiñeʼ gaca adorar Dios (2 Cor. 6:4, 6).