«Ne dxi stiʼ ca rey que la? Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu riʼ, ne laani ziaana ni ne qué ziuu dxi guiluxe ni.» (Daniel 2:44.)

Reinu stiʼ Dios nga ti gobiernu ni nuu guibáʼ. Ne maʼ gulibe Jesucristu para gaca rey lu Reinu ca. Laabe nga chichuube lugar stiʼ ca gobiernu nuu yanna riʼ para gúʼyabe gaca ni na Dios guibáʼ ne lu Guidxilayú (Mateo 6:9, 10). Qué ziuu dxi chuʼ ti gobiernu de Guidxilayú riʼ lugar stiʼ Reinu stiʼ Dios, purtiʼ «Jesucristu Señor stinu ni bilá laanu. Laa qué ziuu dxi guiaana dxí de guni mandar», nga rusihuinni qué ziuu dxi gusaana de gapa binni guendariuudxí (2 Pedro 1:11).

«Binidxaba laca rutiidi laa casi tobi ni zeeda de Dios. Zacaca runi ca xpinni be, ma na ca nachaʼhui ca para guni cre binni laacaʼ. Peru zadxiña dxi uquixe Dios ni laacaʼ.» (2 Corintios 11:14, 15.)

Zahuinni dxichi Binidxabaʼ nga gundisastí ca religión ni cadi dxandíʼ ca ne zanitilú guiráʼ cani. Ne maʼ qué zucaa ca religión ca binni guni modo nacaʼ ne maʼ qué zati binni pur laacani. Nga runi, cani nadxii «tobi lucha Dios ni nabani» zanda guni adorarcaʼ laabe modo riuuláʼdxibe ne «tobi si ni [z]uni cre[caʼ]». ¡Dxicaruʼ nga ziuu binni tobi si ne maʼ qué zadíndecaʼ! (1 Tesalonicenses 1:9; Efesios 4:5; Juan 4:23.)

«Zabeza né [Dios] laacaʼ. [...] Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué.» (Apocalipsis 21:3, 4.)

Zanda guni Jiobá cani maʼ bizéʼtenu ca ra iquiiñeʼ Xiiñiʼ, Jesús, ni bidii xquendanabani pur  binni guidxilayú (Juan 3:16). Jesús zacané binni para guiree donda ni bisaanané Adán laacaʼ. Maʼ qué zacaná binni purtiʼ «zabeza né [Dios] laacaʼ» ne «zuchaa be nisa riete lú caʼ». Maʼ cadi candaa zeeda gaca donda napa binni ne guiráʼ yuubaʼ cadíʼdicaʼ xiixa ni guca dxiqué. Biblia na: «Cani runi jneza ca zacaacaʼ guidxilayú, ne zabánicaʼ luni guiráʼ dxi» (Salmo 37:29).

«Unaaze [Jesús] dragón, dxa beenda yooxho ni rabi cabe binidxaba que, bindiibi be laa ti mil iza. Bisaba be laa ndaani dxa bizé que. Raqué biseguyoo be laa. Biseegu dxiichi be ruaa ni ti ma cadi usiguii binni.» (Apocalipsis 20:2, 3.)

Maʼ qué zucaa Binidxabaʼ binni guni ni na purtiʼ zaliibi ne zaqueca ca demonio stiʼ ne zulaa Jesús laacabe ndaaniʼ ti «bizé», ra maʼ qué zanda gúnicabe gastiʼ. Nga runi, maʼ qué zanda gucaacabe binni guni ni nácabe. ¡Nabé galán zabani binni ndaaniʼ ti guidxilayú ra maʼ qué ziuu Binidxabaʼ ne ca demonio!

Zaluxe ca últimu dxi ca ra guiluxe ca dxi jma nagana ni bizeeteʼ Jesús que. Laabe guniʼbe: «Nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru» (Mateo 24:21).

Lu ca dxi jma nagana ca zazaaca stale cosa ni qué huayuu dxi guihuinni, ne racá nga zuzulú guendaridinde stiʼ «Dios ni jma nandxóʼ», ni runibiáʼ binni casi «Armagedón» (Apocalipsis 16:14, 16).

Ca binni ni riuulaʼdxiʼ guni ni jneza cabézacaʼ dxi guinitilú guiráʼ ca binni malu. Guidúʼyanu caadxi de ca ndaayaʼ ni chigueedané Reinu stiʼ Dios.

Zabani «jma binni» ndaaniʼ ti guidxilayú cubi ra maʼ qué ziuu guendaridinde: Stiidxaʼ Dios cayabi laanu zalá «jma binni» lu ca dxi jma nagana ca ne zabánicaʼ lu ti guidxilayú cubi ra zuni binni ni jneza (Apocalipsis 7:9, 10, 14; 2 Pedro 3:13). Ca binni guilá dxicá zaniʼcaʼ Jesucristu, «Dendxu huiini sti Dios ni ribee xpecadu binni guidxilayú», nga bilá laacaʼ (Juan 1:29).

Zabeendú binni stale cosa galán ra gusiidiʼ Dios laacaʼ: Guidxilayú cubi ca «zadxá típani de guiráʼ ni rusiidiʼ Jiobá» (Isaías 11:9). Lade cani chigusiidiʼ Dios laanu ca zusiidibe laanu ximodo guibaninenu xcaadxi binni tobi si ne ximodo gápanu Guidxilayú riʼ. Dios maʼ bidii stiidxaʼ: «Naa, Jiobá, naa nga Dios stiluʼ, Ni cusiidiʼ lii para cueenduluʼ ni galán para lii. Ni cayabi lii gunáʼ nga neza ra naquiiñeʼ saluʼ» (Isaías 48:17).

Ziasa ca binni ni nadxiinu de lade gueʼtuʼ: Dxi guyuu Jesús lu Guidxilayú riʼ gundísabe ti xhamígube láʼ Lázaro (Juan 11:1, 5, 38-44). Né ni bíʼnibe ca bisihuínnibe xi chigúnibe lu guidubi Guidxilayú ora gácabe Rey lu Reinu stiʼ Dios (Juan 5:28, 29).

Qué ziuu dxi gusaana de gapa binni guendariuudxí ne guni ni jneza: Dxi guni mandar Cristu maʼ qué ziuu binni ni guni ni cadi jneza. Xiñee yaʼ. Purtiʼ Jesús zanda guʼyaʼ xi nuu ndaaniʼ ladxidóʼ binni, ne pur nga zanda gúʼyabe tuu nga ni nachaʼhuiʼ ne tuu nga malu. Cani qué naʼ gusaana de guni cosa malu la? qué zanda diʼ guibánicaʼ ndaaniʼ guidxilayú cubi stiʼ Dios (Salmo 37:9, 10; Isaías 11:3, 4; 65:20; Mateo 9:4).

Lu ca tema ni maʼ gudídinu ca, maʼ bidúʼyanu chupa chonna de cani cuzeeteʼ Stiidxaʼ Dios zaca lu Guidxilayú riʼ. Dxi guni mandar Reinu stiʼ Dios lu Guidxilayú riʼ qué zusaana de gapa binni «guendariuudxí» (Salmo 37:11, 29). Zaree guiráʼ ni runiná binni. Dios maʼ bidii stiidxaʼ zaca ni zacá: «Biiyaʼ, cayune irá xixé cosa nacubi. [...] Dxandí irá diidxa riʼ, zanda guni cre lu ni» (Apocalipsis 21:5).