Ti biaje lu ti iza, lu guidubi naca guidxilayú riʼ, ca testigu stiʼ Jehová ne millón de binni ridagulisaacaʼ para guietenaláʼdxicaʼ guendaguti sti Jesús casi peʼ biʼniʼ mandarbe gaca ni (Lucas 22:19). Racané reunión riʼ laanu guiénenu pabiáʼ risaca nga bidii Jesús xquendanabani pur laanu. Laaca racané ni laanu guiénenu modo racané sacrificiu riʼ laanu yanna ne ca dxi ni zeeda ca (Juan 3:16).

 Pa gunda guyeluʼ dxi bietenaláʼdxidu guendaguti stiʼ Jesús iza riʼ o pa coʼ, ¿ximodo zanda gacané sacrificiu ni biʼniʼ Jesús lii yaʼ? Laapebe bisiidibe naquiiñeʼ gúninu chupa cosa nabé risaca.

1.  1. Guizíʼdinu de Jehová ne de Jesús. Lu ti oración ni biʼniʼ Jesús Bixhoze, gúdxibe laa ca diidxaʼ riʼ: «Ne zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ» (Juan 17:3).

2.  2. Gúninu ni cazíʼdinu. Bisiidiʼ Jesús naquiiñeʼ gúninu ni cazíʼdinu lu xquendanabáninu. Casi lu Sermón del Monte que, guluube gana ca ni rucaadiaga stiidxabe ne rúnicaʼ ca ni lu xquendanabánicaʼ (Lucas 6:46-48). Ne sti biaje laaca guniʼbe: «Pa nánnatu ca cosa riʼ ne gúnitu ni la? ziuutu nayecheʼ» (Juan 13:17).

 ¿Ñuuláʼdxiluʼ niziidiluʼ jma de Dios ne de Jesús laa? ¿Ñuuláʼdxiluʼ ñánnaluʼ ximodo zanda gúniluʼ ni caziidiluʼ lu xquendanabániluʼ laa? Raríʼ zeeda caadxi cosa ni zanda gacané lii.

 Cumu cadi nagana modo ridúʼndanedu binni Biblia la? nabé riuuláʼdxicaʼ guiziidicaʼ ne nga racané laacaʼ gúnicaʼ ni rusiidiʼ Biblia.

•   Guyuu ra ná «Modo ridúʼndanedu binni Biblia» para gánnaluʼ jma de tema riʼ.

•   Biiyaʼ videu ni láʼ ¡Cayéchedu chiguni estudiarluʼ Biblia! para gúʼyaluʼ ximodo rusiidiʼ ca testigu stiʼ Jehová binni ni ná Biblia.

 Laadu ca testigu stiʼ Jehová ridagulisaadu chupa biaje lu ti semana ndaaniʼ caadxi lugar ni rábidu Yoo stiʼ Reinu. Lu ca reunión riʼ ridúʼndadu Biblia ne ridúʼyadu ximodo zanda gunidu ni nani lu xquendanabánidu.

 Cadi caquiiñeʼ gácaluʼ testigu stiʼ Jehová para ganda cheluʼ ca reunión ca, tutiica zanda cheʼ. Pur modo nuu neza ra nabézaluʼ zanda cheluʼ lugar ra raca ca reunión ca o gúʼyaluʼ ni pur videoconferencia.

•   Lu videu ni láʼ Ximodo raca ca guendaridagulisaa stidu, zanda gúʼyaluʼ xi guiráʼ raca ndaaniʼ ti Yoo stiʼ Reinu.

•   Guyuu ra ná «Ca reunión rapa ca testigu stiʼ Jehová» para gúʼyaluʼ Yoo stiʼ Reinu ni nuu jma gaxha de ra nabézaluʼ.

 Lu sitiu riʼ nuu stale videu ne publicación de gadxé gadxé tema ni zanda gacané lii guiziidiluʼ jma de Jesús ne de pabiáʼ risaca sacrificiu ni bíʼnibe.

 Casi pa racaláʼdxiluʼ gánnaluʼ ximodo zanda gulá guendaguti stiʼ ti hombre si guiráʼ xixé binni guidxilayú la? biindaʼ ca artículo riʼ «¿Ximodo rulá Jesús laanu?» ne «Xiñee gucaná ne guti Jesús» o biiyaʼ videu ¿Xiñee guti Jesús?