Mbori nga Bakusirani ima du niˈiratatamana kisusi rani gbe. Wangia ko gu Barani duna nyemuse, ko naberã parani aberã. Na ko aakusanga rani ani ra nirirani zanga ko te. (Yeremaya 10:23) A wa si naaida agude gbia arugute agbia be avunguyo, ani dunduko si aida arugute yeaye furani be Mbori. (Yesaya 48:17, 18) Agu arugute du rogo Ziazia Kekeapai nga gamahe furani be Mbori.​—Mo gedi 2 Timoteo 3:16.

Ga Yekova arugute nayugo wene gene raka furani awere na wai rengbe ani ka gbia nyenye amosoro kumbatayo. Wa duhe nga Mbori du nakusi rani, si ruaru na ki ngba angba ani di gako arugute kugume.​—Mo gedi Atambuahe 19:7, 11; Yugoti 4:11.

Kura apai kinaho rogo Ziazia Kekeapai nayugo gupai furani si aida ani mangihe rogo dungu abangiriaba. Ono kura arugute nazahe aza ziazia ti kura apai. (Pa Fu Rugute ni Ue he 22:8) Si naida ani berẽ wenengai tipa ka ino wai gupai du rogo Ziazia Kekeapai aruga rani rogo abangiriaba nibakiakia. (Asanza 2:10-12) Nikpiapai, Ziazia Kekeapai naya furani wee unga nga gamahe be Mbori. Gupai re rengbe arengba ka ruga rani ba gaani sunge yo, kporoyo, watadu ho ani ata ni. Ka ani atingida gupai nga unga nga gamahe, si sa rani asa ani ne agu apai rengbe ka gberesapa gaani unga watadu gu nga ga kura aboro.​—Mo gedi Amokedi 17:28.

Yesu afura tipa arugute ue nga gu nyakipaha gbe. Gu bambataha nayugo kina boro gupai i akusi aboro ti ni, nga ka ino Mbori, kini kpinyemuko, na kini irisiko niruru aboro. Si naida ani berẽkurii gi rugute re rogo agu adiaberã dunduko ani amangaha. (Asanza  3:6) Agu aboro nairisa gi rugute re nada ni abakurea Mbori, ki gbia ndikidi ngbarago, na ki gbia nyenye unga.​—Mo gedi Matayo 22:36-38.

Gu ue rugute Yesu apepaha rengbe ka undo rani ani duna wene pagume na akuarani. (1 AKorindo 13:4-7) Mangasunge na gi ue rugute re nakoda manga aboro ngba gu gene Mbori amanga aboro ngbaha.​—Mo gedi Matayo 7:12; 22:39, 40.

Agu arugute nga ga Ziazia Kekeapai nayugo wai fu aborokporo rengbeyo kadu nikodikodiyo rogo nyemuse. (AKorosaio 3:12-14) Fugo Mbori nabanda aborokporo a na kura rugute si afuhe nga, si naida rogatise du niguhe nika nyeanye kindi.​—Mo gedi Bambata Pai 2:24.

Pa ndu ani kuti agu arugute nga ga Ziazia Kekeapai rengbe arengba ka banda rani ti kpotorani na ngbaduraniyo. Nikpiapai, badungu abairasunge ninaaida kina agu amangisunge naraka kuti agu arugute nga ga Ziazia Kekeapai nga gu nabipa mangasunge nyanyakii na zanga dĩi watadu ziree. (Asanza 10:4, 26; AEbere 13:18) Fugo Mbori nayugo gupai furani a nga ani rengbe kina be agu ahe si aida aida nzunzu si du berani na kini bi pa gaani bakure na Mbori na nyanyakipaha susi aũzegino.​—Mo gedi Matayo 6:24, 25, 33; 1 Timoteo 6:8-10.

Pa raka ani ringbisihe kuti agu arugute nga ga Ziazia Kekeapai rengbe arengba ka banda kpotorani be akaza. (Asanza 14:30; 22:24, 25) Nikpiapai, ka ani airisa gu ga Mbori rugute nazahe ti kpibuda, ani bandatirani abanda be kere akaza gbiati abéno. (Asanza 23:20) Yekova naida gupai nga ka ani aida ka mbirabuda, ani mbirihe rengbearengba. (Atambuahe 104:15; 1 AKorindo 6:10) Agu arugute nga ga Mbori naundo rani ani banda gaani mangaapai na gaani aberã. (Atambuahe 119:97-100) Ono tie, ndikidi aKristano airisanga ga Mbori arugute gbua tipa ka gbia undo tipa tiyo te. I namangaha wo tipa ka fu irisa fu Yekova.​—Mo gedi Matayo 5:14-16.